Zozi Klisi 'la Dɩnanɩa Luku zie 'lɛ na 1 - Le Nouveau Testament en langue Dida

Wɔlɩa 'la gbʋa Luku zie 'lɛ na

¹ 'Klʋnyɔ Teofili, ncaabhutukpa ya nʋnʋgbɩa ‑ɩ 'plɩ 'lɛ ‑anyɩ sidiin, ɩla saa ɩ 'plɩplɩlɩ 'lɛ na, zielɩɛ bhɔ.

² Ma ya wɔlɩa zie, saa maa ‑ɔla 'ci 'lɩ 'lɛ bhɔdaa tooto 'nyɩ ‑ɔ 'plɩ 'lɛ Dɩnanɩa* 'la ‑sanya na, ma ‑salɩɩ 'lɛ ‑anyɩ 'dɩ 'kʋ na.

³ Ɩmɩ 'wluku na, ‑amʋ ‑ma, n ya ɩmɩa ‑ɩ 'plɩ 'lɛ bhɔdaa tooto na, 'nanɩ neencla 'nyɩ n ya ncɩ 'claa le n 'ka ‑naa gbʋ, saa ɩ 'plɩplɩlɩ 'lɛ na, ‑gbalɩɛɛn ‑gbalɩɛɛn zie, 'klʋnyɔ Teofili,

⁴ ɩya ‑n ka cibhlili le ɩmɩa ma cɔɔ 'lɛ na, ɩ ‑glɩ ‑nʋawlɛ.

Zakalii ɩya Elizabɛtɩ

⁵ 'Bhlɛsʋan nɩkplaan Ewlɔdʋ ‑glɩa 'lɛ Zudeebhlɩa 'kʋ 'la nyɩbhɛlʋ na, ‑teyiyinyɔ bhlo, ma laa 'mɔɔ Zakalii, ɔ ‑kʋa ‑teyiyinyɔ Abia 'la ‑kandea nɩkplaan. Ma laa ɔ nʋŋlɔ Elizabɛtɩ, ɔ glɩa ‑teyiyinyɔ ‑kpasa Awlɔɔn 'la valɩnɩkplaa nɩkplaan 'la 'ŋlɔ.

⁶ Zakalii ɩya ɔ nʋŋlɔ ‑glɩa 'kʋnylugolunya Laagɔ 'ci 'kʋ 'nyɩ ma 'plɩlɩa Laagɔ 'la ‑jlɩmaa ɩya ɔla niwɔlɩa ‑tɛtɛa ylɛɛylɛɛ 'kʋ.

⁷ ‑Ma ma 'taa 'cilee ‑ka, sa Elizabɛtɩ valɩ 'taa 'nyɩ maa ‑mɔsɔa ‑plaa kplɩɩ.

'Blaandlee ya Zakalii 'dɩ ‑la

⁸ Clɩɩ bhlo, Zakalii ‑kʋa Laagɔpaakadiea* ‑zɔn, 'nyɩ ɔ nʋa ɔla ‑teyiyilobholia, sa ɩ ‑glɩa ɔla ‑kandea 'la clɩɩ na.

⁹ Saa ‑teyiyinyaa nʋ ‑azla 'lɛ na, ‑nigbea ma paa 'lɛ le ma 'kaa nclɔɔa ‑ɔ cɩ ka 'lɛ bhibhiepalʋa* ‑zɔn ble ɩya ‑ɔ ka donyia ‑sie na cibhlili na, ya 'dɛ 'la clɩɩa 'kʋ, Zakalili 'kʋ bhlili.

¹⁰ Daa ɔ ‑kʋ 'lɛ donyia ‑sieda na, ncɛlɩa 'fɩan ‑kʋa ‑jlukuun 'nyɩ ma bhibhiea.

¹¹ Na, ‑Kwlenyɔ 'la 'bhlaandlee* bhlo ɔ ya Zakalii 'ciinfutolu, ɔ 'nylugoa ‑gbatɩa 'kʋa ɔ sielia 'lɛ donyia na, ɩla 'lipasɔa 'kʋ.

¹² Daa Zakalii 'lɩɔ 'lɛ na, 'wugo yɔɔ 'wlu 'wlʋ 'nyɩ ŋanɔ yɔɔ pla.

