Zozi Klisi 'la Dɩnanɩa Luku zie 'lɛ na 13 - Le Nouveau Testament en langue Dida

A 'ta kwlacala na, a cɩ 'ku

¹ Na, 'dɛ 'la clɩɩa nɩkplaan, ncɛlɩ ya ci 'nyɩ ma ya Zozii, Galileenyaa, Pilatɩ 'cakalɩwa 'lɛ mala ‑dolua ɩya mala ‑teyiyimlaa 'nʋa na, 'la wɔlɩa 'dɩkʋsalɩ.

² Ɔ ya maa 'cla lebhe: «Ka a gugu 'lɛ le Galileenya ‑naa ‑glɩa nyinyinʋya 'kadɩ 'nyɩ ma zia ‑daa Galileenyaa 'fɩan 'kʋ, 'dɛ ‑sa 'la wɔlɩ ŋeni 'lɛ maa bha?

³ N claa anyɩ le ‑wɔɔ, ‑ma a 'ta kwlacala na, anyɩ ‑ma, anyɩa 'fɩan cɩ 'ka 'lɛ 'ku.

⁴ 'Nyɩ ncɛlɩ ‑naa 'kʋgba ‑ngbaata Silowee 'la 'kʋtotopalʋa bhliliwa 'lɛ 'wlu 'nyɩ ʋ 'bhla 'lɛ na, ka a gugu 'lɛ le mala ‑tobhua zia Zolizalɛmʋnyaa 'fɩan 'nʋa 'kʋ bha?

⁵ N claa anyɩ le ‑wɔɔ, ‑ma a 'ta kwlacala na, anyɩ ma, anyɩa 'fɩan cɩ 'ka 'ku.»

'Figisua ‑ʋ tlʋ 'ta 'lɛ na 'la ‑nyandla

⁶ 'Nyɩ Zozii ya ‑nyandlaa ‑naa bu 'nyɩ ɔ ya maa 'cla lebhe: «Nclɔɔ bhlo ‑kaa 'figisu, ʋ ‑goloa ɔla 'kwlaa nɩkplaan. Ɔ yʋʋ 'wlu 'ca 'matɩkan ci, ‑ma ɔ 'tɩɩ 'lɩ.

⁷ Na, ɔ ya 'kwla nɩkplaan 'la lobholinʋnyɔa 'cla lebhe: 'Lɩka ɩ nʋnɩ liowli ‑mɔta, n ci 'lɛ 'figisu ‑naa 'wlu 'caa 'matɩkan 'nyɩ n 'lɩ 'tɩɩ 'lɛ. Na 'dɩʋ. 'Lɩsaa 'la gbʋ ʋ cɩ 'ka ka 'lɛ ‑dʋdʋ 'kpɔkpɔ nyumo bha?

⁸ ‑Ma 'kwlaa 'la 'klʋlɩnyɔa yɔɔ 'cla lebhe: ‑A to, 'talɩ ka kʋʋ lio ‑naa 'cin ɩya n 'kʋʋ cɩ 'bhli ɩya n 'kʋʋ tɩtɔ guoon zʋ.

⁹ 'Kʋklʋʋn clɩɩa nɩkplaan ʋ cɩ sɛ tlʋ. N 'ta sɛɛ na 'nyɩ ‑n cɩnɩʋ 'dɩ.»

Zozii ya 'ŋlɔ bhlo nyɔkwɛclɩɩa 'kʋ jabha

¹⁰ Nyɔkwɛclɩɩ* bhlo 'kʋ, Zozii ‑kʋa bhibhiepalʋ* bhlo ‑zɔn 'nyɩ ɔ caa.

¹¹ 'Nyɩ 'lɩka, 'Ŋlɔ bhlo ‑kʋa 'dɛ, 'wugo ‑nyunyu ‑kʋa 'mɔɔ nɩkplaan 'nyɩ ʋ ‑bhubhua 'mɔɔ ‑aan liowli 'kʋgba ‑ngbaata. Ɔ ‑klua nɩkplaan 'nyɩ ɔ mino 'taa ɩya ɔ 'kaa 'nanɩ 'kʋ 'nylugolu.

¹² Na, daa Zozii 'lɩɔ 'lɛ na, ɔ yɔɔ la 'nyɩ ɔ yɔɔ 'cla lebhe: «'Ŋlɔ, ‑naa 'bhlɛa yɔɔ cɩ 'wlʋ.»

¹³ Ɔ yɔɔ sɩ 'kʋgbɛ: 'Kplookʋ ɔ ya 'kʋ 'nylugolu 'nyɩ ɔ ya Laagɔ ‑evliwolɩɛ bhɔ.

