Filemona 1 - Nouveau Testament en Kilega

Mukanda Wasingaga Paolo ku Filemona. Paolo, nu Timoteo Bekusambizia Filemona.

¹ Paolo, mukandua wa Klisto Yesu, nu Timoteo mubuto weitu, ku Filemona mutundua weitu nu utukukitaga nage mulimo umozi,

² nu ku Apia mubitu weitu, nu ku Akipo mukoloboyo muneitu, nu ku ekelezia lili mu numba zobe:

³ Mponga kumuli nu bubobelelo bukutukaga ku Kalaga Tateisue nu ku Mukota Yesu Klisto.

Paolo Ekubogaboga hu Kalaga ku Misako za Filemona.

⁴ Nkusimaga Kalaga wane bindi binsania, nkukusegelaga,

⁵ ku­buno nkungua ku musagu wa lutundo luobe, nu bukatizio bobe buguli nabo ku Mukota Yesu, nu ku basuagibua bansania.

⁶ Nku­kusegela buno kugomia kuabo nobe nu bukatizio bobe kukuba­menesia busoga butuli nabo mu Klisto.

⁷ Kubuno nabezaga na mbogimbogi nnene nu kubobelezibua mu lutundo lobe, kubuno, mubuto weitu, wabogeziebogezie basuagibua.

Paolo Ekusengezia Filemona.

⁸ Kububo ninamenya kukukakizia mu Klisto kububo buligo,

⁹ tondo ku kabamba ka lutundo nkukusengezia, anga bubuno bunse mukungu nne Paolo, nu kano kaluma mukandua wa Yesu Klisto:

¹⁰ nkukusengezia ku kabamba ka muana wane, unabutile mu kukandua kuane, Onesimo,

¹¹ ntalingaga kukusuagila, tondo kano kaluma esatusuagila:

¹² namusubia kuguli, we ese anga nne kuguli:

¹³ natundaga kuikala nage, buno ankitile anga bugunakitide mu musagu musoga:

¹⁴ tondo nsiatundile kukita butakutunda; tondo busoga bobe tabube kankanka ku kukakizibua, tondo anga bukutunda,

¹⁵ Kubuno embe ku bubo ukinsa anzukene nobe bindi bimozi, buno wikale lingo nage milialia.

¹⁶ Kano kaluma nteli lingo mukobe, tondo ese mubuto wobe nu namutunda nunse, nu eli mubuto wobe ku kubutua nu mu Mukota.

¹⁷ Umpa­nga ndi ukunkengela buno nagomia nobe, kasi sekela wono anga bugunansekela.

¹⁸ Nu ndi akuagide, aba ndi eli na nsombi, nti wambuziazo;

¹⁹ nne Paolo nowasanza nnenyene, buno nalige: nsikutundanakuganzila bitondo bisoga binakukitide.

²⁰ Umpanga, mubuto wane mbogiembogie mu Mukota: nu mbogiembogie mu Klisto.

²¹ Kubuno bukunanzaga ukinsa nakusanzila, nizi buno wakite nunse bunkutenda.

²² Nu nkutunda wankungila kiziki kia kuikala: kubuno mukunsegela buno nivue kueinyu.

²³ Epapulo, unakandilue nage mu Yesu Klisto, akusambizia;

²⁴ nu Malako, nu Alisitako, nu Dema, nu Luka, benkukita nabo mulimo umozi bakusambizia.

²⁵ Mponga za Mukota weitu Yesu Klisto zibe nobe. Amena.