Zozi Klisi 'la Dɩnanɩa Luku zie 'lɛ na 14 - Le Nouveau Testament en langue Dida

Zozii ya ‑awlɛ nclɔɔ bhlo nyɔkwɛclɩɩa 'kʋ jabha

¹ Zifʋnyaa 'la nyɔkwɛclɩɩ* bhlo 'kʋ, Zozii ya Falizɩɛnnyaa* ma to bhlo 'bhisleen ble le ɔ 'kaa li. Ma kopea 'mɔɔ 'ciin 'cɩɩ.

² 'Nyɩ 'lɩka guzenyɔ bhlo ‑ɔ ‑ghlɩa 'lɛ na, ‑kʋa 'mɔɔ 'ci 'kʋ.

³ Na, Zozii ya wɔɔnyɩtʋ ma 'nyɩ ɔ ya ‑jlɩmaacanyaa ɩya Falizɩɛnnyaa neencla lebhe: «‑Jioli ‑kʋ le ma jabha guzenyɔ nyɔkwɛclɩɩa 'kʋ bha, ‑ma ɩ 'ta ‑kʋ bha?»

⁴ ‑Ma 'ma ‑sa 'taa ne. Na, Zozii ya guzenyɔa 'ma, ɔ yɔɔ jabha 'nyɩ ɔ yɔɔ 'cintalɩ le ɔ mʋ.

⁵ 'Nyɩ ɔ ya maa neencla lebhe: «Anyɩ sidiin, ‑anɔsaa ɔ ‑yowli ‑aana ɔla bhlii kaa 'lɛ nyɔkwɛclɩɩa 'kʋ, 'gbojlobhukuun bhlili 'nyɩ ɔ cɩ 'tɔɔ 'lɛ ‑aana ɔ cɩ 'tɛɛ 'lɛ 'yɛpɩ ‑sa 'kplookʋ bha?»

⁶ ‑Ma ma 'ta mino ma 'kɔɔ neenŋonulɩɛ ‑ylɛylɛ 'nyɩ.

‑Naa 'matɩa 'kʋklʋʋnkpo 'la 'kʋsakʋlɩɛ

⁷ Na, Zozii 'lɩ le lalanyaa 'tɩtɔa 'kʋklʋʋnkpua na, ɔ ya ‑nyandla bhlo bu 'nyɩ ɔ ya maa 'cla lebhe:

⁸ «Ma ‑kɔɔ 'cɩcɩɛnʋtlɔnblɩ 'kʋ la na, ‑naa mʋa 'kʋklʋʋnkpo 'kʋ sakʋkan, ma ‑ka sɛ nclɔɔa ‑ɔ zio 'lɛ 'kʋ na la na,

⁹ ɔmɔa ‑ɔ la 'lɛ anyɩ na, ɔ 'la kɔɔ 'cla lebhe: ‑Bho 'kʋ ɔ 'ka sakʋ. Ɩya ‑n ‑ya ‑zo 'la ka leen kpoa 'kʋ sakʋkan mʋ.

¹⁰ ‑Ma gbazɩ ma ‑kɔɔ la na, mʋ leen kpoa 'kʋ, ‑n kʋ sa ɩya ɔmɔa ‑ɔ lɔɔ 'lɛ na, ɔ ‑ka ci na, ɔ 'kɔɔ 'cla lebhe: N 'nagɔ, ‑bho 'kʋ, ‑n ci 'kʋklʋun. Na ɩ cɩ 'kɔɔ 'klʋgba, maa 'fɩan ‑n ‑ya maasɔ ‑kʋ 'lɛ 'tlɔnblɩa 'kʋ na, 'ci 'kʋ.

¹¹ Sa ncaatʋtʋʋntʋa ‑ɔ to 'lɛ ɔcɩ 'kʋ na, ma cɩɔ ‑dʋdʋ 'kʋ ‑la 'nyɩ ɔmɔa ‑ɔ la 'lɛ ɔcɩ ‑dʋdʋ 'kʋ na, ma cɩɔ 'kʋto.»

