Zozi Klisi 'la Dɩnanɩa Zaan zie 'lɛ na 1 - Le Nouveau Testament en langue Dida

Wɔɔnyɩtʋa ya nclɔɔ 'plɩ

¹ Bhɔdaa tooto, Wɔɔnyɩtʋa ‑kʋa. 'Nyɩ Wɔɔnyɩtʋa ‑ya Laagɔ ‑kʋa, 'nyɩ Wɔɔnyɩtʋa ‑glɩa Laagɔ.

² Bhɔdaa, ʋya Laagɔ ‑kʋa.

³ Ʋmʋ ‑ʋ nʋ 'lɛ ‑tɛtɛa 'fɩan, 'nyɩ lʋʋa ʋ 'ta 'lɛ nʋ na, ʋ 'ta ‑kʋ.

⁴ Ʋmʋ nɩkplaan jabhʋa ‑kʋa 'lɛ 'nyɩ jabhʋa ‑glɩa 'lɛ ncɛlɩ 'la zezezeli.

⁵ 'Nyɩ zezezelia leli 'tutua nɩkplaan, ‑ma 'tutua 'ta ŋonu ɩya ʋya zezezelia 'ka dabhlo kʋ.

⁶ Na, Laagɔ ya nclɔɔ bhlo lobhu, ma lɔɔ Zaan.

⁷ Ɔ ya ci le ɔ 'ka zezezelia 'la ‑danʋfʋɛ li, ɩya ncɛlɩa 'fɩan 'ka ɔla ‑danʋfʋɛliliea 'kʋ 'plɩlɩ ɩya ma 'ka pɔɔtɛtɛ 'lɩ.

⁸ ‑N 'ta ɔmɔ ‑ɔ 'taa 'lɛ zezezelia ‑glɩ, ‑ma ka ɔ ci 'lɛ ɩya ɔ 'ka zezezelia 'la ‑danʋfʋɛ li.

⁹ Wɔɔnyɩtʋa ‑glɩa 'lɛ zezezelia 'titi, ‑ɩ ci 'lɛ ‑laagɔzɔan 'nyɩ ‑ɩ leli 'lɛ ncɛlɩa 'fɩan 'kʋ na.

¹⁰ Ɔmɔa ‑ɔ ‑glɩa 'lɛ Wɔɔnyɩtʋa na, ɔ ‑kʋa ‑laagɔzɔan, 'nyɩ ɔmɔ ‑ɔ nʋ 'lɛ ‑laagɔzɔan, ‑ma ‑laagɔzɔan 'tɔɔ cibhlili.

¹¹ Ɔ ya ɔ 'bhlɩ ci, ‑ma ɔ 'bhlɩnyaa 'tɔɔ kla.

¹² 'Bhlɩmɔɔn, maa ‑anʋa ‑ɔ klɔɔ 'lɛ, 'nyɩ ‑ɔ ‑ka 'lɛ ɔla 'ŋlɩa 'la pɔɔtɛtɛ na, ɔ ya maa ‑jioli 'nyɩ le ma 'plɩ Laagɔ 'la 'cuo.

¹³ 'Nyɩ maa ‑naa, ‑n 'ta ‑dolu, 'nyɛkɛ, ‑aana nclɔɔ 'la ‑pɔɔsanʋlɩɛ nɩkplaan ma 'ta 'lɛ ‑valɩlɩlɩɔ, ‑ma Laagɔ nɩkplaan.

¹⁴ Na, ɔmɔa ‑ɔ ‑glɩa 'lɛ Wɔɔnyɩtʋa na, ɔ ya nclɔɔ 'plɩ, 'nyɩ ɔ ya ‑anyɩ sidiin kʋkan ci. ‑A ya ɔla 'klʋagbaa 'ciinlɩ. 'Klʋagba ‑naa Toa 'nyɩ 'lɛ ɔla 'ciŋodicoa bhloa dananɔ ɩya ‑nʋawlɛ ‑yelio 'lɛ na.

¹⁵ Zaan lia ɔla ‑danʋfʋɛ, ɔ ‑gaa nɩkplaaan 'nyɩ ɔ claa lebhe: «'Lɩka ɔmɔa 'la wɔlɩa n nyɩtɛ 'lɛ lebhe: 'Na leen nclɔɔ bhlo ci 'yɛpɩ, ‑ma ɔ yaan 'kʋklʋʋnpʋ, ‑ofi lebhe 'fɩɔn n ka 'lɛ ci na, ɔ ‑kʋa tooto.»

