2 Pɩɛ 1 - Le Nouveau Testament en langue Dida

‑Ayopalɩɛ

¹ ‑Amʋ Simɔɔn Pɩɛlɩ, n ‑glɩ Zozi Klisi 'la lobhoco ɩya ɔla lobhulobhunyɔ*. ‑Amʋ ‑ɔ zie 'lɛ maa ‑ɔ 'lɩ 'lɛ pɔɔtɛtɛa ‑sakasakaa ‑ala Laagɔ ɩya gbʋʋnsanyɔ Zozi Klisi 'plɩlɩ 'lɛ 'kʋnylugolulɩɛ 'kʋ 'nyɩ ɔ gba 'lɛ ‑a 'lɩ 'lɛ na.

² 'Naa Laagɔ ɩya ‑ala ‑Kwlenyɔ Zozii 'la cibhlililiea ‑lalɩ anyɩ 'nyupalɩɛ ɩya pupue nikadieen.

Nʋnʋgbɩa ‑ɩ ‑fata 'lɛ lebhe gʋgwlanyɔ 'plɩlɩ 'kʋ na

³ Laagɔ 'la 'tɛtɩa nɩkplaan, ɔ ya -anyɩ lɩɩa ‑tɛtɛa ɩ ‑fata 'lɛ lebhe -a kalɩ ‑ala jabhʋa nɩkplaan ɩya ‑a kɔɔ gɩlɩ na 'nyɩ. ‑Masa, ɔ ya gba 'nyɩ ‑a ya ɔmɔa ‑ɔ 'plɩlɩ 'lɛ ɔmɔ 'titi ɔla 'klʋagbaa ɩya ɔla 'tɛtɩa 'kʋ 'nyɩ ɔ ya 'lɛ ‑anyɩ la na cibhlili.

⁴ 'Klʋagba ‑naa ɩya 'tɛtɩ ‑naa 'kʋ, Laagɔ 'plɩlɩ 'lɛ 'nyɩ ɔ ya 'lɛ ‑anyɩ 'nanɩ 'kadɩa ‑ɩ kalɩ 'lɛ gbʋ 'nyɩ ɔ talɩ 'lɛ ‑ndanyɩ 'kʋ na 'nyɩ le a 'ka ɩmɩ ‑naa 'kʋplɩlɩ ɩya a 'ka 'zɩa* ‑ɩ wlʋlʋ 'lɛ ‑laagɔzɔan 'la lɩɩa 'la 'tʋa nɩkplaan na, nɩkplaan 'wlʋ ɩya aya Laagɔ 'kanɩ bhlo 'plɩ.

⁵ Wɔlɩ ‑naa bhlogbɩɩ 'la gbʋ na, a ya 'lɛ ala pɔɔtɛtɛa Zozi Klisi 'kʋ zʋ na, a 'sɩslɩlɩ ɩya a mino ɩya a nʋ a 'ye 'nanɩ. A nʋnɩ 'lɛ a 'ye 'nanɩ na, a 'plɩ wɔɔcibhlilinya.

⁶ A ‑cinɩ 'lɛ wɔlɩ na, a kla acɩ 'kʋ. A klanɩ 'lɛ acɩ 'kʋ na, a 'plɩ pɔɔklanya. A ‑glɩnɩ 'lɛ pɔɔklanya na, a kʋlʋ Laagɔ.

⁷ A ‑kʋlʋnɩ 'lɛ Laagɔ na, a wabhawabhalɩ bholiecɩ 'bhisa ɩya a wabha ncɛlɩa 'fɩan.

⁸ Na, wɔɔnanɩ ‑naa ‑ka ala nʋnʋgbɩ ‑glɩ 'nyɩ a kɩɩ clɩɩa ‑tɛtɛa 'kʋplɩlɩ na, ɩ cɩ gba 'nyɩ ‑ala ‑Kwlenyɔ Zozi Klisi 'la cibhlililiea cɩ 'ca tlʋ.

⁹ Sa, ɔmɔa, ɩmɩ ‑naa 'ta 'lɛ ɔla nʋnʋgbɩ ‑glɩ na, ka ɔ ‑kʋ 'lɛ le 'citutunyɔ 'bhisa, ka ɔ 'bhubhuo 'lɛ. Ɔ ya bo le ɔla nyinyia ɔ nʋa 'lɛ ‑godogodoa na, ma yɔɔ mɩ ɩla 'zɩa cɩ -sa.

¹⁰ Ɩla gbʋ na, bholiecɩnyɩ, a vi ‑nwɔ ɩya a zi ‑bɛkadaa 'kʋ ɩya a 'ka pala lebhe aya Laagɔ 'la lalɩɛa ɩya ɔla deslalɩɛa ‑fata. 'Nyɩ gbazɩ, a ‑ka sɛɛ nʋ na, 'a cɩ 'ta nyinyiin bhlili ‑ylɛlylɛ.

