Efɛzɩnyaa 'la ‑afluwaa Pɔlʋ zie 'lɛ maa na 1 - Le Nouveau Testament en langue Dida

‑Ayopalɩɛ

¹ ‑Amʋ Pɔlʋ, n ‑glɩ Zozi Klisi 'la lobhulobhunyɔ*, saa Laagɔ wabha 'lɛ na. N zie anyɩ Efɛzɩdua 'kʋ 'la ‑kplɔkplɔnyaa ‑ɔ ‑kʋlʋ 'lɛ Zozi Klisi na.

² 'Naa ‑a To Laagɔ ɩya ‑Kwlenyɔ Zozi Klisi 'la 'nyupalɩɛa ɩya mala pupuea kʋ anyɩ 'kʋ.

'Nanɩa ‑ɩ 'ta 'lɛ bhloluda ‑ka na

³ ‑A wo Laagɔ ‑evli, ‑ala ‑Kwlenyɔ Zozi Klisi To! Klisi nɩkplaan, ɔ ya ‑anyɩ 'Wugoa 'la 'nyupalɩɛa ‑tɛtɛa 'fɩan 'nyɩ, 'yɛpɩ ‑laagɔɔn.

⁴ Ɔmɔ nɩkplaan, 'fɩɔn ɩya ‑laagɔzɔan 'ka 'lɛ ‑nʋɔ na, ɔ ya ‑anyɩ desla le ‑a ka ‑kplɔkplɔnya 'plɩ ɔla ‑deliin, ɩya ma 'la ka ‑anyɩ 'gesalɩda 'lɩ. Ɔla ‑wawʋa nɩkplaan,

⁵ ka ɔ wabhaa 'lɛ bhɔdaa tooto le ɔ 'ka ‑anyɩ ɔla 'cuo ple, Zozi Klisi nɩkpaan. Sɛɛ ɩ ‑plɔɔ 'lɛ 'tʋ le ɔ nʋ, ɔla ‑danaanɔa 'la gbʋ,

⁶ ɩya ‑a kɔɔ 'klʋgbaa, 'nanɩ 'kadɩa ɔ pleli 'lɛ ɔla ‑Wawacoa 'kʋ, 'nyɩ ɔ nʋ 'lɛ ‑anyɩ na ɩla gbʋ.

⁷ ‑A ‑yɔɔsɔ 'la nebhloplɩlɩɛa nɩkplaan, ɔla ‑dolua 'la gbʋ, ‑a ya geyliin 'wlʋ. Ɔmɔ nɩkplaan, ‑ala ‑ngasɩtʋlɩɛa ya valɩɛ 'lɩ, ɔla ‑wawʋ 'kadie 'la 'sasʋʋn.

⁸ Laagɔ ya ‑anyɩ ɔla ‑wawʋa va, 'nyɩ ɔ ya ‑anyɩ dɩgalɩa ‑tɛtɛa ɩya wɔɔcibhililiea ‑tɛtɛa 'gbokalɩ.

⁹ Ɔ ya ‑anyɩ ɔla pɔɔsaa ‑ɩ ‑zizieoa 'lɛ na pala, ɩmɩa ɔmɔ 'titi zʋ 'lɛ kpo 'kʋ bhɔdaa tooto,

¹⁰ le ɩla daa ‑ka ŋeni na, ɔ 'kɩɩ 'kʋglalɩ na. Ɔ 'ka ‑laagɔzɔn bhuoa, lɩɩa ‑ɩ ‑kʋ 'lɛ ‑laagɔɔn, ɩya lɩɩa ‑ɩ ‑kʋ 'lɛ ‑dʋdʋa 'kʋ na, ‑kwleto bhlogbɩɩ 'la ‑kwleliea ‑zɔn zʋ, ɔmɔ ‑ɔ ‑glɩ 'lɛ Klisi.

¹¹ Ɔmɔ nɩkplaan, ‑a 'lɩlɩ ‑awlɛ ‑ala da. Ɔmɔa ‑ɔ zʋ 'lɛ ‑tɛtɛa 'fɩan kpo 'kʋ, saa ɔ wabha 'lɛ na, ɔ ya ‑anyɩ bhɔdaa tooto desla

¹² le ‑a ka maa bhɔdaa tooto, ‑ɔ 'tɛbhalɩ 'lɛ Klisi pɔlɛ 'kʋ na, 'la sidiin ‑naanʋa 'plɩ, ɩya ‑ɩ 'ka ɔla 'klʋgbaa 'la ‑evliwolɩɛ 'plɩ.