¹⁶ Ɔla 'nanɩ 'kadɩa nɩkplaan, ɔla 'nyupalɩɛa ya ‑anyɩa 'fɩan 'kʋ 'kɔsɔ 'ci 'ci.

¹⁷ Sa, Moyizi ya ‑jlɩmaa ‑lamʋ, ‑ma Zozi Klisi ‑lamʋ 'lɛ dananɔ ɩya ‑nʋawlɛ.

¹⁸ Nclɔɔ bhlogbɩɩ 'ta ka ‑azla Laagɔ 'ciinlɩ. ‑Ma 'Cʋa bhloa ‑ɔ ‑glɩ 'lɛ Laagɔ 'nyɩ ɔ ‑kʋ 'lɛ Toa cɩ na, ɔmɔ ‑ɔ palɔɔ 'lɛ ‑anyɩ.

'Nyuwluzʋnyɔ Zaan 'la ‑danʋfʋɛlilie

¹⁹ Daa Zifʋnyaa* tocɩa ‑ɔ ‑kʋ 'lɛ Zolizalɛmʋ na, lobhu 'lɛ ‑teyiyinyaa ɩya mala klalɩnyaa Zaan 'bhlɩ, le ma 'clɔɔ neen nclɔɔa ɔ ‑glɩa 'lɛ na, 'lɩka ‑danʋfʋɛa ɔ li 'lɛ na.

²⁰ Ɔ ya maa ‑nʋawlɛ solu 'kpataa 'nyɩ ɔ ya 'cla lebhe: «‑N 'ta ‑amʋ ‑ɔ 'ta 'lɛ Laagɔ 'la ‑Sasanyɔa* ‑glɩ.»

²¹ 'Nyɩ ma yɔɔ neencla lebhe: «Na, ncaasaa ‑n ‑glɩnɩ 'lɛ bha? Elii bha?» Ɔ ya maa 'cla lebhe: «N 'ta Elii ‑glɩ.» Ma ya ‑awlɛɔ neencla lebhe: «Laagɔnekʋnyɩtɛnyɔa* ‑ɔ -cɩ kaa 'lɛ ci na, ɔmɔ ‑n ‑glɩ 'lɛ bha?» Ɔ ya maa neenŋonu lebhe: «‑Wɔɔ, n 'tɔɔ ‑glɩ.»

²² Na, ma yanɩɔ 'cla lebhe: «Ncaasaa ‑n ‑glɩa 'lɛ bha? Ɩya ‑a ka maa ‑ɔ lobhu 'lɛ ‑anyɩ na, neenŋonusa cibhlili! ‑Mɔɔ 'titi ncaasaa ‑n laa 'lɛ ncɩ bha?»

²³ Ɔ ya maa 'cla lebhe: «‑Amʋ ‑ɔ ‑glɩ 'lɛ ‑blɩɩzɔan ‑ʋ gaan 'lɛ 'pʋpʋa nɩkplaan 'nyɩ ‑ʋ cla 'lɛ lebhe: A 'nylugolu ‑Kwlenyɔ 'la ‑gugwiea 'kʋ, saa Laagɔnekʋnyɩtɛnyɔ Izayii 'bhlia 'lɛ 'kʋ na.»

²⁴ Maa ma lobhua 'lɛ na ‑glɩa Falizɩɛnnya*.

²⁵ Na, ma ya ‑awlɛɔ neencla lebhe: «N 'ta 'lɛ Laagɔ 'la ‑Sasanyɔa ‑glɩ, n 'ta 'lɛ Elii ‑glɩ, 'nyɩ ‑n 'ta 'lɛ Laagɔnekʋnyɩtɛnyɔa ‑glɩ na, 'lɩsaa 'la gbʋ ‑n zʋnɩ 'lɛ ncɛlɩ 'nyu 'wlu bha?»

²⁶ Zaan ya maa neenŋonu lebhe: «‑Amʋ, 'nyu nɩkplaan n zʋlʋ 'lɛ ncɛlɩ 'nyu 'wlu. ‑Ma ɔmɔa a 'ta 'lɛ ‑ci na ‑kʋ anyɩ sidiin.

²⁷ Ɔmɔ ‑ɔ ciin 'lɛ leen 'nyɩ n 'ta 'kʋŋwa le n ‑blulu ɔla ‑gbanbʋa 'la 'bhlua.»

²⁸ Betaniidua 'kʋ, Zludɛɛnnyidɔlʋa leen, gbazɩa Zaan zʋlʋa 'lɛ ncɛlɩa 'nyu 'wlu na, 'yɛpɩ ɩmɩ ‑naa 'plɩlɩa 'lɛ.

