Zozi Klisi 'la Dɩnanɩa Luku zie 'lɛ na 20 - Le Nouveau Testament en langue Dida

'Nda Zozii 'la ‑kweliea 'wlʋlʋa 'lɛ bha?

¹ Clɩɩ bhlo Zozii ‑kʋa Laagɔpaakadiea* ‑zɔn, ɔ caa 'nyɩ ɔ saa 'lɛ ncɛlɩa Dɩnanɩa*. Na, ‑teyiyinyaa tocɩa ɩya ‑jlɩmazienyaa* ‑ya ncaakpasɩaa ya ci.

² Ma yɔɔ neencla lebhe: «Solu ‑anyɩ, ‑jioli saa nɩkplann ‑n nʋnʋa 'lɛ ‑anɩ ‑naa bha? 'Nyɩ ncaasaa ‑ɔ 'nyɩɔ 'dɛ 'la ‑jiolia bha?»

³ Zozii ya maa neenŋonu lebhe: «‑Amʋ ‑ma, n 'ka anyɩ wɔɔkle bhlo neencla. A solu kaan,

⁴ 'Nyuwluzʋnyɔ Zaan 'la 'nyuwluzlulɩɛa, ‑laagɔɔn ɩ 'wlʋlʋ 'lɛ bha? ‑Ma ncɛlɩ wlɩɩn bha?»

⁵ Na, maa bhlobhlo ya gugu, 'nyɩ ma yaa 'cla lebhe: «Gbazɩ ‑a ‑ka 'cla lebhe: ‑Laagɔɔn na, ɔ cɩ 'ka 'cla lebhe: 'Nyɩ 'lɩsaa 'la gbʋ a 'taa 'lɛ ɔla wɔlɩa ‑nʋawlɛ bha?

⁶ 'Nyɩ ‑a ‑ka 'cla lebhe: Ncɛlɩ wlɩɩn na, ncɛlɩa ‑tɛtɛa cɩ ‑anyɩ cɔkʋʋn bhutili. Sa, ma ‑lio ‑danʋfʋɛ le Zaan ‑glɩa Laagɔnekʋnyɩtɛnyɔ na.»

⁷ Na, ma ya Zozii neenŋonu lebhe: «‑A 'ta ‑ci.»

⁸ 'Nyɩ Zozii ya maa 'cla lebhe: «‑Amʋ ‑ma, 'n solu 'ta anyɩ ‑jiolia nɩkplaan n nʋnʋ 'lɛ ɩmɩ ‑naa na.»

‑Ghlɛzɛɛnkwlaklʋlɩnya 'la ‑nyandla

⁹ Na, Zozii ya ‑nyandlaa ‑naa bu 'nyɩ ɔ ya ncɛlɩa solu lebhe: «Nclɔɔ bhlo ya ‑ghlɛzɛɛnkwla golo, ɔ yaa lobholinʋnya wlɩɩn zʋ le ɔya maasɔ 'ka poli 'nyɩ ɔ ya lowluun mʋ le 'ka 'yɛpɩ ‑gwlɛlɩ.

¹⁰ Daa ‑ghlɛzɛɛnsadaa ŋeni 'lɛ na, ɔ ya ɔla lobhoco bhlo 'kwlaa 'la 'klʋlɩnyaa 'bhlɩ lobhu le ma 'kaa ‑ghlɛzɛɛncaa ɔla da 'nyɩ. ‑Ma 'kwlaa 'la 'klʋlɩnyaa yɔɔ bhuti 'nyɩ ma ya ɔya wlɩɩ ‑kɔfɩa 'tli.

¹¹ Ɔ ya ‑awlɛ ‑buunlobhoco bhlo lobhu. Ɔmɔ ‑ma, ma yɔɔ bhuti, ma yɔɔ vla 'nyɩ ma ya ɔya wlɩɩ ‑kɔfɩa 'tli.

