Zozi Klisi 'la Dɩnanɩa Matie zie 'lɛ na 8 - Le Nouveau Testament en langue Dida

Zozii ya kokobhebhlanyɔ bhlo jabha

¹ Daa Zozii 'wlʋ 'lɛ 'kikea 'wlu 'nyɩ ɔ kwli 'lɛ na, ncaabhutukpa yɔɔ gɩlɩ.

² Kokobhebhlanyɔ bhlo yɔɔ cɩmɛ, ɔ yɔɔ ‑deliin ‑kukoonkplii sasla 'nyɩ ɔ yɔɔ 'cla lebhe: «‑Kwlenyɔ, ‑n ‑ka ‑wa na, ‑n cɩɩn jabha.»

³ Zozii ya sɔɔn ‑glɔ, ɔ yɔɔ cɩkla 'nyɩ ɔ ya 'cla lebhe: «N ‑wa, 'maa jabha!» 'Kplookʋ, kokobhea yɔɔ cɩwlʋ.

⁴ Na, Zozii yɔɔ 'cla lebhe: «‑Naa solua wɔlɩ ‑naa nclɔɔ bhlogbɩɩ, ‑ma mʋ ‑n pala ‑ncɩ ‑teyiyinyɔa ɩya ‑n ‑sa lɩɩa Moyizi 'clalɩ 'lɛ na ɩya ma 'ka dɩpɩa ‑danʋfʋɛ lili lebhe ‑n ya ‑zaagbʋsa jabha.»

'Soja ‑gwlɩɩ ‑ngbi to bhlo 'la pɔɔtɛtɛ

⁵ Daa Zozii ‑kʋa 'lɛ Kapɛnayumʋdua nɩkplaan bleda na, 'soja ‑gwlɩɩn ‑ngbi to bhlo yɔɔ cɩmɛ, ɔ ya zɩzla

⁶ 'nyɩ ɔ yɔɔ 'cla lebhe: «‑Kwlenyɔ, 'na lobhoco ‑pʋʋ 'yɛpɩ 'sleen, ɔ ya bhubhu 'nyɩ 'kwlɩ 'kadɩ bhɩɔ.»

⁷ Zozii yɔɔ 'cla lebhe: «‑Amʋ, n cɩ mʋ, n cɩɔ jabha bha?»

⁸ ‑Ma 'soja ‑gwlɩɩ ‑ngbi toa yɔɔ 'cla lebhe: «‑Kwlenyɔ, n 'ta 'kʋŋwa lebhe ‑n ble n 'bhisleen. ‑Ma nyɩtɛ wɔɔkle bhlogbɩɩ ‑tɛɛ ɩya 'na lobhocoa 'ka jabha.

⁹ Sa ‑amʋ titi, n ‑kʋ 'na 'kʋklʋʋnpʋnyaa 'la ‑kwlelie ‑zɔn 'nyɩ ‑amʋ ‑ma n ‑kwle 'lɛ 'soja. N 'cla bhlo lebhe: Mʋ, 'nyɩ ɔ mʋ, n cla ‑anɔ bhlo lebhe: Ci, 'nyɩ ɔ ci. 'Nyɩ n cla 'na lobhoco lebhe: Nʋ ‑sa, 'nyɩ ɔ nʋ sɛɛ.»

¹⁰ Daa Zozii 'nuo 'lɛ neen na, nikpoo yɔɔ sla 'nyɩ ɔ ya maa ‑ɔ gɩlɩa 'mɔɔ 'lɛ na, 'cla lebhe: «N solu anyɩ, ɩ ‑glɩ ‑nʋawlɛ: Izlayɛlɩbhlɩa* 'kʋ, n 'ta ka ‑azla ‑sa 'la pɔɔtɛtɛ nclɔɔ ‑ylɛylɛ nɩkplaan 'lɩlɩ.