Laagɔ 'la 'bhlabhlɩcoa

²⁹ Na, daa ‑zeli ze 'lɛ na, Zaan ya Zozii 'lɩ, ɔ cilia 'mɔɔ 'bɩɩn 'nyɩ ɔ ya 'cla lebhe: «'Lɩka Laagɔ 'la 'bhlabhlɩcoa ‑ɔ sa 'lɛ ‑laagɔzɔan ɩla nyinyia cɩ na.

³⁰ Ɔla wɔlɩ n nyɩtɛ 'lɛ lebhe: 'Na leen nclɔɔ bhlo ci 'yɛpɩ, ‑ma, ɔ ‑pʋʋn 'kʋklʋʋn sa 'fɩɔn n 'ka 'lɛ ci na, ɔ ‑kʋa.

³¹ ‑Amʋ 'titi n 'taa 'mɔɔ ‑ci, ‑ma Izlayɛlɩlɔlʋa* 'kɔɔ 'lɛ cibhlili na, ɩla gbʋ dɛ n ci 'lɛ ncɛlɩ 'nyu nɩkplaan 'nyuwluzʋkan.»

³² Zaan ya ‑danʋfʋɛ li 'nyɩ ɔ ya 'cla lebhe: «N ya ‑Kplɔkplɔ ‑Wugoa* 'lɩ 'dablee 'bhisa, ʋ ya ‑laagɔɔn 'wlʋ, ʋ yɔɔ 'kʋ kwlili 'nyɩ ʋ ‑kʋa 'mɔɔ 'kʋ.

³³ 'N 'taa 'mɔɔ ‑ci, ‑ma ɔmɔa ‑ɔ lobhuun 'lɛ le n 'ma 'nyu ɩya n zʋ ncɛlɩ 'wlu na, ɔ yaan 'cla lebhe: Ɔmɔa -n -cɩ ka 'lɛ 'lɩ ɩya 'Wugoa 'ka 'lɛ 'kʋ kwlili ɩya ʋ 'ka 'kʋ kʋ na, ɔmɔ ‑ɔ zʋ 'lɛ ncɛlɩ ‑Kplɔkplɔ ‑Wugoa nɩkplaan.

³⁴ Na, ‑amʋ n yɔɔ 'lɩ 'nyɩ n li ‑danʋfʋɛ lebhe ɔmɔ ‑ɔ ‑glɩ 'lɛ Laagɔ 'la 'Cʋa.»

Zozii 'la ‑bɛka ‑gɩlɩnyaa

³⁵ Daa ‑zeli ze 'lɛ na, Zaan ‑kʋa ‑awlɛ dɩpɩa bhlogbɩɩ, ɔya ɔla gɩlɩnya* ‑mɔsɔ.

³⁶ Ɔ ya Zozii 'plɩda 'lɩ, ɔ yɔɔ 'ciin kope 'cɩɩ 'nyɩ ɔ ya 'cla lebhe: «'Lɩka Laagɔ 'la 'bhlabhlɩcoa.»

³⁷ Gɩlɩnyaa ‑mɔsɔa 'nuo 'lɛ wɔlɩ ‑naa neen na, ma ya Zozii gɩlɩ.

³⁸ Zozii ya kwlacala 'nyɩ ɔ 'lɩ 'lɛ lebhe ma gɩlɩa 'mɔɔ na, ɔ ya maa neencla lebhe: «'Lɩsaa a 'matɩa 'lɛ bha?» Ma yɔɔ 'cla lebhe: «‑Ghlabii, 'ndagbazɩ ‑n 'bhisleen ‑kʋa 'lɛ bha?» ‑Ghlabiia, ɩ sa ‑zɔn lebhe Canyɔ.

³⁹ Ɔ ya maa 'cla lebhe: «‑A ci ɩya a 'ka 'lɩ.» Na, ma ya mʋ 'nyɩ ma ya daa ɔ ‑kʋa 'lɛ na 'lɩ, 'nyɩ 'dɛ 'la clɩɩa 'kʋ, ma yɔɔ cɩ -to. Ɩ ‑glɩanɩa 'plɩplɩylʋʋn 'la 'ŋwacɩ ‑nmɔɔna 'la 'klia nɩkplaan.

⁴⁰ Simɔɔn Pɩɛlɩ bholi Andlee ‑glɩa gɩlɩnyaa ‑naa ‑mɔsɔa ‑ɔ 'nua 'lɛ Zaan 'la wɔɔnyɩtʋa 'nyɩ ‑ɔ gɩlɩ 'lɛ Zozii na, 'la nɩkplaan bhlo.