¹² Ɔ ya ‑awlɛ ‑mɔta ‑naanɔ lobhu, 'nyɩ ɔmɔ ‑ma, ma yɔɔ 'bhlabhlalɩ 'nyɩ ma yɔɔ 'tli.

¹³ Na, 'kwlaa toa ya ɔcɩ 'cla lebhe: 'Lɩsaa n cɩ 'kaa 'lɛ nʋ bha? Ka n cɩ 'ka 'lɛ 'na ‑wawacoa lobhu. Ɔmɔ, ma cɩ sɛɔ zʋ.

¹⁴ ‑Ma, daa lobholinʋnyaa 'lɩ 'lɛ 'cʋa na, maa bhlobhlo ya wɔɔgugwie 'lɩ, 'nyɩ ma ya macɩ 'cla lebhe: Ɔmɔ ‑ɔ ‑glɩ 'lɛ ‑ajaalinyɔa. ‑A 'bhlɔɔ ɩya ‑ajaa 'ka ‑a 'na 'plɩ!

¹⁵ Ma yɔɔ 'kwlaa 'la glɔa leen 'pa 'nyɩ ma yɔɔ 'bhla. Na, 'lɩsaa 'kwlaa toa cɩ 'kanɩ 'lɛ maa nʋ bha?

¹⁶ Ka ɔ cɩ 'ka 'lɛ ci, ɔ 'ka 'lɛ lobholinʋnyaa ‑naa 'bhla ɩya ɔ 'ka 'lɛ 'kwlaa ‑buunnaanʋa 'nyɩ.» Daa ma 'nu ɩmɩ ‑naa na, ma yɔɔ 'cla lebhe: «‑Wɔɔ ɩ cɩ 'ta sɛɛ 'plɩ 'pʋpʋ 'kʋ!»

¹⁷ ‑Ma Zozii ya maa 'ciinkope ‑aan 'nyɩ ɔ ya maa 'cla lebhe: «Ziewɔlɩaziewɔlɩa 'la wɔɔkle ‑naa ‑a cla 'lɛ lebhe: Cokwiea ‑paaslanyaa 'pa 'lɛ 'kwlaan na, ɛmɛ ‑ɛ 'plɩ 'lɛ ‑palʋa 'la lopolugbuducokwiea na, 'nsasa a sasalɩa 'lɛ ‑zɔn bha?

¹⁸ Nclɔɔa ‑ɔ ‑cɩ ka 'lɛ cokwie ‑naa 'kʋ bhlili na, ɔ cɩ 'kɔtɔkɔtɔlʋ. 'Nyɩ ɔmɔa ɛ cɩ 'ka 'lɛ 'kʋ bhlili na, ɛ cɩɔ su.»

¹⁹ Na, ‑jlɩmaacanyaa ɩya ‑teyiyinyaa tocɩa 'matɩa le ma 'kaa ‑mɔɔ dɩpɩa 'titi bhlogbɩɩ 'kubhlili, ‑ma ma ya ncɛlɩa 'la ŋanɔ 'gulu. Ma yaa sɛɛ cibhlili wɩaan le mala gbʋ Zozii bua 'lɛ ‑nyandlaa ‑naa.

Sezalɩ 'la ‑lapooa

²⁰ Na, ma dɩdɛa Zozii. Ma yɔɔ 'bhlɩ ncɛlɩa ‑ɔ nʋa 'lɛ lesaa ma ‑glɩa 'lɛ 'kʋnylugolunya na, lobhu le ma kaa 'mɔɔ 'gbuzu ‑zɔn 'paa ɩya ma 'kɔɔ goonvlaa ‑deliin fa.

²¹ Ma yɔɔ wɔɔkle ‑naa neencla lebhe: «Canyɔ, ‑a ‑ci sɛɛ le ɩmɩa ‑n nyɩtɛ 'nyɩ ‑n ca 'lɛ na, ɩ ‑glɩ ‑nʋawlɛ. ‑N ‑pla 'ta ncaatɩtɩ, ‑ma Laagɔ 'la ‑gugwie n pala 'lɛ ncɛlɩ ‑nʋawlɛ nɩkplaan.