A lamʋ ŋaazɩnya 'tlɔnblɩ 'kʋ

¹² Na, Zozii ya ɔmɔa ‑ɔ laa 'mɔɔ 'lɛ 'tlɔnblɩa 'kʋ na, ‑masɛɛ 'cla lebhe: «Gbazɩ ‑n ‑ka 'tlɔnblɩ sapalɩ na, dɩdɩ ‑aana 'ylʋvao, ‑naa laa ‑n 'nagwɩɛcɩ, ‑n bholiecɩ, ‑naa 'slinya, ‑aana ‑naa cɩkʋnyaa ‑ɔ ‑lio 'lɛ 'bhɛlɩ na, ma 'la kasɛɔ lamʋ ɩya ma 'la ‑kɔɔ mɩ cala.

¹³ ‑Ma gbazɩ ‑n ‑ka 'tlɔnblɩ sa palɩ na, la ŋaazɩnya, 'bhlɛnya, bhɩbhlinya, 'citutunya

¹⁴ ɩya 'nyupalɩɛ 'kɔɔ ŋeni, sa ma 'ta lʋʋ ‑ka ɩya ma 'kɔɔ cala na. ‑Ma Laagɔ cɩ kɔɔ mɩ 'kʋnylugolunyaa 'la 'kwɩɩnkʋbhoclɩɩa 'kʋ cala.»

Lalanyaa 'la ‑nyandla

¹⁵ Na, maa ‑ɔyɔɔsɔ ‑kʋa 'lɛ 'tlɔnblɩa 'kʋ na, mala nɩkplaan bhlo, daa ɔ 'nu 'lɛ wɔlɩ ‑naa na, ɔ ya Zozii 'cla lebhe: «Ɔ ‑kʋ 'nanɩ, ɔmɔa ‑ɔ ‑cɩ ka 'lɛ Laagɔ 'la Nyɩbhɛlɩdua* nɩkplaan 'la 'tlɔnblɩa 'kʋ kʋmʋ na!»

¹⁶ ‑Ma Zozii yɔɔ 'cla lebhe: «Nclɔɔ bhlo ya 'tlɔnblɩ 'kadie sapalɩ 'nyɩ ɔ ya ncaabhutukpa la.

¹⁷ Daa nyɩa 'la liŋwacɩa ŋeni 'lɛ na, ɔ ya ɔla lobhocoa lobhu le ɔ 'claa lalanyaa lebhe: A ci! ‑Ma lɩɩa ‑tɛtɛa ya ‑bhɔsʋɔ.

¹⁸ Na, maa 'fɩan ya nebhlogbɩɩ 'wluslalɩɛ bhɔ. ‑Bɛka ‑naanɔa ya lobhocoa 'cla lebhe: N ya 'na 'kwla ‑pɩa, na n ‑fata le n mʋa kopekan. N bhibhieo 'clɔɔ le n sla 'wlu.›

¹⁹ ‑Anɔ bhlo nabhe: Bhlii 'kʋgba ‑pɩada n wlʋ 'lɛ, na ka n mʋɩ 'lɛ nɩkplaan clakan. N bhibhieo 'clɔɔ le n slawlu

²⁰ ‑Anɔ bhlo ‑masɛɛ nabhe: 'Cɩcɩɛ nʋda n wlʋ 'lɛ, ɩla gbʋ na, 'n cɩ 'ta mino ɩya n 'ka ci.

²¹ Daa lobhocoa cɔlɔ 'lɛ na, ɔ ya ɔ toa 'dɩ ‑la. Dɔgbɛ ya 'sletoa pla 'nyɩ ɔ ya ɔla lobhocoa 'cla lebhe: Mʋ 'faanfan 'clikpua nɩkplaan ɩya ‑kpomua 'kʋ, ɩya ‑n lamʋ ‑da ŋaazɩnyaa, 'bhlɛnyaa, 'citutunyaa ɩya bhɩbhlinyaa.

²² Na, lobhocoa ya ci 'nyɩ ɔ ya 'cla lebhe: ‑A to, saa ‑n soluun 'lɛ na, ɩ ya nʋɔ, ‑ma sakʋdɩ ‑kʋ ka.

²³ 'Sletoa ya lobhocoa 'cla lebhe: Mʋ ‑gugoa 'kʋ ɩya 'kwlɩa nɩkplaan, nʋ saa 'fɩan ncɛlɩ ble ɩya ɩ 'na 'slea 'ka ye.

²⁴ Na, n solu anyɩ, ‑bɛka ncɛlɩa n laa 'lɛ na, mala sidiian bhlogbɩɩ cɩ 'taa 'na nyɩa limʋ.»