¹³ ‑Ma 'bhlaandleea yɔɔ 'cla lebhe: «Zakalii, ŋanɔ 'la 'bhlɔɔ sa Laagɔ ɔ ya ‑naa bhibhiea 'nu. ‑N nʋŋlɔ Elizabɛtɩ cɩ 'kɔɔ 'ciŋodico valɩ ɩya ‑n kɔɔ Zaan la.

¹⁴ Ɩ cɩ 'kɔɔ pɔlɛkʋmɛnɔ ɩya ‑jaka nʋ, ɩya ɔla valɩlɩɛa 'wluku, ncaabhutukpa 'ka ‑pɔpʋɛ nʋ.

¹⁵ Sa ɔ cɩ 'ka ‑laagɔlobholinʋnyɔ 'kadie 'plɩ. 'Ɔ cɩ 'ta ‑diinvɛɛn 'mla naa ɔ cɩ 'ta nʋtɛtʋ bhlogbɩɩ 'mla. Ɔ cɩ 'ka ɔ 'nɔ nɩkplaan kʋ ɩya ‑Kpɔkplɔ ‑Wugoa ʋ 'kɔɔ 'lɛ yeli.

¹⁶ Ɔ cɩ 'ka gba Izlayɛlɩnya* ‑bhutukpa 'ka kwlacala ɩya ma 'ka ‑Kwlenyɔ, mala Laagɔ 'klʋtla.

¹⁷ Ɔ cɩ 'ka Laagɔ 'kʋklʋʋnpʋ, ɔ 'ka 'wugoa ɩya 'tɛtɩa ‑ɩ ‑kʋa 'lɛ Laagɔnekʋnyɩtɛnyɔ* Elii 'kʋ na kalɩ. Ɔ cɩ 'ka tocɩa ɩya mala 'cuoa cɩzʋlʋ ɩya ɔ 'ka maa ‑ɔla 'nyi yi 'ta 'lɛ Laagɔ na kwlacala ɩya ma 'kanɩ 'kʋnylugolunya 'bhisa 'kʋ gugu ɩya ɔ 'ka 'lɔlʋa ‑ʋ ‑bhɔsʋa 'lɛ ‑Kwlenyɔ 'la gbʋ na kpo 'kʋ zʋ.»

¹⁸ Daa 'bhlaandleea ‑bhle 'lɛ na, Zakalii yɔɔ neencla lebhe: «'Nsasa n cɩ 'kaa 'lɛ sɛɛ cibhlili bha? Sa n ‑glɩnɩ ‑glɛɛglɛnyɔ 'nyɩ n nʋŋlɔ ‑ma ɔ ya kplɩɩ pla.»

¹⁹ 'Bhlaandleea yɔɔ 'cla lebhe: «‑Amʋ ‑glɩ 'lɛ Gabliyɛlɩ, ‑ɔ 'nylugo 'lɛ Laagɔ ‑deliin le ‑ɔ kɔɔ lobho na. Ka ɔ lobhuun 'lɛ le n soluo ɩya n ‑lɔɔ dɩnanɩ ‑naa.

²⁰ Sa ‑n 'ta 'lɛ 'na niwɔlɩa ‑nʋawlɛ la na, 'lɩka, ‑n ‑cɩ ka ‑amunaan kʋ, ‑n cɩ 'tanɩ nyɩtɛlɩɛ mino ‑aan ɩya clɩɩa 'kʋa ɩmɩ ‑naa ɩ cɩ 'ka 'lɛ 'kʋglalɩ na, ɩ 'ka ŋeni, ‑ofi lebhe daa ɩla clɩɩa 'cɩ 'ka 'lɛ ŋeni na, ɩ cɩ 'ka 'kʋglalɩ.»

²¹ Ncɛlɩa 'fɩan ‑bɛa Zakalii ‑ma saa ɔ gwlɛlɩa 'lɛ laagɔbhibhiepalʋa ‑zɔn na, ɩ slaa maa nikpoo.

²² Daa ɔ 'wlʋ 'lɛ ‑zɔn na, 'ɔ mino 'taa ɔ 'kaa nyɩtɛ ɩya ɔ 'kaa maa solu. Na, ma ya sɛɛ cibhlili le ɔ ya bhibhiepalʋa ‑zɔn wɔlɩ 'ciinlɩ. Ɔ solulua maa sɩɩn 'nyɩ ɔ ‑kʋ kaa ‑amunaan.

