Zizieziziewɔlɩa Zozii pala 'lɛ Zaan na 'la ‑afluwaa 6 - Le Nouveau Testament en langue Dida

'Bhlabhlɩcoa ya ‑afluwaa kalɩlɩɛ bhɔ

¹ Na, n ya 'bhlabhlɩcoa 'lɩ, ɛ ya ‑afluwaa 'la ‑bɛka -buziimyua 'dɛ -sa. Daa ɛ sʋʋ 'lɛ na, n ya mlaa ‑nmɔɔnaa 'la ‑bɛka ‑naanɛa neen 'nu, ɛ yaan ‑gaa le saa gude gba 'lɛ na 'nyɩ ɛ ya 'cla lebhe: «Ci!»

² N ya kope 'nyɩ n ya ‑kpangɔ 'pɔpʋ 'lɩ. Ɔmɔa ‑ɔ ‑gbɛa 'mʋʋ 'lɛ 'kʋ na, ɔ ‑kaa janbluu wlɩɩn. Ma yɔɔ nyɩbhɛlɩkpoonkpo 'nyɩ, 'nyɩ ‑sɩanyɔ ‑naa ya mʋ le ɔ 'ka ‑awlɛ ‑sɩa.

³ 'Nyɩ 'bhlabhlɩcoa ya ‑mɔsɔ ‑buziinyua 'dɛ ‑sa. Daa ɛ ‑sʋʋ 'lɛ 'dɛ na, n ya ‑mɔsɔ mlɛa neen 'nu, ɛ yaan ‑gaa 'nyɩ ɛ ya claa lebhe: «Ci!»

⁴ Na, ‑buun ‑kpangɔ bhlo ya ‑zɔn 'wlʋ, ʋ ‑zaa le ‑kosu ‑zalʋ. 'Nyɩ ɔmɔa ‑ɔ ‑gbɛa 'mʋʋ 'lɛ 'kʋ na, ma yɔɔ ‑jioli 'nyɩ le ɔ ‑sa pupue ‑dʋdʋa 'kʋ ɩya ncɛlɩ 'ka 'bhlabhlalɩ. Na, ma yɔɔ ‑baandu wlɩɩn zʋ.

⁵ 'Nyɩ 'Bhlabhlɩcoa ya ‑mɔta ‑buziinyʋaa ‑afluwaa 'kʋ ‑sa. Daa ɛ ‑sʋʋ 'lɛ na, n ya ‑mɔta mlɛa neen 'nu, ɛ yaan ‑gaa 'nyɩ ɛ ya 'cla lebhe: «Ci!» 'Nyɩ n ya ‑kpangɔ kpʋa 'lɩ. Ɔmɔa ‑ɔ ‑gbɛa 'mʋʋ 'lɛ 'kʋ na, ɔ ‑kaa ‑bɩɔlʋʋ wlɩɩn.

⁶ 'Nyɩ n ya ‑blɩɩzɔn bhlo 'nu le saa ncaablɩɩzɔn ‑kʋ 'lɛ na, ʋ 'wlʋlʋa mlaa ‑nmɔɔnaa sidiin 'nyɩ ʋ claa 'lɛ lebhe: «'Blee ‑kiloo bhlo ‑kanɩ clɩɩ bhlo 'la lobholi 'la dluuplʋdala 'nyɩ 'ɔlʋzʋ ‑kiloo ‑mɔta ‑kanɩ 'lɛ clɩɩ bhlo 'la lobholi 'la dluuplʋdala. ‑Ma ‑ɔ ‑glɩ 'lɛ 'kpʋa ɩya ‑diinvɛɛan na, ‑naa klɩɩ cɩ.»

⁷ 'Nyɩ 'bhlabhlɩcoa ya ‑nmɔɔna ‑buziinyua ‑afluwaa 'kʋ ‑sa. Daa ɛ ‑sʋʋ 'lɛ 'dɛ na, n ya ‑nmɔɔna mlɛa neen 'nu, ɛ yaan ‑gaa 'nyɩ ɛ ya 'cla lebhe: «Ci!»

⁸ Na, n ya pulupulukpangɔ 'lɩ. Ɔmɔa ‑ɔ ‑gbɛa 'mʋʋ 'lɛ 'kʋ na, ma lɔɔ «'Kwɩ» 'nyɩ 'kuduku gɩlɩa 'mɔɔ 'lɛ. Na, ma yɩɩ ‑dʋdʋa 'kʋ 'la ncɛlɩa 'la ‑nmɔɔna klea, ‑jioli 'kʋ 'nyɩnɩ le ɩ 'plɩlɩ tʋ, ŋɔmʋ, 'bhlabhlagu ɩya mlanyinyi 'kʋ ɩya ɩ 'bhla maa.