²² Na, ‑jioli ‑nyɩɔ ‑anyɩ le ‑a ‑plʋ nyɩbhelʋ Sezalɩ 'la ‑lapooa bha? ‑Ma ‑a 'la ‑plʋ bha?»

²³ Zozii ya mala ‑kplakplaa cibhlili 'nyɩ ɔ ya maa 'cla lebhe:

²⁴ «A palakan ‑da 'dala. Ncaasaa 'la 'wlukle ɩya ɔla ŋlɩɩ ‑ɩ ‑kʋa 'lɛ 'kʋ bha?» Ma yɔɔ neenŋonu lebhe: «Sezalɩ 'nɩ»

²⁵ Na, Zozii ya maa 'cla lebhe: «'Dɛndlana, a 'nyɩnɩ Sezalɩ lʋʋa ‑ʋ ‑glɩ 'lɛ Sezalɩ 'nʋ na, ɩya a 'nyɩnɩ Laagɔ lʋʋa ‑ʋ ‑glɩ 'lɛ Laagɔ 'nʋ na.»

²⁶ 'Nyɩ mala wɔlɩ tɔɔ 'kʋzilɩɛ mino, 'bhlɩnyaa 'ci kʋ. Na, nikpoo ya maa sla, neenŋonulɩɛa ɔ 'nyɩa 'lɛ maa na, 'la gbʋ 'nyɩ ma 'taanɩa ne 'lɩ ɩya ma 'ka nyɩtɛ.

'Kwɩɩnkʋbhue 'la cɩa wɔlɩ

²⁷ Na, Saduseyɛɛnnya* ‑zlʋsaasa ya Zozii ŋeni. Saduseyɛɛnnyaa cla le 'kwɩɩnkʋbhue 'ta ‑kʋ. Ma ya Zozii wɔɔkle ‑naa neencla lebhe:

²⁸ «Canyɔ, Moyizi ya ‑ala gbʋ zie lebhe: Gbazɩ nclɔɔ ‑ka ɔ bholia ‑ɔ cɩɩ 'lɛ 'ŋlɔ na ‑ka 'nyɩ ɔ ‑ka 'ku 'nyɩ ɔ 'ta 'cuo te na, 'naa ɔ 'cɩ 'kuzluŋlɔa ɩya ɔ 'nyɩ ɔ bholia valɩnɩkpla.

²⁹ Na, bholiecɩ ‑ngbɔɔsɔ ‑kʋa. ‑Bɛka ‑naanɔa ya 'ŋlɔ 'cɩ, ‑ma ɔ 'ta 'cilee valɩ 'nyɩ ɔ ya 'lɛ 'ku.

³⁰ ‑Mɔsɔ ‑naanɔa

³¹ ɩya ‑mɔta ‑naanɔa ‑ma, ya 'ŋlɔa 'cɩ, 'sɛtɛɛ bhlogbɩɩ ‑aan 'nyɩ maa ‑ngbɔɔsɔsɔa 'ta cilee valɩ 'nyɩ ma ya 'ku.

³² Bhɩalɩdaa, 'ŋlɔa ‑ma, ɔ ya 'ku.

³³ Na, ŋlɔ ‑naa, ‑masa maa ‑ngbɔɔsɔa yɔɔ 'lɛ 'cɩ na, ma ‑ka 'kwɩɩnkʋbho na, maa nɩkplaan, ‑anɔsaa 'la ŋlɔɔ ɔ cɩ 'kakɩnɩ 'lɛ 'plɩ bha?»

³⁴ Zozii ya maa neenŋonu lebhe: «‑Laagɔzɔn ‑naa 'la ncɛlɩa, maa ‑ɔ cɩ 'lɛ 'ŋwlɛ ‑aana ŋodie.

