Malako 1 - BONKANDA WA NZAKOMBA W’AEYOKO

¹ LANGO ya bosako w’olotsi wa Yesu Masiya, Bona owa Nzakomba.

² Ng’elenge ekotamaki nd’onkanda wa Yesaya owa boteli, Bala, ntoma ekima ekami nda joso ja elongi eke, Ende ifokeleza mboka eke;

³ Lofoso ja bonto obeleza nd’etekeleke, Loongya mboka ea Nkolo, Locilaza mboka ikande.

⁴ Yoane aoya, aolin’anto nd’etekeleke, ko aosanga nsango ea inamelo ea mbututala ele etungwelo lima baoyi’obe.

⁵ Ko ba Yudea bauma la ba Yelusalema bauma baocwa el’ende, ko baolinama l’ende nda ntando ea Yoladane, ak’iy’oiezaka baoyi bakiyo b’obe.

⁶ Ko Yoane aolota eto ea nkunza ea ngamela, ko l’onsenge w’ekoto nd’onkeke; ko aleki basalankata la mpako.

⁷ Aosanga, akela, Bonto ondekol’emi mpamba aoya nd’afeka bakami; emi mpeji losunama wae ndembole bekulu bia bikoto bikae,

⁸ Njin’inyo nd’asi, lolo ende ifin’inyo nda Bolimo w’olotsi.

⁹ Ko joi line joliela nd’embile beko wete Yesu aoya lima Nazaleta ea Ngalilaya, ko aolinama la Yoane nda Yoladane.

¹⁰ Ko nkakoyoko, aki’nde osafwaka lim’asi, aolena loola lokombwa, ko Bolimo aokitela el’ende jonge ng’embenga.

¹¹ Ko lofoso, loyaki lima loola, lokela wae, We ole bona’okami ow’eefe, we ondoky’emi ekemo mongo.

¹² Ko nkakoyoko Bolimo aolotoma nd’etekeleke.

¹³ Ko aki nd’etekeleke bembile ntuku inei, aomekama la Satana; ko aki eko la nyama ya wale; ko bikima bia loola baolokambya.

¹⁴ Ko aki Yoane otungamaka, Yesu aoya nda Ngalilaya, aosanga nsango e’olotsi ea Nzakomba,

¹⁵ ko aokela, Ekeke eoliela, ko likulaka ja Nzakomba jotutama: loututala baoyi’obe, ko limeza bosako w’olotsi.

¹⁶ Aki’nde oleke nd’eselo ea lieke, aolena Simona la Andelo okosangi la Simona nd’ooci’omoko, bayuse botai wa nse nda lieke, ek’iyo baasi ba nse.

¹⁷ Ko Yesu aolakela, Loyaka, lonkime, ko njifokel’inyo wae loyaleme baasi b’anto.

¹⁸ Ko nkakoyoko baosundola betai, ko baolokima.

¹⁹ Ko aki’nde olekane isisi, aolena Yakobo, bona owa Zebedayo, la Yoane okosangi l’ende nd’ooci’omoko, bayosambe betai nda wato.

²⁰ Ko nkakoyoko aolaeta; ko baocik’ise ekiyo Zebedayo nda wato l’asali, baoy’okim’ende.

²¹ Ko baocwa nda Kapalanauma. Ko nkakoyoko, nda mbile ea Sabata, aolotswa nda sunagoga, aolaka lilako.

²² Ko baokamwa la ncina ea lilako likae, eki’nde oalakaka ngole bonto owa mpifo, ko ntalaka ngole bakoci b’enkanda.

²³ Ko bonto aki nda sunagoga ekiyo oki la bokali wa linyamo; ko aobeleza,

²⁴ aokela, Iso la we tole ngamo, Yesu owa Nazaleta? Oyaki wae otofite? Njokea we, ole owa boeko owa Nzakomba.

²⁵ Ko Yesu aolofela, aokela, Ambya lofoso, ko ola lim’el’ende.

²⁶ Ko bokali wa linyamo bolobilingola, ko aololomwa la lofoso ja bolo, ko bolola lim’el’ende.

²⁷ Ko iy’auma baokamwa, wete baoluwana, bakela, Joi line lile na? Bala lilako linkina j’aeyoko! Aosangela bekali mongo bia linyamo la mpamba ea mpifo, ko baoloimeza!

²⁸ Nkakoyoko lokumo lokae lolongwana wiji la wiji nda bokili wa Ngalilaya bouma.

²⁹ Ko nkakoyoko, ak’iy’olaka lima sunagoga, baocwa nd’ilombe ya Simona la Andelo, iyo la Yakobo la Yoane.

³⁰ Lolo nyango ea waji owa Simona akeci la nkangi ea angala, ko nkako baolosangela nd’eloko ekae.

³¹ Ko aoya, aolokita nda likata, aolosangya; ko nkangi ea angala eolocika, ko aolasaela.

³² Lolo l’okolo, aki jefa oile, baoyela el’ende bant’auma baki la nkangi la baki la bademona.

³³ Ko bonanga bouma botakana nda wiso.

³⁴ Ko ayoikya banto bauke baki la nkangi ya bilenge la bilenge, ko aoloza bademona bauke, ko aofeka bademona wae bafotefela, ek’iy’oeak’ende.

³⁵ Ko la nkesa mongo, jefa lif’ino, ayoetswa, aolola, ko aokenda nd’itenela y’etekeleke, ko ayoond’eko.

³⁶ Ko Simona la baki l’ende baolokima;

³⁷ ak’iy’otanak’ende, baolosangela, Bant’auma bayokase.

³⁸ Ko aolakela, Loyaka, tokende nda biiji bemo bi’enanga betutsi, ncina wae ndongoza bosako eko ngoko; njaki nd’ewela eko.

³⁹ Ko aocwa oongoza bosako nda basunagoga bakiyo nda Ngalilaya euma, ko aoloza bademona.

⁴⁰ Ko bonto oki la nkangi e’aeka aoy’el’ende, aoloonda, ko aolokusamela, aolokela, Ayaka olanga ngoko, ompetoleya.

⁴¹ Nd’ewela eki’nde ookak’isei, aosembya likata likande, aolofomwa, ko aolokela, Ndanga, fetswaka.

⁴² Ko nkakoyoko baeka baoliman’el’ende, ko aofetwsa.

⁴³ Ko nkakoyoko aolotoma, ko aolosasa,

⁴⁴ ko aolokela, Bala, tosangelak’onto joi nye, lolo kenda, eneya nkanga jonge like, ko nd’eloko ea efetswelo eke lekya toma toki Mose osiselaka nga lotaza el’iyo.

⁴⁵ Lolo aoliman’eko, aanga loongoza joi liko bouke, ko lolanza liko, ko la ncina eko Yesu ntaata emotswelo lenkina nd’onanga’omo la fole, lolo aki eko nda totenela ta etekeleke: ko bayaki el’ende lima biji beuma.