⁹ 'Nyɩ 'Bhlabhlɩcoa ya ‑ngbi ‑buziinyua ‑afluwaa 'kʋ ‑sa. Daa ɛ ‑sʋʋ 'lɛ 'dɛ na, n ya maa ma 'bhlaa 'lɛ, Laagɔ 'la wɔɔnyɩtʋa ɩya ‑danʋfʋɛa ma lia 'lɛ na 'la gbʋ na 'la 'wugwia gʋgwlagbatɩa ‑zɔn 'lɩ.

¹⁰ Ɩ ‑gaa nɩkplaan 'nyɩ ɩ claa lebhe: «‑Kplɔkplɔcanyɔ, ‑mɔa ‑ɔ ‑glɩ 'lɛ 'titia na, clɩɩ saa 'kʋ 'titi ‑n ‑cɩ kaa 'lɛ ‑ala 'tɩtɩa ‑pla ɩya ‑n kaa 'lɛ ‑ala ‑dolua ‑ʋ 'kɔsɔ 'lɛ sa na 'la kpaa ‑dʋdʋa 'kʋ 'la ncɛlɩa 'kʋ -salɩ bha?»

¹¹ Na ma ya nclɔɔ nclɔɔ lokwi 'pɔpʋɛ 'nyɩ, 'nyɩ ma ya maa 'cla lebhe ma kla ka ‑awlɛ pɔlɛ 'pɛpɛ ‑aan ɩya maa ‑ɔya maasɔ lobho 'lɛ ɩya ma bholiecɩa, ma cɩ 'ka 'lɛ maa 'bhisa 'kʋ 'bhla na 'la nea 'ka 'kʋjɔɔ.

¹² 'Nyɩ daa 'bhlabhlɩcoa ‑sa 'lɛ ‑ngbʋflʋ ‑buziinyua ‑afluwaa 'kʋ na, n ya ‑dʋdʋa 'lɩ 'nyɩ ʋ ya gbasa tɩtɛlɩ. 'Ylʋbhuoa ya 'tutupla le lokwi kpʋɛ 'bhisa 'nyɩ cabhuoa ‑tɛtɛa ya 'plɩ le ‑dolu 'bhisa.

¹³ ‑Zɔlʋa ya ‑laagɔɔn 'wlʋ ʋ ya ‑dʋdʋ 'kʋ bhli le saa 'figisua ‑bubo 'dɩdɔ 'lɛ na 'la 'caa ‑a 'ta 'lɛ ‑glɛɛ na bhli 'lɛ na.

¹⁴ ‑Laagɔɔn ya 'dɛ 'wlʋ le saa ma gigieli 'lɛ ‑afluwa 'nyɩ ma saa 'lɛ 'dɛ na. 'Kikia ‑tɛtɛa ɩya 'lekpua ‑tɛtɛa ya ‑daa 'kʋ 'wlʋ.

¹⁵ 'Nyɩ ‑dʋdʋa 'kʋ 'la nyɩbhɛlɩa, 'ŋlɩkalɩnyaa, 'sojatocɩa, ‑zaakalɩnyaa ɩya ‑kwletocɩa, geye ɩya ‑ncɩkalɩnya, maa ‑tɛtɛa ya 'kikia ɩya cɔkʋ 'kadɩa 'la kofua nɩkplaan zizie.

¹⁶ 'Nyɩ ma claa 'kikia ɩya cɔkʋ 'kadɩa lebhe: «A bhlili ‑anyɩ 'wlu ɩya a zizie ‑anyɩ ɩya ‑a 'la ka ɔmɔa, ‑ɔ ‑kʋ 'lɛ nyɩbhɛlɩkpoa 'kʋ sa na 'la 'klʋa 'ciinlɩ ɩya 'bhlabhlɩcoa 'la dɔgbɛa 'la ka ‑anyɩ 'kʋ ŋeni.

¹⁷ Sa ɔla dɔgbɛa 'la ‑clɩɩkadiea ya ŋeni 'nyɩ ncaasaa ‑ɔ -cɩ kɔɔ 'lɛ 'ci 'kʋ 'nylugolɩɛ mino bha?»