²³ Daa ɔla lobhoclɩɩa ɩ bhɩa 'lɛ na, ɔ ya ɔ 'bhisleen cɔlɔ.

²⁴ Ɩ 'la leean ɔ nʋŋlɔ Elizabɛtɩ ɔ ya nɩkpla 'ma. Ɔ 'ta ‑zɔnwlʋ ‑aan 'cɩ ‑ngbi. Ɔ claa ɔcɩ lebhe:

²⁵ «Ɩmɩa ‑ɩ ‑glɩa 'lɛ 'na ‑zo ncɛlɩ 'ci 'kʋ na, daa ‑Kwlenyɔa wabha 'lɛ le ɔ cɩɩn mɩ 'kʋ sa na, 'lɩka wɔlɩa ɔ nʋʋn 'lɛ cɩ na.»

'Blaandlee ya Malii 'dɩ ‑la

²⁶ Elizabɛtɩ 'la nɩkplaa 'la ‑ngbʋflʋ cʋa nɩkplaan, Laagɔ ya 'bhlaandleea* ma la 'lɛ Gabliyɛlɩ na, Galileebhlɩa 'kʋ 'la 'dua ma la 'lɛ Nazalɛtɩ na 'kʋ lobhu,

²⁷ ŋlʋgbɩɔa bhlo 'bhlɩ, ‑ɔ 'ta 'lɛ ŋodi ‑ci na. Ŋlʋgbɩɔde ‑naa ‑glɩa Daviti 'la 'lɔlʋa nɩkplaan nclɔɔa ma 'la 'lɛ Zozɛfʋ na, ɔla ‑zlazlaŋlɔ, ma laa 'mɔɔ Malii.

²⁸ 'Bhlaandleea ya ɔ 'bhisleen ble 'nyɩ ɔ yɔɔ 'cla lebhe: «‑Ayoka Malii, Laagɔ la ‑wawaŋlɔ, ‑Kwlenyɔa ‑kʋɔ cɩ.»

²⁹ Daa Malii 'nu 'lɛ wɔlɩ ‑naa na, 'wugo yɔɔ 'wlu 'wlʋ 'nyɩ ɔ claa ɔcɩ ‑ayopalɩɛ ‑naa ɩla ‑zɔnsalɩɛa neen.

³⁰ Na, 'bhlaandleea yɔɔ 'cla lebhe: «Malii, ŋanɔ 'la 'bhlɔɔ, sa Laagɔ yɔɔ ɔla ‑walʋa pala.

³¹ 'Lɩka, ‑n ‑cɩ ka nɩkpla 'ma, ‑n ka 'ciŋodico valɩ ɩya ‑n kɔɔ Zozii la.

³² Ɔla 'ŋlɩa cɩ 'ka daa ‑tɛtɛa dlolu ɩya ma 'kɔɔ 'Kʋzilo Laagɔ 'la 'Cʋ la. ‑Ala ‑Kwlenyɔ Laagɔ cɩ 'kɔɔ ɔ to Daviti 'la ‑kwlekpoa 'kʋ zʋ.

³³ Ɔ cɩ 'ka Izlayɛlɩnyaa* 'la nyɩbhɛlʋ 'plɩ 'lʋkʋlʋkʋ ɩya 'lʋkʋlʋkʋ, ɩya ɔla ‑kwleliea 'la ka bhɩada kalɩ.»

³⁴ Malii ya 'bhlaandleea 'cla lebhe: «'Nsasa ɩ cɩ 'kaa 'lɛ 'plɩplɩlɩ bha? Sa n 'ta ŋodi ‑ci na.»

³⁵ 'Bhlaandleea yɔɔ 'cla lebhe: «‑Kplɔkplɔ ‑Wugoa* cɩ 'kɔɔ 'kʋ kwlili ɩya 'Kʋzilo Laagɔ 'la 'tɛtɩa 'kɔɔ 'kʋwɔlɩ. Ɩla gbʋ, dɛ 'cileea ‑n ‑cɩ ka 'lɛ valɩ na, ɔ cɩ 'ka 'lɛ ‑kplɔkplɔnyɔ 'plɩ ɩya ma 'kɔɔ 'lɛ Laagɔ 'la 'Cʋ la.