⁴¹ ‑Bɛɛ, ɔ ya mʋ, ɔ ya ɔmɔ 'titi ɔ bholi Simɔɔn ŋeni 'nyɩ ɔ yɔɔ 'cla lebhe: «‑A ya Laagɔ 'la ‑Sasanyɔa* ma la ‑awlɛ 'lɛ Klisi na 'lɩ.»

⁴² Ɔ yɔɔ Zozii ‑la. Zozii yɔɔ 'ciinkope ‑aan 'nyɩ ɔ yɔɔ 'cla lebhe: «‑Mɔ ‑ɔ ‑glɩ 'lɛ Simɔɔn, Zaan ‑yowli. ‑Mɔ ma cɩ 'kanɩ 'lɛ Sefasɩ la, ɩ sa ‑zɔn le cokwie.»

Zozii ya Filipʋ ɩya Natanayɛlɩ la

⁴³ Daa ‑zeli ze 'lɛ na, Zozii ya wɔlɩ kpo 'kʋ zʋ le ɔ 'ka Galileebhlɩa 'kʋ mʋ. Ɔ ya Filipʋ 'lɩ 'nyɩ ɔ yɔɔ 'cla lebhe: «Gɩlɩɩn!»

⁴⁴ Filipʋ 'wlʋlʋa Bɛsayida, 'dua 'kʋa Andlee ɩya Pɩɛlɩ 'wlʋlʋa 'lɛ na.

⁴⁵ Filipʋ ya mʋ, ɔ ya Natanayɛlɩ ŋeni 'nyɩ ɔ yɔɔ 'cla lebhe: «Ɔmɔa 'la wɔlɩa ma nyɩtɛ 'lɛ Moyizi ɩya Laagɔnekʋnyɩtɛnyaa* 'la ‑afluwia nɩkplaan na, ‑a yɔɔ 'lɩ. Ɔmɔ ‑ɔ ‑glɩ 'lɛ Nazalɛtɩnyɔ Zozii, Zozɛfʋ ‑yowlia.»

⁴⁶ Natanayɛlɩ yɔɔ neencla lebhe: «‑Lʋʋ 'nanʋ cɩ Nazalɛtɩ 'wlʋlʋmʋ bha?» ‑Ma Filipʋ yɔɔ 'cla lebhe: «Ci ɩya ‑na 'ci 'ka 'lɩ.»

⁴⁷ Daa Zozii 'lɩ 'lɛ Natanayɛlɩ 'nyɩ ɔ ‑kʋa 'mɔɔ 'lɛ 'bɩɩncilida na, ɔ ya ɔla cɩ 'la wɔlɩ nyɩtɛ 'nyɩ ɔ ya 'cla lebhe: «'Lɩka Izlayɛlɩnyɔ* 'titi, ‑kplakpla ‑ylɛylɛ 'ta 'lɛ nɩkplaan ‑kʋ na.»

⁴⁸ 'Nyɩ Natanayɛlɩ yɔɔ neencla lebhe: «'Nda ‑n ‑ciliin 'lɛ bha?» Zozii yɔɔ neenŋonu lebhe: «'Fɩɔn ɩya Filipʋ 'kɔɔ 'lɛ la na, daa ‑n ‑kʋa 'lɛ 'figisua ‑zɔn na, n yɔɔ 'lɩ.»

⁴⁹ Natanayɛlɩ yɔɔ 'cla lebhe: «Canyɔ, ‑mɔɔ ‑glɩ 'lɛ Laagɔ 'la 'Cʋa, ‑mɔɔ ‑glɩ 'lɛ Izlayɛlɩlɔlʋ 'la nyɩbhɛlʋa.»

⁵⁰ Na, Zozii yɔɔ neenŋonu lebhe: «Sa n yɔɔ 'lɛ 'cla lebhe, n yɔɔ 'figisua ‑zɔn 'lɩ na, dɛ ‑n ‑kanɩ 'lɛ 'na pɔɔtɛtɛ ‑na. ‑N ‑cɩ ka nʋnʋgbɩ 'ciinlɩ ɩya ɩ 'ka ‑da 'kʋ zi!»

⁵¹ 'Nyɩ ɔ ya ‑awlɛ 'cla lebhe: «N solu anyɩ, ɩ ‑glɩ ‑nʋawlɛ, a cɩ 'ka ‑laagɔɔn 'lɩ, ɩ 'ka 'gbokalɩ, ɩya Laagɔ 'la 'bhlaandleecɩa* 'ka Nclɔɔa 'Cʋa* 'kʋ 'plɩlɩ, ma 'ka ‑gblaa ɩya ma 'ka kwli.»