¹⁴ ‑Ma dɔgbɛ ya bhibhiepalʋatoa* pla, sa Zozii ya nyɔkwɛclɩɩa 'kʋ nclɔɔ jabha na. Ɔ ya wɔɔnyɩtʋ 'ma nyɩ ɔ ya ‑alawleea 'cla lebhe: «Clɩɩ ‑ngbʋflʋ ‑kʋ le nclɔɔ 'ka lobholi nʋ. Na, clɩɩ ‑naa 'kʋ 'ɩ ‑fata 'lɛ le a ci ɩya ma 'ka anyɩ jabha, ‑ma ‑n 'ta nyɔkwɛclɩɩa 'kʋʋ.»

¹⁵ ‑Kwlenyɔa yɔɔ neenŋonu lebhe: «Yooyoncɛlɩnyɩ, nyɔkwɛclɩɩa 'kʋ, anyɩa 'fɩan, nclɔɔ nclɔɔ ‑blulu 'ta ɔla bhlii ‑aana ɔla 'flumu, 'nyɩ ɔ fa 'tɛɛ 'nyumlakan bha?

¹⁶ 'Nyɩ ŋlɔ ‑naa ‑ɔ ‑glɩ 'lɛ Ablaamʋ 'la 'cʋ 'nyɩ Sataan* gʋa 'lɛ ‑aan liowli 'kʋgba ‑ngbaata 'wugo na, nyɔkwɛclɩɩa 'kʋ ɩ 'ta 'lɛ ‑fata le ma 'dɩa 'mɔɔ 'bhli bha?»

¹⁷ Ɔ 'bhli 'lɛ ‑sa 'kʋ na, ɔla ‑zɔbhɛlɩgbanyaa 'fɩan ‑zo ya maa pla 'nyɩ ‑alawleea 'fɩan nʋa ‑pɔpʋɛ ‑jakajakagbɩ ‑naa 'fɩan ɔ nʋa 'lɛ na 'la gbʋ.

‑Mutadɩsucie 'la ‑nyandla

¹⁸ Na, Zozii ya 'cla lebhe: «'Lɩsaa ‑kʋa 'lɛ le Laagɔ 'la Nyɩbhɛlɩdua* bha? 'Lɩsaa n 'cɩ 'kʋʋ 'lɛ palalɩ bha?

¹⁹ Ka ʋ ‑kʋ 'lɛ ‑mutadɩsuciea nclɔɔ ma 'lɛ 'nyɩ ɔ golo 'lɛ ɔla 'kwlaan na. Ɛ wlʋ, ɛ plɩ su 'nyɩ ‑laagɔɔn 'la libhlia sla ɩla ‑palɩ ʋla 'labhɩa nɩkplaan.»

²⁰ Ɔ ya ‑awlɛ 'cla lebhe: «'Lɩsaa n cɩ 'kaa 'lɛ Laagɔ 'la Nyɩbhelɩdua palalɩ bha?

²¹ Ka ʋ ‑kʋ 'lɛ le 'zɩa* 'ŋlɔ ma 'lɛ, ɔ zʋ 'lɛ ‑faliikpoongbɩ 'kadɩ ‑mɔta nɩkplaan 'nyɩ ɩ 'fɩan flu 'lɛ na.»

A bleli gbinicoa neen

²² Zolizalɛmʋ 'la ‑gugwiea 'kʋ, Zozii 'plɩlɩa dikadɩa ɩya dicʋa 'kʋ, 'nyɩ ɔ caa.

²³ Na, nclɔɔ bhlo yɔɔ neencla lebhe: «‑Kwlenyɔ, na ncaapɛ ‑tɛɛ cɩ 'ka 'lɛ gbʋʋnsalɩɛ 'lɩ bha?» Na, ɔ ya maa 'cla lebhe:

²⁴ «A 'sɩslɩlɩ ɩya a 'ka gbinicoa neen bleli, sa n solu anyɩ, ncaabhutukpa cɩ 'ka 'matɩ le ma 'ka ble, ‑ma 'ma cɩ 'ta mino.

²⁵ Daa 'sletoa cɩ 'ka 'lɛ 'kʋbho, ɔ 'ka gbinea kpaslɩlɩ ɩya a ‑ka 'lɛ ‑jlukuun ‑to na, dɛ a 'ka 'lɛ gbinea bhuti ɩya a 'ka 'cla lebhe: A to, kalɩ ‑anyɩ gbine ɩya ɔ 'ka anyɩ neenŋonu lebhe: Anyɩ, n 'ta anyɩ ‑ci.