¹³ Ɔmɔ nɩkplaan, anyɩ ‑masɛɛ, a ya ‑nʋawlɛɛ -wɔɔnyɩtʋa 'nu, Dɩnanɩa* ‑ɩ sa 'lɛ anyɩ gbʋʋn na. Ɔmɔ nɩkplaan, a 'lɩlɩ ‑awlɛ 'lɛ pɔɔtɛtɛ, 'nyɩ 'Wugoa, ‑Kplɔkplɔ ‑Wugoa* Laagɔ talɩ 'lɛ ‑ndanyɩ 'kʋ na, ʋla 'kukuunkpoa ya 'lɛ anyɩ 'kʋ ‑zʋɔ.

¹⁴ Ʋmʋ -ʋ ‑glɩ 'lɛ 'nanɩa ‑tɛtɛa Laagɔ cɩ 'ka 'lɛ ‑anyɩ nʋ na, ɩla 'kʋklʋʋnpʋlʋʋa ‑a cɩ ka 'lɛ kalɩ ‑aan, ɩya ‑a ‑ka geylia ‑tɛtɛa nɩkplaan 'wlʋ na, ‑a kɩɩ 'lɩ, ɩya ɩ 'ka ɔla 'klʋgbaa 'la ‑evliwolɩɛ 'plɩ na.

Pɔlʋ bhibhie Efɛzɩnyaa 'la da

¹⁵ 'Lɩka wɔlɩa 'la gbʋa, ‑amʋ ‑ma, daa n ‑kawa 'nu lebhe a ya ala pɔɔtɛtɛa ‑Kwlenyɔ Zozii 'kʋ zʋ 'nyɩ a ‑ka ‑kplɔkplɔnyaa 'fɩan 'la ‑walʋ na,

¹⁶ n sɛ 'ta 'lɛ Laagɔ 'la bhɔlʋɛ 'kʋ ala gbʋ, 'nyɩ n sla 'lɛ anyɩ 'ŋlɩ 'na bhibhielia nɩkplaan na.

¹⁷ 'Naa ‑ala ‑Kwlenyɔ Zozi Klisi 'la Laagɔa, toa ‑ɔ nɩnɩ 'lɛ 'klʋagbaa na, ɔ 'nyɩ anyɩ dɩgalɩ ɩya wɔlɩzɔnwlawugo, ɩya a 'kɔɔ ‑nʋawlɛɛsa cibhlili.

¹⁸ 'Naa ɔ kalɩ ala pɔlɩa ɔla zezelia gbine, ɩya a 'ka pɔlɛkʋtɛlɔa ɔ la 'lɛ anyɩ 'kʋ na cibhlili, ɔla 'klʋagbaa 'la 'ghlilo, ‑aja ɔ 'wlalɩ 'lɛ aya ‑kplɔkplɔnyaa 'kʋ, ɩya

¹⁹ 'tɛtɩ 'kadiea ɔ pala 'lɛ ‑anyɩa ‑ɔ ‑ka 'lɛ ɔla pɔɔtɛtɛ na 'la gbʋ na.

²⁰ Ɩmɩ ɔ 'plɩlɩ 'lɛ Klisi 'kʋ, 'nyɩ ɔ ya 'lɛ pala, daa ɔ ‑bhoo 'lɛ 'kwɩɩn 'kʋ 'nyɩ ɔ zʋɔ 'lɛ ‑laagɔɔn, ɔla 'lipasɔa 'kʋ sakʋda na.

²¹ Na, Klisi ‑zilo ‑kwleliea ‑tɛtɛa, ‑kwletɛtɩa ‑tɛtɛa, 'tɛtɩa ‑tɛtɛa ɩya 'ŋlɩa ‑tɛtɛa -ɩ cɩ 'lɛ 'kʋzilo na 'kʋ, ‑n 'ta le 'bhlɛsʋʋ ‑naa ‑tɛɛ nɩkplaan, ‑ma 'bhlɛsʋan ‑ʋ ci 'lɛ 'yɛpɩ na nɩkplaan -masɛɛ.

²² ‑Ghɛɛ, Laagɔ ya ‑tɛtɛa 'fɩan Klisi 'la ‑kwleliea ‑zɔn zʋ 'nyɩ ɔ yɔɔ 'lɛ ‑tɛtɛa 'fɩan 'wluku zʋ le ɔ 'plɩ ‑laagɔnɩkplaa 'la 'wlu.

²³ A ‑glɩ ɔla 'nyɛkɛa, ɔla ‑lɩɩbhuoa ‑kʋa nɩkplaan, ɔmɔa Laagɔ 'la ‑lɩɩbhuoa ‑yelio 'lɛ na.