Zozi Klisi 'la Dɩnanɩa Makɩ zie 'lɛ na 1 - Le Nouveau Testament en langue Dida

'Nyuwluzʋnyɔ Zaan 'la wɔɔnyɩtʋ

¹ 'Lɩka Laagɔ 'la 'Cʋa ‑ɔ ‑glɩ 'lɛ Zozi Klisi na, 'la Dɩnanɩa* 'la bhɔlʋda.

² Laagɔnekʋnyɩtɛnyɔ* Izayii 'la ‑afluwaa nɩkplaan, ɩ ‑zieo lebhe: «'Lɩka, n lobhu 'na dɩfanyɔa le ɔ pʋɔ 'kʋklʋʋn ɩya ɔ 'ka ‑naa ‑gugwiea bhɔsʋa.

³ ‑Blɩɩzɔn bhlo ‑gaan 'pʋpʋa nɩkplaan, ʋ cla lebhe: A bhɔsʋa ‑Kwlenyɔ 'la ‑gugwiea. A ‑sɔɔ ‑gugoa ‑ɩ 'nylugolu 'lɛ 'kʋ na!»

⁴ Na, 'Nyuwluzʋnyɔ Zaan ya ci, ɔ ‑kʋa 'pʋpʋa nɩkplaan, ɔ zʋa ncɛlɩ 'nyu 'wlu 'nyɩ ɔ nyɩtɛa 'nyuwluzʋlɩɛa ‑ɩ ‑glɩ 'lɛ kwlacalalɩɛ 'nyɩ ‑ɩ bhɔsʋa 'lɛ nyinyi 'la valɩɛ na, 'la cɩa wɔlɩ.

⁵ Zudeebhlɩa 'kʋ 'la ncɛlɩa ɩya Zolizalɛmʋnyaa 'fɩan, ma mʋa 'mɔɔ 'bhlɩ, ma wlaa mala nyinyia ‑zɔn 'nyɩ Zaan zʋa maa 'nyu 'wlu Zludɛɛnnyidɔlʋa nɩkplaan.

⁶ Zaan -plaa ‑samoo 'la cɩa 'nyɩa 'la lokwi nɩkplaan, 'nyɩ mlakubɛtʋ ‑pɩaa 'lɛ ɔla kɔa. 'Kuolɛglɩbholinya ɩya 'kɔnʋngʋ ‑glɩa 'lɛ ɔla lilinyɩ.

⁷ Ɔ 'claa maa lebhe: «Ɔmɔa ‑ɔ ciin 'lɛ leen na, ɔ ‑ka 'tɛtɩ ɔ ziin 'kʋ 'nyɩ ‑amʋ n 'ta 'kʋŋwa le n kwlili sa ɩya n ‑blulu ɔla ‑gbanbʋɩa 'la 'bhlia.

⁸ ‑Amʋ, 'nyu nɩkplaan n zʋlʋ 'lɛ anyɩ 'nyu 'wlu, ‑ma ɔmɔ, ‑Kplɔkplɔ ‑Wugoa* nɩkplaan ɔ cɩ 'ka 'lɛ anyɩ 'nyu 'wlu zʋlʋ.»

Zaan ya Zozii 'nyuwluzʋ 'nyɩ gɔzɛ yɔɔ gbɩɩncla

⁹ 'Dɛ 'la clɩɩa nɩkplaan, Zozii ya Galileebhlɩa 'kʋ 'la 'dua ma la 'lɛ Nazalɛtɩ na, 'kʋ 'wlʋ 'nyɩ Zaan yɔɔ 'nyu 'wlu zʋ Zludɛɛnnyidɔlʋa nɩkplaan.

¹⁰ Daa ɔ ‑kʋa 'lɛ 'nyia nɩkplaan 'wlʋda na, ɔ ya ‑laagɔɔn 'lɩ, ɩ ya 'gbokalɩ 'nyɩ ‑Kplɔkplɔ ‑Wugoa*, 'dablee 'bhisa, yɔɔ 'kʋ kwlili.

¹¹ 'Nyɩ ‑blɩɩzɔn bhlo ya ‑laagɔɔn 'wlʋlʋ, ʋ claa lebhe: «‑Mɔ ‑glɩ 'lɛ 'na ‑wawacoa, ‑mɔ nɩkplaan n ‑zʋɔ 'lɛ 'na pɔlɛkʋmɛnɔa ‑tɛtɛa.»

¹² 'Kplookʋ, ‑Kplɔkplɔ ‑Wugoa yɔɔ 'pʋpʋa nɩkplaan fa.

¹³ Clɩɩ ‑gwlɩɩ ‑mɔsɔ, 'yɛpɩ 'pʋpʋa nɩkplaan, Sataan* yɔɔ gbɩɩncla. Ɔ ‑kʋa mla ‑nyinyi sidiin 'nyɩ Laagɔ 'la 'bhlaandleecɩa* lobhoa 'mɔɔ.