¹¹ ‑Awlɛ, n cla anyɩ lebhe daa ncaabhutukpa cɩ 'ka daa ‑tɛtɛa 'wlʋlʋ ɩya maya Ablaamʋ, Izakɩ ɩya Zakɔpʋ 'ka 'lɛ ‑laagɔɔn 'la Nyɩbhɛlɩdua* nɩkplaan, 'tlɔnblɩ 'kʋ dabhlo lili na,

¹² ma cɩ 'ka Nyɩbhɛlɩdua 'la ‑ajaalinyaa ‑jlukuun 'la 'tutua nɩkplaan 'pa, gbazɩa ma tu 'lɛ 'nʋgbʋ 'nyɩ ma li 'lɛ ‑glaa slo na.»

¹³ Na, Zozii ya 'soja ‑gwlɩɩ ‑ngbi toa 'cla lebhe: «Cɔlɔ ‑n 'bhisleen ɩya ɩmɩa ‑n 'clalɩ 'lɛ na, 'naa ‑naa pɔɔtɛtɛa ‑glalɩɩ 'kʋ.» 'Nyɩ 'dɛ 'la 'ŋwacɩa bhlogbɩɩ 'kʋ, lobhocoa ya jabha.

Zozii ya Pɩɛlɩ 'wʋtlɔ ɩya guzenya jabha

¹⁴ Zozii ya Pɩɛlɩ 'bhisleen mʋ, ɔ ya Pɩɛlɩ 'wʋtlɔ 'lɩ, wɔtlɩ bhlaa 'mɔɔ nyɩ ɔ pʋa.

¹⁵ Ɔ yɔɔ cɩkla 'nyɩ wɔtlɩa yɔɔ 'ciinwlʋ. Na, ɔ ya 'kʋbho 'nyɩ ɔ yɔɔ lobholɩɛ bhɔ.

¹⁶ 'Ylʋ mʋ 'lɛ na, ma yɔɔ 'wugwinyinyinya ‑bhutukpa ‑la. Ɔ ya nyɩtɛ, ɔ ya 'wugwi ‑nyinyia 'tli 'nyɩ ɔ ya guzenyaa 'fɩan jabha.

¹⁷ 'Lɩka ‑sa Laagɔnekʋnyɩtɛnyɔ* Izayii 'la niwɔlɩa ‑glalɩ 'lɛ 'kʋ: Ɔ ya ‑anyɩ ala 'kwlɩbhɩɛa kʋ ‑sa 'nyɩ ɔ ya 'lɛ ‑ala 'bhlabhlagua 'la ‑tobhua ‑slo.

Zozii 'la gɩlɩlɩɛ 'la cɩa wɔlɩ

¹⁸ Zozii 'lɩ 'lɛ lebhe ‑alawlee ‑didioa 'mɔɔ na, ɔ ya ɔla gɩlɩnyaa* 'cla lebhe ma 'tɔ 'nyi.

¹⁹ ‑Jlɩmaazienyɔ* bhlo yɔɔ cɩmɛ 'nyɩ ɔ yɔɔ 'cla lebhe: «Canyɔ, daa ‑tɛtɛa ‑n ‑cɩ ka 'lɛ mʋ na, n cɩɔ gɩlɩ.»

²⁰ Zozii yɔɔ 'cla lebhe: «‑Daazlii ‑ka 'bhukwi 'nyɩ ‑laagɔɔn 'la libhlia ‑ka 'lɛ ‑palɩ. ‑Ma Nclɔɔa 'Cʋa* 'ta ɔla 'wlua 'la zʋlʋda ‑ka.»

²¹ Gɩlɩnyaa nɩkplaan bhlo yɔɔ 'cla lebhe: «‑Kwlenyɔ, 'nyɩɩn ‑jioli ɩya n 'ka mʋ, n 'ka n to zizie 'fɩɔn.»

²² ‑Ma Zozii yɔɔ 'cla lebhe: «Gɩlɩɩn ɩya ‑n 'talɩ 'kua 'cin ɩya ɩ zizie ɩla 'kua.»

Zozii ya ‑bubo ‑dʋdʋ 'kʋ ‑la

²³ Zozii ya gɔlʋa nɩkplaan 'tɔ 'nyɩ ɔla gɩlɩnyaa* yɔɔ 'kʋgɩ.