³⁶ 'Lɩka, ‑naa 'lɔlʋŋlɔ Elizabɛtɩ, ɔmɔ ‑ma ɔla ‑glɛɛglʋʋa nɩkplaan, ɔ ‑ka 'ciŋodico 'la nɩkpla 'nyɩ ɔ ‑kʋnɩ ɔla ‑ngbʋflʋ cʋ nɩkplaan, ɔmɔa ma laa 'lɛ 'fifiŋlɔ na,

³⁷ sa wɔlɩ bhlogbɩɩ 'ta Laagɔ 'la da 'tɛ.»

³⁸ Malii ya 'cla lebhe: «‑Kwlenyɔa 'la lobhoŋlɔ n ‑glɩ 'lɛ. Na, saa ‑n 'bhli 'lɛ 'kʋ na, 'naa ɩ ‑tɛtɛa 'plɩ sɛɛ 'na gbazɔ.» 'Nyɩ 'bhlaandleea yɔɔ cɩɩnwlʋlʋ.

Malii ya Elizabɛtɩ kopekan mʋ

³⁹ Na, 'dɛ 'la clɩɩa nɩkplaan, Malii ya ‑gugwie 'ma 'faanfan 'nyɩ ɔ ya 'kikia nɩkplaan, Zudeebhlɩa 'kʋ 'la du bhlo 'kʋ mʋ.

⁴⁰ Ɔ ya Zakalii 'bhisleen ble 'nyɩ ɔ ya Elizabɛtɩ ‑ayo 'pa.

⁴¹ Daa Elizabɛtɩ 'nu 'lɛ Malii 'la ‑ayopalɩɛa na, ɔla nɩkplaa ya 'pa. ‑Kplɔkplɔ ‑Wugoa* yɔɔ yeli 'nyɩ

⁴² ɔ ya nikadieen nyɩtɛlɩ, ɔ ya 'cla lebhe: «‑N ‑palɩɔ 'nyu 'ŋwlɛa 'fɩan sidiin 'nyɩ 'cileea ‑ɔ ‑kʋɔ 'lɛ nɩkplaan na, ɔmɔ ‑ma ɔ ‑palɩɔ 'nyu!

⁴³ 'Lɩsaa n ‑glɩa 'lɛ ɩya 'na ‑Kwlenyɔa ɔ 'nɔ, ɔ 'kaan 'lɛ 'bhlɩ ci bha?

⁴⁴ Sa daa n 'nu 'lɛ ‑naa ‑ayopalɩɛa na, 'cileea ‑ɔ ‑kʋʋn 'lɛ nɩkplaan na, ɔ ya 'dɩdɔ pɔlɛkʋmɛnɔmɛnɔsa.

⁴⁵ Ɔ ‑kʋ 'nanɩ, ɔmɔa ‑ɔ ‑ka 'lɛ pɔɔtɛtɛ le ɩmɩa ‑Kwlenyɔa soluo 'lɛ na, ɩ cɩ 'ka 'kʋglalɩ na.»

Malii 'la lʋʋa

⁴⁶ Na, Malii ya 'cla lebhe: «'Na 'wugoa wo ‑Kwlenyɔ ‑evli.

⁴⁷ 'Nyɩ 'na pɔlɛa ‑kʋ pɔlɛkʋmɛnɔɔn, Laagɔ, 'na gbʋʋsanyɔa 'la gbʋ.

⁴⁸ Ɔ ya ɔla ŋaazɩlobhoŋlɔa, 'ci 'kʋ 'pa. ‑Ghɛɛ, ‑zɔkpʋa ‑tɛtɛa ‑ɩ cɩ ka 'lɛ 'jeen 'plɩplɩlɩ na, ɩ cɩ 'kaan 'nanɩkʋŋlɔ la.

⁴⁹ Laagɔa, 'tɛtɩa 'fɩan toa, ɔ yaan ‑jakajakagbɩ cɩ nʋ. Ɔla 'ŋlɩa ‑kplɔ

⁵⁰ 'nyɩ ɔla ŋaazɩɩlɩlɩɛa ‑kʋ clɩɩa 'fɩan maa ‑ɔ zʋɔ 'lɛ na 'kʋ.

⁵¹ Ɔ ya ɔla 'tɛtɩkalɩsɔa 'ma 'nyɩ ɔ ya maa ‑ɔ ‑ka 'lɛ ‑tutulepɔlɛ na dlolu.