¹¹ Na, 'lɩka ‑sa, ‑jioli cɩ 'ka 'lɛ ‑nyɩɔ le a ble ‑ala ‑Kwlenyɔ ɩya ‑ala gbʋʋnsanyɔ Zozi Klisi 'la Nyɩbhɛlɩdua ‑ʋ 'ta 'lɛ 'wluzɔnbhɩalɩda 'ka na nɩkplaan.

Pɩɛlɩ luoli ncɛlɩa saa ɩ ‑fata 'lɛ lebhe ma namʋ na

¹² Na, ɩla gbʋ, n cɩ 'ka anyɩ luolida 'kʋ clɩɩa 'fɩan, ka a ‑kaa 'mɩɩ ‑ci 'titio na ɩya a 'ka -nʋawlɛa ma ca 'lɛ anyɩ na kʋlʋ kpaan.

¹³ 'Nyɩ, n gugu lebhe n ‑kʋ ka 'lɛ ‑laagɔzɔan na, ɩ 'nylugoluo 'kʋ le n luoli anyɩ wɔlɩ ‑naa ɩya a 'la ka ŋɔmʋ,

¹⁴ sa n ‑ci lebhe 'ɩ cɩ 'ta ‑gwlɛlɩ 'nyɩ n cɩ 'ka 'lɛ anyɩ cɩɩnwlʋlʋ, saa ‑ala ‑Kwlenyɔ Zozi Klisi palaan 'lɛ mɩ na.

¹⁵ ‑Ma, n cɩ 'ka saa 'fɩan nʋ ɩya daa n cɩ 'ka 'lɛ anyɩ sidiin 'wlʋ na, a 'ka mino ɩya a 'ka ‑azla cacawɔlɩ ‑naa luoli.

¹⁶ Na, ‑n 'ta 'ninipalɩɛ nɩkplaan, ‑a 'ta 'lɛ gba 'nyɩ a 'ta 'lɛ ‑Kwlenyɔ Zozi Klisi 'la ciliea ɩya ɩla 'tɛtɩa cibhlili, ‑ma ka ‑ala 'ci 'lɩɔ 'lɛ ɔla 'klʋagbaa nɩkplaan.

¹⁷ Sa, ɔ ya 'ŋwleenfalɩlɩɛ ɩya 'klʋagba To Laagɔ wlɩɩn 'lɩlɩ, daa ɔ 'nu 'lɛ ‑blɩɩzɔan ‑ʋ 'wlʋlʋ 'lɛ Laagɔ 'bhlɩ 'nyɩ ʋ 'cla 'lɛ lebhe: 'Lɩka 'na ‑wawaŋodicoa, ɔmɔa ɩ mɛmaan 'lɛ pɔlɛ 'kʋ le n sla de na.

¹⁸ Na, ‑blɩɩzɔn ‑naa ‑ʋ 'wlʋlʋa 'lɛ ‑laagɔɔn na, ‑anyɩ 'titi, ‑a yaa 'mʋʋ 'nu, daa ‑a ‑yɔɔsɔ ‑kʋa 'lɛ ‑kplɔkplɔ ‑kikea 'wlu na.

¹⁹ Na, Laagɔnekʋnyɩtɛnyaa* 'la wɔɔnyɩtʋa gba 'nyɩ ‑ala pɔɔtɛtɛa 'ghlibholi. 'Nyɩ ɩ nanɩ le a falɩʋ pɔlɛ cɩ, sa ka ʋla wɔlɩa ‑kʋ 'lɛ le saa ‑kanie ŋamanɩ 'lɛ dabhlo 'tutu nɩkplaan ‑aan 'nyɩ ‑zeli ze 'lɛ na, ɩya ziplizoliea 'ka 'kʋbho ɩya ɛ 'ka ala pɔlɩa nɩkplaan leli.

²⁰ ‑Ma, ‑bɛɛ, ɩ nanɩ lebhe a cibhlili sɛɛ lebhe: Nclɔɔ bhlogbɩɩ cɩ 'ta ɔla 'wluun 'manɩ ɩya ɔ 'ka Laagɔnekʋnyɩtɛnyaa 'la wɔɔnyɩtʋa ‑ʋ ‑kʋ 'lɛ Zieziewɔlɩa* nɩkplaan na ‑zɔnsa.

²¹ Sa, ‑n ta Laagɔnekʋnyɩtɛnyaa 'titi -ɔ 'ta 'lɛ mala 'wluun 'manɩ le ma 'ka Laagɔ 'la wɔlɩ nyɩtɛ. ‑Ma, ‑Kplɔkplɔ ‑Wugoa* 'la klalɩɛ nɩkplaan ncɛlɩ nyɩtɛlɩ 'lɛ Laagɔ ne 'kʋ.