²⁴ Na, ‑Bubo 'kadie ya 'nyia 'kʋtaan 'ma 'nyɩ 'nyigaagbɩa 'matɩa le ɩ 'kaa gɔlʋa 'kʋmlaa. ‑Ma, Zozii, ɔmɔ ɔ ŋɔmʋa.

²⁵ Gɩlɩnyaa yɔɔ cɩmɛ, ma yɔɔ galɔ 'nyɩ ma yɔɔ 'cla lebhe: «‑Kwlenyɔ, ci ‑anyɩ 'kʋ, ‑ma ka ‑a ku 'lɛo!»

²⁶ Ɔ ya maa 'cla lebhe: «'Lɩsaa 'la gbʋ ŋanɔ bhlaa 'lɛ ‑sa anyɩ bha? Ala pɔɔtɛtɛa 'ta 'ghli!» 'Nyɩ ɔ ya 'nylugo, ɔ ya ‑buboa ɩya gea 'wlugaalɩ 'nyɩ daa ‑tɛtɛa ya 'cɩɩplɩ.

²⁷ Na, nikpoo ya maa 'fɩan sla 'nyɩ ma claa lebhe: «Ncaasaa nclɔɔ ‑naa ‑glɩa 'lɛ 'nyɩ ‑bubo ɩya ge 'titio nyɩɔ 'lɛ 'klʋ bha?»

Zozii ya 'Wugwinyinyinya ‑mɔsɔ jabha

²⁸ Daa Zozii 'tɔ 'lɛ 'nyia 'nyɩ ɔ ŋeni 'lɛ Gadaghlenɩɛnnyaa 'la 'bhlɩa 'kʋ na, 'wugwinyinyinya ‑mɔsɔ ya lesikpaa nɩkplaan 'wlʋlʋ 'nyɩ ma yɔɔ 'bɩɩncili. Mala danyunoa 'la gbʋ, nclɔɔ ‑ylɛylɛ mino 'taanɩa 'dɛ 'la ‑gugwiea 'kʋ 'plɩlɩlɩɛ.

²⁹ Na, 'wugwi ‑nyinyia ya nɩkplaangalɩɛ bhɔ 'nyɩ ɩ claa lebhe: «Laagɔ 'la 'Cʋ, wɔɔsaa ‑ɔ ‑kʋa 'lɛ ‑a ‑yɔɔsɔ ‑gbaaglɩɩn bha? Ka ‑n ci 'lɛ ‑da le ‑n ka ‑anyɩ gbaylɩ ‑sa 'fɩɔn ɩya clɩɩa ‑ɩ ‑zʋɔ 'lɛ na, 'ka ŋeni bha?»

³⁰ Bhuzikpa 'kadie ‑kʋa 'dɛ 'la ‑dɩklea 'nyɩ a lia.

³¹ Na, 'wugwi ‑nyinyia ya Zozii bhibhie 'nyɩ ɩ yɔɔ 'cla lebhe: «Gbazɩ ‑n ‑ka ‑anyɩ 'tli na, 'maa falɩ ‑anyɩ bhuzikpaa nɩkplaan.»

³² Ɔ yɩɩ 'cla lebhe: «A mʋ!» Ɩ ya ‑zɔnwlʋ 'nyɩ ɩ ya bhuzia nɩkplaan slo. 'Nyɩ bhuzikpaa ‑tɛtɛa ya 'kikea 'wlu 'wlʋ, a ya 'nyia nɩkplaan 'kɔsɔ 'nyɩ a ya 'kʋmla.

³³ Na, bhuzia 'la kpanyaa ya 'gu, ma ya duku mʋ 'nyɩ ma ya ɩmɩa ‑tɛtɛa ɩya 'wugwinyinyinyaa ‑mɔsɔa 'la wɔlɩa 'dɩkʋsalɩ.

³⁴ 'Nyɩ 'dunyaa ‑tɛtɛa ya ‑zɔnwlʋ 'nyɩ ma ya Zozii 'bɩɩnmʋnʋ. Daa ma 'lɩɔ 'lɛ ‑jaa na, ma yɔɔ 'wlusla le ɔ 'wlʋ mala 'bhlɩa 'kʋ!