²⁶ Na, cɩ 'ka 'cla lebhe: ‑A ‑yɔɔsɔ ya li, ‑a ya mla 'nyɩ n ya 'lɛ ala 'clikpua nɩkplaan calɩ.

²⁷ Ɩya ɔ 'ka anyɩ 'cla lebhe: N 'ta daa a 'nylugolu 'lɛ na ‑ci. A 'wlʋlʋʋn cɩɩn, anyɩa ‑tɛtɛa ‑ɔla nʋnʋnʋgbɩa 'ta 'lɛ 'kʋnylugolu na.

²⁸ Daa a cɩ 'ka 'lɛ Ablaamʋ, Izakɩ, Zakɔpʋ ɩya Laagɔnekʋnyɩtɛnyaa 'fɩan Laagɔ 'la Nyɩbhɛlɩdua* nɩkplaan 'lɩ ɩya anyɩ, ma 'ka 'lɛ anyɩ ‑jlukuun 'pa na, dɛ a cɩ 'ka 'lɛ 'nʋgbʋ 'tu ɩya a 'ka 'lɛ ‑glaaslo li.

²⁹ Na, ncɛlɩ cɩ 'ka 'daba 'kʋ, 'lipasɔ 'kʋ, 'wlu 'kʋ ɩya gozɔn 'wlʋlʋ ɩya ma 'ka Laagɔ 'la Nyɩbhɛlɩdua nɩkplaan 'la 'tlɔnblɩa 'kʋ ci.

³⁰ Na, 'lɩka ‑sa leenbhɩalɩ ‑naanʋa cɩ 'ka 'lɛ ‑bɛka ‑naanʋa 'plɩ ɩya ‑bɛka ‑naanʋa 'ka leenbhɩalɩ ‑naanʋa 'plɩ.»

Zozii nyɩtɛ Zolizalɛmʋdua 'la wɔlɩ

³¹ 'Dɛ 'la 'ŋwacɩa bhlogbɩɩ 'kʋ, Falizɩɛnnya* ‑zlʋsaasa ya Zozii cɩ mɛ 'nyɩ ma yɔɔ 'cla lebhe: «'Plɩ ‑n ka mʋ, 'wlʋ ‑da, sa Ewlɔdʋ 'matɩ le ɔ 'kɔɔ 'bhla.»

³² Ɔ ya maa 'cla lebhe: «A mʋ ɩya a 'cla ‑daazle ‑naa lebhe: 'Lɩka, ka n tli 'lɛ 'wugwi ‑nyinyi 'nyɩ n jabha 'lɛ ncɛlɩ ‑yaka ɩya ‑cɩpa, ɩya ‑mɔtazelia n ka 'na lobhlolia 'wluko.

³³ ‑Ma ɩ ‑fata le n bhli 'na ‑gugwiea ‑yaka, ‑cɩpa ɩya clɩɩa ‑ɩ gɩɩ 'lɛ 'kʋ na, sa Laagɔnekʋnyɩtɛnyɔ* cɩ ta mino ɔ 'ka ‑buundu 'kʋ 'kulu ɩ ka ‑kʋ le ‑n 'ta Zolizalɛmʋ na.

³⁴ Zolizalɛmʋ, Zolizalɛmʋ, ‑mɔa ‑ɔ 'nyɩ ‑ɔ vʋ 'lɛ maa Laagɔ lobhuo 'lɛ 'bhlɩ na cɔkʋ 'nyɩ ‑ɔ bhla 'lɛ Laagɔnekʋnyɩtɛnya* na, dɩzlʋsaa n 'taa 'lɛ wabhalɩ le n 'kaa ‑naa 'cuoa 'wluwlalɩ, le saa ‑gʋgɔ 'wlalɩ 'lɛ ʋla 'cuo ʋla ‑papua ‑zɔn 'wlu na bha? ‑Ma a 'ta ŋonu.

³⁵ Na 'lɩka, Laagɔ cɩ 'ka anyɩ ala ‑palʋa teli. 'Nyɩ n solu anyɩ lebhe: 'A cɩ 'ta kɩnɩɩn 'lɩ ‑aan ɩya clɩɩa 'kʋ a cɩ 'ka 'lɛ 'cla lebhe: 'Naa 'nyupalɩɛ ŋeni ɔmɔa ‑ɔ cili 'lɛ ‑Kwlenyɔ 'la 'ŋlɩa nɩkplaan na, ɩ 'ka ŋeni.»