Galasiinyaa 'la ‑afluwaa Pɔlʋ zie 'lɛ maa na 1 - Le Nouveau Testament en langue Dida

‑Ayopalɩɛ

¹ ‑Amʋ Pɔlʋ, ‑ɔ 'ta 'lɛ ncɛlɩ ‑aana nclɔɔ bhlo 'la lobhulobhunyɔ* ‑glɩ, ‑ma ‑ɔ ‑glɩ 'lɛ Zozi Klisi ɩya To Laagɔ ‑ɔ ‑bhoo 'lɛ 'kwɩɩn 'kʋ na, 'la lobhulobhunyɔ na,

² n ‑ya bholiecɩa 'fɩan ‑ɔ ‑kʋʋn 'lɛ cɩ na, ‑anyɩ -ɔ zie 'lɛ anyɩ Galasiibhlɩa 'kʋ 'la ‑laagɔnɩkplaa.

³ 'Nyupalɩɛ ɩya pupuea ‑a To Laagɔ ɩya ‑Kwlenyɔ Zozi Klisi nyɩ 'lɛ na, kʋ anyɩ 'kʋ.

⁴ Klisi ya ɔcɩ ‑sa ‑ala nyinyia 'la gbʋ, le ɔ 'ka ‑anyɩ ‑abhɔlɛ 'la 'pʋpʋ ‑naa 'ku 'la ‑kwleliea ‑zɔn ‑sa, saa Laagɔ ‑ɔ ‑glɩ 'lɛ ‑a To wabha 'lɛ na.

⁵ 'Klʋagba ŋenio 'lʋkʋlʋkʋ ɩya 'lʋkʋlʋkʋ! Ɩ kʋ sɛɛ!

Dɩnanɩa ‑glɩ bhlo

⁶ Ylɩbhalɩlɩɛa a ylɩbhalɩ 'lɛ 'nyɩ a ya 'lɛ ɔmɔa, Klisi la ŋaazɩɩnlɩlɩɛa nɩkplaan, ‑ɔ la 'lɛ anyɩ na, kɔkʋʋn ‑tla 'nyɩ a ya 'lɛ ‑sa 'faanfan ‑buun ‑dɩnanɩ 'klʋ ‑tla na, ɩ slaan nikpoo.

⁷ ‑N 'ta le, Dɩnanɩa* 'ka ɩla ‑buun -naanɩ kalɩ. ‑Ma ncɛlɩ -ɔ gblogblolu 'lɛ anyɩ 'nyɩ ‑ɔ 'matɩ 'lɛ lebhe ‑ɔ ka Klisi 'la Dɩnanɩa sagblii.

⁸ ‑Ma ɩ ‑ka ‑kʋ le nclɔɔ, ɔ 'plɩmʋ ‑anyɩ 'titi ‑aana ‑laagɔɔn 'la 'bhlaandleeo*, ‑ka anyɩ Dɩnanɩa ‑a ‑sa 'lɛ anyɩ na ɩla ‑buun -naanɩ ‑sa na, 'naa 'palɩɛ ŋenio!

⁹ ‑A yɩɩ tooto nyɩtɛ 'nyɩ n nyɩtɛ ‑awlɩɩ 'lɛ ‑pɔtɔnʋ: Ɩ ‑ka ‑kʋ le nclɔɔ ‑ka anyɩ Dɩnanɩa ‑a ‑sa 'lɛ anyɩ na ɩla ‑buun -naanɩ ‑sa na, 'naa 'palɩɛ ŋenio!

¹⁰ Na, ncɛlɩ 'la ‑plɔlɩɛ n 'matɩnɩ 'lɛ bha? ‑Ma Laagɔ 'la ‑pɔlɩɛ bha? Ka n 'matɩ 'lɛ le n 'ka ncɛlɩ 'tʋpla bha? N ‑kaa 'matɩ le n 'kanɩ ‑awlɛ ncɛlɩ 'tʋpla na, n cɩ 'tanɩa Klisi 'la lobhoco 'plɩ.

Saa Pɔlʋ 'plɩplɩlɩ 'lɛ lobhulobhunyɔ na

¹¹ Bholiecɩnyɩ, n solui anyɩ: Dɩnanɩa* n ‑sa 'lɛ anyɩ na, ɩ 'ta nclɔɔ 'la wlɩɩn ‑naanɩ ‑glɩ.

