Luka 1 - BONKANDA WA NZAKOMBA W’AEYOKO

¹ ND’EWEL’EKI bant’auke ocwak’okota nsango ea baoyi’ako bakelamaki el’iso,

² o ngok’iy’otokaya, iy’andenaki l’aiso lim’iango ko la bakambyi ba Joi j’osako,

³ ko nd’ewel’eki’m’oengelaka elenge ea baoyi’auma lim’iango njengela mongo, emi ntangaki bolotsi ngoko wete nkokotele wengi joi nd’ekelamelo ea liko, we Teofilo ow’olotsi oleki:

⁴ wae wea nsosolo ea baoyi baki w’olakemaka.

⁵ Nd’embile beki Elode, bokulaka owa roi owa Yudea, nkanga emo aki eko otangema Zekalaya, oki nd’ekafwelo e’Abiya: ende aki la waji nd’ooci w’Alona, ko lina likae liki Elisabeta.

⁶ Ko baolelama iy’afe nda joso ja Nzakomba, ko baokenda nk’oseketano nda bisekyelo la besise bia Yawe.

⁷ Iyo ntabaki l’ona nye, eki Elisabeta ntaotaka, ko iy’afe baokita bingambe mongo.

⁸ Aki’nd’okambe nda mpifo ea nkanga nda joso ja Nzakomba nd’ekambelo e’ekafwelo ekae,

⁹ eleng’eki mpifo ea nkanga, ekeke ekae eokita wae otswa nd’ilombe ya Yawe wete atumbe baimi.

¹⁰ Ko etukuluku euma e’anto bayoonde nd’anza nd’ekeke ea ntatumba ea baimi.

¹¹ Ko ekima ea Yawe eolenya el’ende, aolemala nda wiji wa likata j’elome wa nkinda ea ntatumba ea baimi.

¹² Ko Zekalaya aokakaana eki’nd’oenaka, ko booma bolokwela.

¹³ Lolo ekima aokela, Tawokake booma, Zekalaya: ewela boondo boke bolokana, ko waji’oke Elisabeta ifokootela bona, ko wifoila lina likae Yoane.

¹⁴ Ko wifoat’ekemo l’osalangano; ko bant’auke bifosalangana nd’eotswelo ekae.

¹⁵ Ewela ende ifoyala ow’onene nd’aiso ba Yawe, afaomela basanga l’alako; ko ifokama la Bolimo w’olotsi, o lima likunju ja nyango ekae.

¹⁶ Ko ifokengola bouke w’ana ba Yisalaele ele Yawe Nzakomba ekiyo.

¹⁷ Ko ifocwa nda joso j’elongi ea Yawe nd’olimo la mpamba e’Eliya, ko ifokengola betema bi’aise el’ana, ko l’iy’atendola botendo ele wanya wa liongi; wae ende aeleza Yawe botonga w’anto bandelama.

¹⁸ Ko Zekalaya aokela ekima ea loola, Emi njifea joi line ngamo? likambo, emi nde engambe, ko waji’okami aokit’ekota mongo.

¹⁹ Ko ekima aoloamba, aokela, Emi nde Ngabaliele, ondemala nda joso ja Nzakomba; njotomama wae nkosangele, ko nkoyele bosako’one w’olotsi.

²⁰ Ko bala, wifoyala lokisi, ko ofaotefeleya, elaka nko mbile ee baoyi’ane okelama, eki we ntawimeza baoyi’akami bandiela nd’ekeke ea bako.

²¹ Ko banto baolendeza Zekalaya, ko baokamwa, eki’nd’otemaka nd’ilombeya Nzakomba.

²² Aki’nd’olaka, ntatefeleya l’iyo; ko baolokotola wete aolen’enelo nd’ilombe ya Nzakomba: ko aolatumya la ntaza, ko aoyala lokisi.

²³ Koko aki bembile bia ekambelo ekae osilaka, aocwa nd’ilombe ikae.