Te ‑tɛtɛa 'fɩan ɩya ‑n ka Zozii gɩlɩ

²⁵ Ncaabhutukpa gɩlɩa Zozii. Ɔ ya kwlacala 'nyɩ ɔ ya maa 'cla lebhe:

²⁶ «Gbazɩ nclɔɔ ‑kaan cili 'nyɩ ɔ 'taan wabha ɩya ɔ 'ka ɔ to, ɔ 'nɔ, ɔ nʋŋlɔ, ɔla 'cuo, ɔ bholiecɩ, ɔ mɛɛncɩ ɩya ɔmɔ 'titi ɔla jabhʋa 'kʋ zi na, 'ɔ cɩ 'ta 'na gɩlɩnyɔ* 'plɩ.

²⁷ 'Nyɩ ɔmɔa, ‑ɔ cɩ 'ta 'lɛ ɔla dabhlalɩsua bhɛ ɩya ‑ɔ kaan gɩlɩ na, 'ɔ cɩ 'ta mino ɩya ɔ 'ka 'na gɩlɩnyɔ 'plɩ.

²⁸ ‑Masa anyɩ sidiin, ‑anɔsaa ‑ɔ ‑ka 'lɛ ‑wa le ɔ 'ka 'kʋtootopalʋ 'sla, ɔ kʋ 'ta 'lɛ sa 'nyɩ ɔ bu 'ta 'lɛ 'dala ɔ ‑ka 'lɛ na 'fɩɔn ɩya ɔ 'ka 'lɩ ɩ ‑ka ‑kʋ le a cɩ lobholia 'wluko na bha?

²⁹ ‑N 'ta sɛɛ na, gbazɩ ɔ ‑ka ‑palʋa ‑gluu zʋ 'nyɩ ɔ 'tʋʋ bhɩalɩlɩɛ mino na, ncɛlɩa 'fɩan ‑ɔ cɩ kɔɔ 'lɛ 'lɩ na, ka ma cɩ kɔɔ 'lɛ nyanɩ

³⁰ ɩya ma 'ka 'cla lebhe: 'Lɩka nclɔɔ bhlo, ɔ ya 'slalɩɛ bhɔ, ‑ma ɔ 'ta bhɩalɩlɩɛ mino!

³¹ ‑Aana nyɩbhɛlʋ saa, ‑ɔ ‑ka 'lɛ ‑anɔ bhlo tʋ fada ‑kʋ, ‑ɔ kʋ 'ta 'lɛ sa 'fɩɔn ɩya ɔ 'ka 'lɩ ɩ ka ‑kʋ le ɔya ncaatabhli 'kʋgba cɩ ɔmɔa ɔya ncaatabhli ‑glʋʋ cilio 'lɛ gbatlɩ na, mino na bha?

³² ‑N 'ta sɛɛ na, daa ‑anɔa ‑kʋ ka 'lɛ 'koonkoon na, ɔ lobhuo nclɔɔ 'kʋ le ɔ 'clalɩ pupue.

³³ 'Sɛtɛɛ bhlogbɩɩ ncaatʋtʋʋntʋa, anyɩ sidiin, ‑ɔ cɩ 'ta 'lɛ ‑tɛtɛa 'fɩan ɔ ‑ka 'lɛ na, 'cintalɩ na, 'ɔ cɩ 'ta mino ɩya ɔ 'ka 'na gɩlɩnyɔ 'plɩ.

³⁴ ‑Ghɛɛ, ‑glii ‑glɩ ‑lʋʋ 'nanʋ, ‑ma gbazɩ ‑glii 'titi ‑kanɩ 'dʋʋn 'wlʋ na 'lɩsaa ma cɩ 'ka 'lɛ 'ma ɩya ma 'kanɩɩ 'dʋʋn zʋ ‑awlɛ bha?

³⁵ Ɩ 'tanɩ ‑dʋdʋ 'la da nanɩ naa, ɩ 'tanɩ gologololɩɩ guoon zʋda nanɩ. Ka ma pɩɩ 'lɛ ‑jlukuun. Na, ɔmɔa ‑ɔ ‑ka 'lɛ 'nyukwli le ɔ 'ka 'nu na, 'naa ɔ 'nu.»