⁵² Nyɩbhɛlɩa, ɔ ya maa mala ‑kwlekpua 'kʋ ‑sa 'nyɩ maa ‑ɔ la 'lɛ maa ‑ɔ la 'lɛ macɩ ‑dʋdʋ 'kʋ na, ɔ ya 'lɛ maa 'kʋbho.

⁵³ Maa ŋɔmʋ bhla 'lɛ na, ɔ ya maa 'nanɩ ‑bhutukpa yeli, 'nyɩ maa ‑ɔ ‑lio 'lɛ 'bhɛlɩ na, ɔ ya 'lɛ maya wlɩɩ ‑kɔfɩa 'tli.

⁵⁴ Ɔ ya Izlayɛlɩ*, ɔla lobhocoa 'kʋ ci, ‑ghɛɛ ɔ ya ɔla ŋaazɩɩnlɩlɩɛa ɔ talɩa 'lɛ ‑ndanyɩ 'kʋ na luoli.

⁵⁵ Saa ɔ 'cla 'lɛ ‑a tokadɔcɩa lebhe, ɔ cɩa Ablaamʋ ɩya ɔla valɩnɩkplaa ŋaazɩɩn 'lɩ 'lʋkʋlʋkʋ ɩya 'lʋkʋlʋkʋ na.»

⁵⁶ Malii ‑kʋa Elizabɛtɩ cɩ ‑aan 'cɩ ‑mɔta 'bhisa, 'nyɩ ɔ ya 'lɛ ɔ 'bhlɩ cɔlɔ.

Ma ya 'Nyuwluzʋnyɔ valɩ

⁵⁷ Daa ɩmɩ ‑naa 'fɩan 'plɩ 'lɛ na, Elizabɛtɩ 'la valɩda ya ŋeni 'nyɩ ɔ ya 'ciŋodico valɩ.

⁵⁸ Ɔla cɩkʋnyaa ɩya ɔla 'lɔlʋnyaa ya 'nu le ‑Kwlenyɔa yaa 'mɔɔ ɔla ŋaazɩɩnlɩlɩɛ pala 'nyɩ ma ‑yɔɔsɔ ya ‑pɔpʋɛ nʋ.

⁵⁹ Daa ‑ngbaata clɩɩa ŋeni 'lɛ na, ma ya 'cileea ‑slekʋdɩkan ci 'nyɩ ma ya wabha le ma 'kaa 'mɔɔ Zakalii la, ɔ to 'bhisa.

⁶⁰ ‑Ma ɔ 'nɔ ya nesa 'nyɩ ɔ ya 'cla lebhe: «‑Wɔɔ, Zaan ma cɩ 'kɔɔ 'lɛ la.»

⁶¹ Ma yɔɔ 'cla lebhe: «Ka ‑naa 'lɔlʋa nɩkplaan 'la nclɔɔ ‑lio 'lɛ ŋlɩ ‑naa bha?»

⁶² Na, ma ya toa sɩɩn neenclalɩɩ le ma 'kaa saa ɔ ‑waa 'lɛ le ma lalalɩa 'cileea na cibhlili.

⁶³ Ɔ ya 'kpakpʋ 'clalɩ 'nyɩ ɔ yʋʋ 'kʋ zie lebhe: «Ɔla ŋlɩɩ ‑glɩ 'lɛ Zaan.» 'Nyɩ nikpoo ya maa 'fɩan sla.

⁶⁴ Dɩpɩa bhlogbɩɩ ɔla nea ya 'gbo kalɩ, ɔla mɩɔ ya ‑blulu, ɔ nyɩtɛanɩa 'nyɩ ɔ woa Laagɔ ‑evli.

⁶⁵ Na, ŋanɔ ya ɔla cɩkʋnyaa 'fɩan pla. 'Nyɩ 'kikia nɩkplaan Zudee bhlɩa 'fɩan 'kʋ, ma salɩa ɩmɩa ‑ɩ 'plɩa 'lɛ na 'dɩ 'kʋ.