³⁵ ‑Ma, maa Laagɔ 'lɩ 'lɛ lebhe maya 'pʋpʋkʋa ‑ɩ ci 'lɛ 'yɛpɩ ɩya 'kwɩɩnkʋbhue ‑ŋwaan 'kʋ na, maya 'cɩcɩɛ 'tanɩ wɔlɩ kalɩ.

³⁶ Ma cɩ 'tanɩ 'ku, sa ma kʋnɩ le 'bhlaandleecɩa* 'bhisa: Ma ‑glɩ Laagɔ 'la 'cuo, sa ma ya 'kwɩɩnkʋbho na.

³⁷ 'Nyɩ ‑ɩ ‑glɩ 'lɛ le 'ku cɩ 'ka 'kwɩɩnkʋbho na, Moyizi 'titi yɩɩ sua ‑ʋ ŋama 'lɛ na 'la cɩa wɔlɩa nɩkplaan pala, daa ɔ la 'lɛ ‑Kwlenyɔa Ablaamʋ 'la Laagɔ, Izakɩ 'la Laagɔ ɩya Zakɔpʋ 'la Laagɔ na.

³⁸ Laagɔ 'ta 'ku 'la Laagɔ ‑glɩ, ‑ma ‑jajanya 'la Laagɔ, sa la gbazɔ, maa 'fɩan ‑ja na.»

³⁹ ‑Jlɩmaazienya* ‑zlʋsaasa ya wɔɔnyɩtʋ 'ma 'nyɩ ma ya 'cla lebhe: «Canyɔ, ‑n ya 'nanɩ nyɩtɛ.»

⁴⁰ 'Nyɩ ma 'nyiglili 'taanɩa macɩ ɩya ma 'kaanɩa 'mɔɔ wɔlɩ bhlogbɩɩ neencla.

Laagɔ 'la ‑Sasanyɔa ɩya Daviti

⁴¹ Na, Zozii ya maa neencla lebhe: «'Lɩsaa 'la gbʋ ma cla 'lɛ lebhe Laagɔ 'la ‑Sasanyɔa* ‑glɩ Daviti 'la 'cʋ bha?

⁴² ‑Masa Daviti 'titi, ɔ cla labhblɩfluwaa nɩkplaan lebhe: ‑Kwlenyɔ ya 'na ‑Kwlenyɔa 'cla lebhe: Kʋʋn 'lipasɔ 'kʋ sa

⁴³ ɩya n 'ka ‑naa ‑zɔbhɛlɩgbanyaa, ‑naa 'kʋnamʋnʋlʋʋ ple.

⁴⁴ 'Nyɩ Daviti lanɩɔ 'lɛ ‑Kwlenyɔ na, 'nsasa ɔ ‑glɩglɩlɩnɩ ‑awlɛ 'lɛ ɔla 'cʋ bha?»

A 'la nʋa ‑jlɩmaazienyaa 'bhisa

⁴⁵ 'Bhlɩnyaa ‑tɛtɛa ‑ɔ poa 'mɔɔ 'lɛ 'nyukwliin na 'ci 'kʋ, Zozii ya gɩlɩnyaa* 'cla lebhe:

⁴⁶ A zʋlʋ ‑jlɩmaazienyaa* pɔlɛ 'kʋ. Ma pla lokukadɩ nɩkplaan 'nyɩ mayɩɩsɩ ‑wa bilie, ma ‑wa le, 'clikpua nɩkplaan, ma 'pa maa ‑ayo 'nyɩ ma ‑wa bhibhiepalɩa* ‑zɔn ɩya 'tlɔnblɩ 'kʋ, 'kʋklʋunkpua 'kʋ sakʋlɩɛ.

⁴⁷ Ma ‑ɔ li 'lɛ 'kuzluŋwlɛ 'kʋ 'nyɩ ‑ɔ nʋ 'lɛ bhibhie ‑bliiblii nʋlɩɛ le ma 'ka maa 'lɩmʋ na, ma cɩ 'ka gbaylɩsalɩɛ 'kadie 'lɩ.