²⁴ Nd’afeka ba bembil’eko, Elisabeta waji’okae aolotswa jemi; ko aolisama nsanza itano, aokela,

²⁵ Yawe aonkeela ngone nda mbile eki’nd’onjenaka, wae aimole nsoi ekami el’anto.

²⁶ Nda nsanza e’otoa, ekima ea loola etangema Ngabaliele aotomama lim’ele Nzakomba nda Nazaleta bonanga wa Ngalilaya,

²⁷ ele bomoto otafoalana la jende, oki l’elaka wae ayale waji ow’onto otangema Yosefa, oki ow’ilongo ya Dawidi; ko lina j’omot’oko liki Malia.

²⁸ Ko ekima aolotswa el’ende, ko aokela, Ekemo ele we, ondena boya boleki, Yawe ale la we.

²⁹ Lolo aokakaana l’etefelo eko, ko aokakaza elenge ea wuo boko.

³⁰ Ko ekima ea loola aokela, Tawokake booma, Malia; ewela oata boya lim’ele Nzakomba.

³¹ Ko bala, wifotswa jemi nda likunju like, ko wifoota bona owa jende, ko wifoila lina likande Yesu.

³² Ende ifoyalema ow’onene, ko ifotangema Bona owa Oleki ndekola: ko Yawe Nzakomba ifoka ende ngwende eki ise ekae Dawidi:

³³ ko ifesanya ilongo ya Yakoba bikeke la bikeke; ko likulaka likae lifaosukela nye.

³⁴ Ko Malia aokel’ekima, Joi line lifokelama ngamo? el’emi mpeana la jende.

³⁵ Ko ekima aolamba, aokela, Bolimo w’olotsi ifoy’ele we, ko mpamba ea Oleki ndekola ifokokuka; nd’ewel’eko, ende ow’oeko ootswa ifotangema Bona owa Nzakomba.

³⁶ Ko bala, Elisabeta eoto eke, aofoswa ngoko jemi ja bona owa jende nd’ekota ekae, ko ene wete nsanza e’otoa l’ende otaotaka.

³⁷ Ewela wae nko joi lim’ele Nzakomba lisamba mpamba.

³⁸ Ko Malia aokela, Bala, em’one bokwala owa Yawe; kela joi likelame el’emi o ng’otefela we. Ko ekima aolimana el’ende.

³⁹ Ko Malia aolemala nd’embil’eko, ko aocwa nda bise bia ngongo la loangu, nd’onanga’omo wa Yudea;

⁴⁰ ko aolotswa nd’ilombe ya Zekalaya, ko aoluola Elisabeta.

⁴¹ Koko aki Elisabeta okaka wuo wa Malia, bona aotamba nda likunju likae; ko Elisabeta aokama la Bolimo w’olotsi;

⁴² ko aotefela la lofoso ja lonene, aokela, We, osakema l’okako el’amato, ko bona owa likunju like aosakema l’okako.

⁴³ Ko joi line joy’el’emi lima nko? wae nyango ea Nkolo ekami aoya el’emi?

⁴⁴ Ko bala, aki lofoso ja wuo boke okita nd’atoi bakami, bona aotamba nda likunju likami l’osalangano.

⁴⁵ Ko ow’ekemo wae ende ondimezaki; ele baoyi basangemaki el’ende la Yawe bifiela.

⁴⁶ Ko Malia aokela, Botema bokami bokumya Yawe,

⁴⁷ Ko bolimo bokami bosalangana la Nzakomba Boikyi’okami,

⁴⁸ El’ende aolena boola wa bokwala’okae ow’omoto; Ko bala, lim’aeyoko biotswelo biuma bifontanga ow’ekemo.

⁴⁹ Eki owa mpamba ankeelaka baoyi b’anene; Ko lina likae jouzama nd’oeko.

⁵⁰ Ko isei ikae ile nk’ele biotswelo la biotswelo O nk’el’iyo bandoang’Ende.