⁶⁶ Maa 'fɩan ‑ɔ 'nua 'lɛ wɔlɩ ‑naa na, ma yɩɩ mala pɔlɩa nɩkplaan zʋ. 'Nyɩ ma claa macɩ neen lebhe: «'Lɩsaa 'cilee ‑naa, ɔ cɩ 'kakɩnɩ 'lɛ 'plɩ bha?» 'Nyɩ ‑zaagbʋsa ‑Kwlenyɔa 'la sɔa ‑kʋa 'mɔɔ 'kʋ.

Zakalii wo Laagɔ ‑evli

⁶⁷ Na, ‑Kplɔkplɔ ‑Wugoa* ya Zakalii, 'cileea toa yeli 'nyɩ ɔ nyɩtɛa Laagɔ ne 'kʋ ɔ claa lebhe:

⁶⁸ «'Nyupalɩɛ ŋeni ‑Kwlenyɔ, Izlayɛlɩ* 'la Laagɔa ‑ofile ɔ ya ɔla 'lɔlʋa klalɩ 'nyɩ ɔ yʋʋ geyliin ‑sa.

⁶⁹ Ɔ ya ‑anyɩ gbʋʋnsanyɔ 'kadie 'nyɩ, nyɩbhɛlʋ Daviti, ɔla lobhocoa 'la 'lɔlʋa nɩkplaan.

⁷⁰ Ɩmɩ ɔ nyɩtɛlɩwaa 'lɛ tooto ɔla ‑kplɔkplɔ nekʋnyɩtɛnyaa neen lebhe:

⁷¹ Ɔ cɩ 'kaa ‑anyɩ ‑ala ‑zɔbhɛlɩgbanyaa ɩya maa ‑ɔ ‑zɔ 'lɛ anyɩ na wlɩɩn ‑sa.

⁷² Ɔ ya ɔla ŋaazɩɩnlɩlɩɛa ‑a tokadɔcɩ pala 'nyɩ ɔ ya 'lɛ ɔla ‑kplɔkplɔmɛnʋa luoli,

⁷³ ‑ɔ ‑glɩ 'lɛ ‑ndanyɩa ɔ tawaa 'lɛ ‑a tokadɔkadɔ Ablaamʋ

⁷⁴ le ɔ cɩa ‑anyɩ ‑zɔbhɛlɩgbanya wlɩɩn ‑sa 'nyɩ ‑a cɩɔ pɔlɛ bhloon lobholu,

⁷⁵ 'ɔ 'ci 'kʋ, ‑kplɔlɩɛɛn ɩya ɔla 'kʋnylugolulɩɛɛn, clɩɩa ‑a cɩ ka 'lɛ dʋdʋa 'kʋ li na.

⁷⁶ 'Nyɩ ‑mɔ 'na 'cilee, ma cɩ 'kɔɔ 'kʋzilo Laagɔ 'la nekʋnyɩtɛnyɔ la. ‑N ‑cɩ ka ‑Kwlenyɔa 'kʋklʋʋn pʋ ɩya ‑n ka ɔla ‑gugwiea bhɔsʋa.

⁷⁷ ‑N cɩ ka gba ɔla 'lɔlʋa 'ka gbʋʋnsalɩɛa ‑ɩ 'wlʋlʋ 'lɛ nyinyivalɩɛ nɩkplaan na cibhlili!

⁷⁸ Ɩ ‑glɩ ‑ala Laagɔ 'la ŋaazɩɩnlɩlɩɛ 'kadiea 'la palalɩɛ. Ŋaazɩɩnlɩlɩɛ ‑naa ya gba 'nyɩ zezezeliea ‑ɩ 'wlʋlʋ 'lɛ ‑laagɔɔn na, ɩ ya ‑anyɩ 'kʋ ŋeni le ‑zʋkpaylʋbhuoa 'bhisa,

⁷⁹ le ɩ 'ka maa ‑ɔ ‑kʋ 'lɛ 'tutuun ɩya 'kwɩ 'la ‑zuzua nɩkplaan na 'kʋ leli ɩya ɩ 'ka ‑anyɩ pupue 'la ‑gugwiea 'kʋ zʋ.»

⁸⁰ 'Cileea glɛa 'nyɩ ɔla 'wugoa zʋa 'tɛtɩ. Ɔ ‑kʋa 'pʋpʋa nɩkplaan ‑aan 'nyɩ clɩɩa 'kʋa ɔ pala 'lɛ ɔcɩ Izlayɛlɩlɔlʋ na, ɩ ya 'lɛ ŋeni.