Ebleenyaa 'la ‑afluwaa ma zie 'lɛ maa na 1 - Le Nouveau Testament en langue Dida

Laagɔ nyɩtɛ ka ‑azla

¹ ‑Godogodoa, Laagɔnekʋnyɩtɛnyaa* 'kʋ Laagɔ 'plɩlɩa ‑azla 'lɛ 'nyɩ ɔ solua 'lɛ ‑a tokadɔcɩa wɔlɩ 'ci 'ci.

² ‑Ma ‑pɔtɔnʋ, bhɩalɩclɩɩ ‑naa nɩkplaan ‑a ‑kʋnɩ 'lɛ na, ɔla 'Cʋa ɔ sla 'lɛ de le ɔ 'ka lɩɩa ‑tɛtɛa wlɩɩn zʋ, 'nyɩ ɔ 'plɩlɩ 'lɛ 'kʋ 'nyɩ ɔ ya 'lɛ ‑tɛtɛa 'fɩan nʋ na, ɔmɔ neen ɔ nyɩtɛlɩ 'lɛ 'nyɩ ɔ ya 'lɛ ‑anyɩ solu.

³ 'Cʋa ‑glɩ Laagɔ 'la 'klʋagbaa 'la 'jɩ, ɔ palalɩ ɔla ‑lɩɩbhuoa, 'nyɩ ɔla wɔɔnyɩtʋa 'la 'tɛtɩa ‑ka 'lɛ ‑tɛtɛa 'fɩan. Ɔ ya ncɛlɩ nyinyi cɩ wɔlʋ, 'nyɩ ɩla leen, ɔ ya 'lɛ 'kʋzilo Laagɔ 'lipasɔ 'kʋ sakʋ, 'yɛpɩ ‑laagɔɔn.

⁴ Ɔ zinɩ 'bhlaandleecɩa* 'kʋ, ‑ofi lebhe 'ŋlɩa Laagɔ zʋɔ 'lɛ na, ɩya ma 'nɩa 'ta 'wlʋlʋ.

⁵ 'Bhlaandleecɩa, ‑anɔsaa Laagɔ ya ‑azla 'lɛ 'cla lebhe: ‑N ‑glɩ 'na 'cʋ, ‑yaka, ‑amʋ n ‑valɩnɩɔ bha? 'Nyɩ 'bhlaandleecɩa, ‑anɔsaa 'la 'sasʋʋn ɔ ya ‑awlɛ 'lɛ 'cla lebhe: ‑Amʋ, n cɩ 'ka ɔ to 'plɩ ɩya ɔmɔ ɔ 'ka 'na 'cʋ 'plɩ bha?

⁶ ‑Ma daa ɔ ‑la 'lɛ ɔla ‑bɛkavalɩcoa ‑laagɔzɔan na, ka ɔ 'ta 'cla 'lɛ lebhe: 'Naa Laagɔ 'la 'bhlaandleecɩa 'fɩan slɔɔ ‑kukoonkplii ‑deliin sa bha?

⁷ 'Nyɩ 'bhlaandleecɩa 'la gbazɔ, ɔ ya 'lɛ 'cla lebhe: Ɔmɔ -ɔ nʋ 'lɛ ɔla 'bhlaandleecɩa 'wugwi cɩ, Ɔmɔ -ɔ nʋ 'lɛ ɔla lobhocuoa ‑kosuvlevle cɩ.

⁸ ‑Ma 'Cʋa 'la gbazɔ, ka ɔ 'cla 'lɛ lebhe: Laagɔ, ‑naa nyɩbhɛlɩkpoa, a ‑kʋ 'lʋkʋlʋkʋ ɩya 'lʋkʋlʋkʋ! 'Nyɩ ‑naa ‑kwlepɛa ‑glɩ 'lɛ 'kʋnylugolulɩɛ 'la ‑kwlepɛ.

⁹ ‑N ya 'kʋnylugolulɩɛ wabha, 'nyɩ ‑n ya 'lɛ ɩmɩa ‑ɩ 'ta 'lɛ 'kʋnylugolu na zɔbhɛlɩ, dɛ ‑mɔɔ Laagɔ, ‑naa Laagɔ slɔɔ 'lɛ de, ‑naa 'namʋnyaa 'fɩan sidiin, 'nyɩ ɔ yɔɔ 'lɛ pɔlɛkʋmɛnɔmɛnɔkpʋ 'wlu tɔlʋ.

¹⁰ Ɔ ya ‑awlɛ 'cla lebhe: ‑Kwlenyɔ, ‑mɔ ‑ɔ nʋ 'lɛ ‑dʋdʋa bhɔdaa tooto, 'nyɩ ‑laagɔɔn ‑glɩ 'lɛ ‑naa wlɩa 'la nʋnʋlobholi.

¹¹ Ɩmɩ ‑naa ‑tɛtɛa cɩ 'ka 'plɩ, ‑ma ‑mɔ ‑n ‑kʋ. ‑Ghɛɛ, ɩ cɩ 'ka kpli, lokwi 'bhisa.

¹² Lokwi 'bhisa, ‑n ‑cɩ kɩɩ gigieli, nɩkplaanplalokwi 'bhisa, ɩ cɩ 'ka ‑kacio. ‑Ma ‑mɔ, ‑n kaci 'ta, 'nyɩ ‑naa lio 'ta bhɩada ‑ka.

¹³ 'Bhlaandleecɩa, ‑anɔsaa ɔ ya ‑azla 'lɛ 'cla lebhe: 'Maa kʋʋn 'lipasɔ 'kʋ sa, ɩya n 'ka ‑naa ‑zɔbhɛlɩgbanyaa ‑naa kplia ‑zɔn zʋ bha?

¹⁴ Maa ‑tɛtɛa, ‑n 'ta 'wugwia ‑ɩ lobho 'lɛ Laagɔ na, ma 'ta 'lɛ ‑glɩ, 'nyɩ ɔ lobhu 'ta 'lɛ maa le ma klalɩ maa ‑ɔ ‑cɩ ka 'lɛ gbʋʋnsalɩɛ 'lɩ na bha?