Zozii 'la ‑bɛkagɩlɩnyaa

¹⁴ Daa ma bhli 'lɛ Zaan 'kʋ 'nyɩ ma 'pɔɔ 'lɛ ‑palʋʋn na, Zozii ya Galileebhlɩa 'kʋ mʋ 'nyɩ ɔ saa Laagɔ 'la Dɩnanɩa*.

¹⁵ Ɔ claa lebhe: «Clɩɩa ‑ɩ ‑zʋɔa 'lɛ na, ɩ ya ŋeni 'nyɩ Laagɔ 'la Nyɩbhɛlɩdua* ya cɩ mɛ. A cala kwla ɩya a ŋonu a 'ma Dɩnanɩa.»

¹⁶ Daa Zozii ‑kʋa 'lɛ Galilee 'la 'nyia cɩ 'plɩlɩda na, ɔ ya Simɔɔn ɩya ɔ bholi Andlee 'lɩ, ma paa ‑dada, sa ma ‑glɩa ‑zliibhlanya na.

¹⁷ Ɔ ya maa 'cla lebhe: «A gɩlɩɩn ɩya n 'kanɩ anyɩ ncɛlɩ 'la jlinya ple.»

¹⁸ 'Kplookʋ, ma ya mala ‑dadɩa cɩɩnwlʋlʋ 'nyɩ ma yɔɔ gɩlɩ.

¹⁹ Daa ɔya maasɔ mʋ 'lɛ 'pɛpɛ 'kʋklʋʋn na, ɔ ya Zebedee 'la 'cuoa ‑mɔsɔa, Zakɩ ɩya ɔ bholi Zaan 'lɩ. Ma ‑kʋa mala gɔlʋa nɩkplaan 'nyɩ ma tʋndʋa mala ‑dadɩa.

²⁰ 'Kplookʋ, ɔ ya maa la, ma ya dɩpɩa ma to Zebedee ɩya ɔla lobholinʋnyaa gɔlʋa nɩkplaan te 'nyɩ ma yɔɔ gɩlɩ.

Zozii ya nclɔɔ bhlo 'wugo ‑nyunyu nɩkplaan ‑sa

²¹ Zozii ɔya ɔla gɩlɩnyaa* ya Kapɛnayumʋdua 'kʋ mʋ. Zifʋnyaa* 'la nyɔkwɛclɩɩa* 'kʋ, ɔ ya mala bhibhiepalʋa* ‑zɔn ble 'nyɩ ɔ caa.

²² Ɔla cacawɔlɩa ya ncɛlɩa 'fɩan nikpoo ‑sla, sa ɩ ‑kaa 'tɛtɩ 'nyɩ ɩ 'taa ‑kʋ le ‑jlɩmaazienyaa* 'la calɩɛa.

²³ 'Kplookʋ, 'wugonyunyunyɔ bhlo ya ble. Ɔ ya nɩkplaan ‑gaa 'nyɩ ɔ ya 'cla lebhe:

²⁴ «Nazalɛtɩ 'la Zozii, 'lɩsaa nʋkan ‑n cia 'lɛ ‑anyɩ bha? Ka ‑n ci 'lɛ le ‑n ka ‑anyɩ 'pʋpʋa kʋ ‑sa bha? ‑Amʋ n ‑ci nclɔɔa ‑n ‑glɩ 'lɛ na. ‑Mɔ ‑ɔ ‑glɩ 'lɛ Laagɔ 'la ‑Kplɔkplɔnyɔa ɔ lobhu 'lɛ na!»

²⁵ Zozii ya 'wugo ‑nyunyua 'wlugaalɩ 'nyɩ ɔ yʋʋ 'cla lebhe: «Mɛ ‑naa nea ɩya ‑n 'wlʋ nclɔɔ ‑naa nɩkplaan.»

²⁶ 'Wugo ‑nyunyua ya nclɔɔa 'dɩdɔ gbasa 'nyɩ 'kasɛpalɩɛɛn, ʋ yɔɔ nɩkplaan 'wlʋ.

²⁷ Neen ya maa 'fɩan yɛ 'nyɩ ma 'claclalɩa neen lebhe: «Wɔlɩ saa 'titi ‑ɩ ‑kʋa 'lɛ ‑sa bha? 'Lɩka calɩɛ ‑leli, ‑ɩ ‑ka 'lɛ 'tɛtɩ na. Ɔ nyɩtɛ ɔ solu 'wugwi ‑nyinyi 'nyɩ ɩla 'nyiyio.»

²⁸ 'Kplookʋ, ɔla 'ŋlɩ ya Galileebhlɩa 'kʋ daa ‑tɛtɛa dlolu.

Zozii ya guzenya ‑bhutukpa jabha

²⁹ Daa Zozii ɩya ɔla gɩlɩnyaa* 'wlʋ 'lɛ Zifʋnyaa* 'la bhibhiepalʋa* ‑zɔn na, 'kplookʋ, maya Zakɩ ɩya Zaan ya Simɔɔn ɩya Andlee 'bhisleen mʋ.