⁵¹ Aoleneya mpamba la lo lokae; Aofalanganya ba-eloloko nda nkai ya betema’ekiyo.

⁵² Aokiteza bana b’akulaka lima ngwende ikiyo, Ko aosangya banto bafa la lokumo.

⁵³ Aokinza banto ba nzala la toma t’olotsi, Ko aolitanya baaci la bakata o mpampa.

⁵⁴ Aokambya Yisalaele bosali’okae, Wae ende aofw’isei

⁵⁵ Ele Abalayama la lioci likae bikeke la bikeke, (Ngoki’nd’osangelaka baise’akiso).

⁵⁶ Ko Malia aoyala la Elisabeta nga nsanza isato, ko aoluta nd’ola bokae mongo.

⁵⁷ Ko ekeke ea Elisabeta ea mbaota eokita, ko aotaki bona owa jende.

⁵⁸ Ko basingitana l’ende la bioto bikae baoloka wete Yawe aofulez’ende isei ikae, ko baosalangana l’ende.

⁵⁹ Aki mbile ea mwambi okite, bayaki oten’ona nsonge, ko iyo baokela wae boil’ende lina Zekalaya, wae lina ja ise ekae.

⁶⁰ Ko nyango ekae aolamba, aokela, Afa ngoko; lolo ifotangema Yoane.

⁶¹ Ko baokela, O nk’eoto ekinyo otangema lina line.

⁶² Ko baoluola ise ekae la ntaza, lina lilang’ende wete boile.

⁶³ Ko ende aolet’onkanda, ko aokota, Lina likande lile Yoane. Ko iy’auma baokamwa.

⁶⁴ Ko bomwa’okae boumbwa nkako, ko loleum lokae lotungwa, ko aotefela, aomemya Nzakomba.

⁶⁵ Ko booma bokwel’ant’auma bafetsaki ntutama l’iyo; ko baoyi’ane bauma baokumyama nda bise bia ngongo bia Yudea biuma.

⁶⁶ Ko bant’auma bandokaki baoyi’ako baofonga nd’etema’ekiyo, baokela, Na, bon’one ifoyalema ngamo? Eki likata ja Yawe l’ende.

⁶⁷ Ko ise ekae Zekalaya aokama la Bolimo w’olotsi, ko aotela lotelo, aokela,

⁶⁸ Imemya ele Yawe, Nzakomba ea Yisalaele; Eki’nd’obizaka banto’akae, ko aolasikola.

⁶⁹ Ko aotemaza boikyi owa mpamba Nd’ilongo ya bosali’okae Dawidi,

⁷⁰ (Ngoki’nd’otefelaka la bomwa w’ateli’akae b’oeko baki lim’iango),

⁷¹ Wae atoikya lim’aini bakiso, ko lima likata j’ant’auma batina tu;

⁷² Wete Ende aeneya baise’akiso isei, Ko aofwa elaka ekae e’oeko;

⁷³ Bokolo boki’nd’olembelaka Abalayama, ise ekiso,

⁷⁴ Ende atokaya wete, asikw’iso lima likata ja baini’akiso, tosael’ende nko bofolu,

⁷⁵ La liongi la njelama nda joso likae bembile’ekiso beuma.

⁷⁶ Onde, ko we, bona, wifotangema boteli owa Oleki ndekola: Ele we wifocwa nda joso j’elongi ea Nkolo oongya mboka ekae;

⁷⁷ Wifoka banto’akae njea ea loiko La ntungola ea beketo bekiyo bi’obe

⁷⁸ Nd’ewela ea botema w’isei wa Nzakomba ekiso, Ko ekyelo ea jefa eotokyela lim’aliko,

⁷⁹ Efuw’el’iyo bakit’ase nda wilima la lililingi j’iwa; Wete atumya bakak’akiso mboka ea kuci.

⁸⁰ Ko bona aosekwa, ko aokema nd’olimo, ko aki nda bitekeleke elaka nko mbile ea enyelo ekae ele Yisalaele.