¹² 'Nyɩ ‑awlɛ, ɩ 'ta nclɔɔ 'kʋ 'plɩlɩ ɩya ɩ 'kaan 'kʋ ŋeni naa ‑n 'ta nclɔɔ 'taan 'lɛ mɩ ca, ‑ma Zozi Klisi palaan 'lɛ mɩ.

¹³ Sa, a ya saa n nʋnʋnʋa 'lɛ ‑bɛkadaa, daa n ‑kʋa 'lɛ Zifʋnyaa* 'la gʋgwlɛa nɩkplaan na, 'la wɔlɩa 'nu. A ‑ci saa 'cizalaa ‑amʋa 'lɛ ncɛlɩa 'fɩan ‑ɔ -ka 'lɛ Klisi 'la pɔɔtɛtɛ na 'la gbaylɩsalɩɛ 'la gbʋ 'nyɩ n 'matɩa 'lɛ le n 'kaa maa nua na.

¹⁴ N via ‑nwɔ Zifʋnyaa 'la Laagɔgʋgwlɛa nɩkplaan 'nyɩ n zia 'na ‑zɔkpʋnya ɩya n 'bhlɩnya ‑bhutukpa 'kʋ, n tokadɔcɩ 'la nʋnʋgbɩa 'la 'kʋplɩlɩɛa nɩkplaan.

¹⁵ ‑Ma ɔmɔa ‑ɔ slaan 'lɛ de n 'nɔ nɩkplaan tooto 'nyɩ ɔla ŋaazɩɩnlɩlɩɛa nɩkplaan, ‑ɔ laan 'lɛ na, daa ɩ ‑plɔɔ 'lɛ 'tʋ

¹⁶ le ɔ palaan ɔla 'Cʋa ɩya n 'ka maa ‑ɔ 'ta 'lɛ Zifʋnya ‑glɩ na, ɔla Dɩnanɩa ‑sa na, n 'ta nclɔɔ 'la dɩgalɩ 'matɩ naa

¹⁷ n 'ta Zolizalɛmʋ, maa ‑ɔ 'plɩlɩ 'lɛ lobhulobhunya* ‑bɛɛ na 'bhlɩ mʋ, ‑ma 'kplookʋ ka n 'plɩ 'lɛ 'nyɩ n ya 'lɛ Aghlabʋbhlɩa 'kʋ mʋ 'nyɩ ɩla leean, n ya 'lɛ Damasɩdua 'kʋ cɔlɔ.

¹⁸ 'Nyɩ liowli ‑mɔta 'plɩ 'lɛ na, n ya 'lɛ Zolizalɛmʋdua 'kʋ mʋ le n 'ka Kefasɩ cibhlili 'nyɩ n yɔɔ clɩɩ 'kʋgba ‑ngbi cɩ li,

¹⁹ ‑ma 'bhlɩmɔɔn, n 'ta ‑buun lobhulobhunyɔ* bhlogbɩɩ 'lɩ, ‑n 'ta le ‑Kwlenyɔa bholi Zakɩ ‑tɛɛ na.

²⁰ Ɩmɩa n zie 'lɛ anyɩ na, n cla anyɩ Laagɔ 'ci kʋ lebhe ɩ 'ta yodi ‑glɩ.

²¹ 'Nyɩ n ya 'lɛ 'plɩ, n ya 'lɛ Silii ɩya Silisiibhlɩa 'kʋ mʋ.

²² ‑Ma Zudeebhlɩa 'kʋ 'la ncɛlɩa ‑ɔ -ka 'lɛ Klisi 'la pɔɔtɛtɛ na, 'ta ka kaa 'na 'klʋa 'ciinlɩ,

²³ 'bhlɩmɔɔn ma yaa 'nu lebhe: «Ɔmɔa ‑ɔ saa 'lɛ -anyɩ ‑bɛkadaa gbaylɩ na, ɔ sanɩ ‑pɔtɔnʋ Klisi 'la pɔɔtɛtɛa ɔ mʋnʋa 'lɛ gbatlɩ na, 'la 'dɩa»

²⁴ 'nyɩ ma gbaa Laagɔ 'klʋ 'na da.