³⁰ Wɔtlɩ bhlaa Simɔɔn 'wʋtlɔ 'nyɩ ɔ pʋʋa. 'Kplookʋ, ma ya sɛɛ Zozii solu.

³¹ Ɔ yɔɔ cɩ mʋ, ɔ yɔɔ sɔ 'kʋbhli, ɔ yɔɔ 'nylugolu, wɔtlɩa yɔɔ 'ciin 'wlʋ 'nyɩ ɔ ya maa lobholɩɛ bhɔ.

³² Daa 'ylʋ mʋ 'lɛ na, ma ya Zozii guzenyaa ɩya 'wugwinyinyinyaa 'fɩan ‑la.

³³ Dunyaa 'fɩan ya 'sligbinea 'kʋ 'wluwlalɩ.

³⁴ Ɔ ya ncaabhutukpa, gu ‑mizimizi 'bhlaa 'lɛ na, jabha 'nyɩ ɔ ya 'lɛ 'wugwi ‑nyinyi ‑bhutukpa 'tli. Ɔ 'nyɩ 'taa 'wugwi ‑naa ‑jioli ‑ylɛylɛ le ɩ nyɩtɛa, sa ɩ ‑cia nclɔɔa ɔ ‑glɩa 'lɛ na.

Zozii 'plɩlɩ Galileebhlɩa 'kʋ

³⁵ ‑Zʋkpaziplia, Zozii ya 'kʋbho, ɔ ya ‑zɔnwlʋ, ɔ ya daa ‑ɩ ‑kʋ 'lɛ ɩcɩɩn na mʋ le ɔ 'ka bhibhie.

³⁶ Simɔɔn ɩya ɔ 'yea ya 'kʋbho 'nyɩ ma yɔɔ 'matɩkan mʋ.

³⁷ Daa ma 'lɩɔ 'lɛ na, ma yɔɔ 'cla lebhe: «Ncɛlɩa 'fɩan 'matɩɔ.»

³⁸ ‑Ma ɔ ya maa 'cla lebhe: «‑A 'wlʋ ‑da ɩya ‑a mʋ 'dia ‑ɩ ‑mɛɛ 'lɛ ‑anyɩ cɩ na 'kʋ ɩya n 'ka 'yɛpɩ ‑ma Laagɔ 'la Dɩnanɩa* ‑salɩ, sa ɩla gbʋ dɛ n 'wlʋ 'lɛ ‑zɔn.»

³⁹ Ɔ 'plɩlɩa Galileebhlɩa ‑tɛtɛa 'kʋ 'nyɩ Zifʋnyaa* 'la bhibhiepalɩa* ‑zɔn, ɔ saa Dɩnanɩa 'nyɩ ɔ tlia 'wugwi ‑nyinyia.

Zozii ya kokobhebhlanyɔ jabha

⁴⁰ Kokobhebhlanyɔ bhlo ya Zozii 'bhlɩ ci, ɔ yɔɔ ‑deliin ‑kukoonkplii sasla 'nyɩ ɔ yɔɔ 'cla lebhe: «‑N ‑ka ‑wa na, ‑n cɩɩn jabha.»

⁴¹ Nclɔɔa 'la gbɩa ya Zozii ŋaazɩ ‑pla, ɔ ya sɔɔn ‑glɔ, ɔ yɔɔ cɩkla 'nyɩ ɔ yɔɔ 'cla lebhe: «N ‑wa, 'maa jabha!»

⁴² 'Kplookʋ, kokobhea yɔɔ cɩ 'wlʋ 'nyɩ ɔ ya jabha.

⁴³ Dɩpɩa bhlogbɩɩ, Zozii yɔɔ 'cizalalɩ 'nyɩ ɔ yɔɔ 'cintalɩ.

⁴⁴ Ɔ yɔɔ 'cla lebhe: «‑Naa solua wɔlɩ ‑naa nclɔɔ bhlogbɩɩ, ‑ma mʋ, pala ‑ncɩ ‑teyiyinyɔa, ‑sa lɩɩa Moyizi 'clalɩ 'lɛ na ɩya ma 'ka dɩpɩa ‑danʋfʋɛ lili lebhe ‑n ya ‑zaagbʋsa jabha.»

⁴⁵ ‑Ma daa ɔ 'wlʋ 'lɛ ‑zɔn na, ɔ ya ɩmɩa ‑ɩ 'plɩlɩa 'mɔɔ 'lɛ 'kʋ na, ncɛlɩ 'dɩkʋsalɩ. Ɩmɩ 'wluku na, Zozii mino 'taanɩa ɩya ɔ 'ka ncaacikʋ 'du nɩkplaan ble. Dɩa ‑ɩ -kʋ 'lɛ ɩcɩɩn na ‑tɛɛ ɔ ‑kʋanɩa 'lɛ 'nyɩ ncɛlɩ 'wlʋlʋa 'lɛ daa ‑tɛtɛa ma cia 'mɔɔ 'lɛ 'bhlɩ.