Markus 1 - Novo Testamento

Yohan Te Taafer sayn mensaaj

¹ Tas is te aanfank fon te kuut naychkheet woo iwich Yeesus Kristus xprecht.

² Im puch fom profët Isaiias is kexrip kep iwich iim: “Hërkot saat: Ich xike mayne mensajeyer foer tich fer tayne weech prepareere.”

³ Un te profët hot aach kexrip: “Yemant is am xraaye im tesërt: Prepareyert te weech fer te Hër torich keen! Macht richte weeche uf fer iim!”

⁴ Un soo waar tas Yohan Te Taafer im tesërt tsum foerxayn khom is, tas folek am taafe un ti mensaaj am aan saan: — Royert aych fon ayre sinte un lost aych taafe, tan tuut Hërkot aych fertsaye.

⁵ Fiile pewooner fon te rechioon fon Yutëya un fon te xtat Yeruusalëm waare Yohan aan heere kang. Ti hon sayn sinte kepaycht, un Yohan hot se ketaaft im Jortan flus.

⁶ Eyer hot sich keklayt mit en tsaych woo mit khameele haut kemach kep waar un en leter këtel un hot kraas hupser un wilte hoonich kes.

⁷ Eyer saat fer tas folek: — Noo mich khomt yemant woo mee important is wii ich, un ich sin es net weyert mich se pike fer tëm sayn santaale uf pine.

⁸ Ich taafe aych mit waser, awer tee wërt aych taafe mit em Hayliche Kayst.

Yeesus sayne Taaf

⁹ In tee keleechenheet is Yeesus fon Nasarëë in Kalilëya aan khom, un Yohan Te Taafer hot em ketaaft im Jortan flus.

¹⁰ Im momënt woo eyer raus fom waser am khome waar, hot Yeesus te himel sich uf mache kesiin un em Hërkot sayne Kayst runer khome wii en taup iwich iim.

¹¹ Un fom himel is en xtim khom: — Tuu pist mayne liipe soon un kepst mich fiil frayt.

Yeesus sayn fersuuchung

¹² Klaych tëm noo, hot te Kayst Yeesus noo em tesërft keen kemach.

¹³ Yeesus is fërtsich taache lang too keplip, woo Satanaas iim fersuuchunge foer kextelt hot. Uf tëm plats waar wilte tiire un ti ëngle hon em uf kepast.

Yeesus fangt sayn aarwat aan in Kalilëya

¹⁴ Wii Yohan xon in ti katee khom waar, is Yeesus noo Kalilëya kang, Hërkot sayn kuute naychkheete am aan saan.

¹⁵ Eyer saat: — Ti tsayt is khom. Te Hërkots Raych is ticht. Royert aych un klaapt an te ewankeelium!

¹⁶ Yeesus waar langst te rant fon te Kalilëye lakoo am keen wan eyer tswaay fixer kesiin hot. Tas waare Simon un sayne pruuter Antrëas, woo an ti lakoo waare, am fixe mit netse.

¹⁷ Yeesus hot tëne kesaat: — Khomt mit mich, ich tuun aych lërne mënxe fixe.

¹⁸ Tan, hon se klaych ti netse laye kelos un sin mit Yeesus kang.

¹⁹ En pisye wayter, hot Yeesus anere tswaay priiter kesiin. Waare Tiaako un Yohan, Zebedeu sayn puuwe, woo uf sayne poot waare, ti netse am flike.

²⁰ Yeesus hot ti tswaay keruuf, un tii hon Sepeteu, iire fater, un sayn knechte uf em poot kelos un sin mit tëm kang.

En man tomineyert fon en xlechte kayst

²¹ Yeesus un ti tisiple sin an ti xtat Kafarnaum aan khom un, am samstach, is eyer in ti sinakook unterichte kang.

²² Ti layt woo em aan keheyert hon, hon sich aarich ferwunert mit tëm sayne kexik fer se unterichte. Yeesus hot keuntericht mit sayn aychent autoriteet un net wii ti Kesets mayster.

²³ Tan, is too en man aan khom woo fon en xlechte kayst tomineyert waar. Te man hot kexraayt:

²⁴ — Was wilst tuu fon uns, Yeesus fon Nasarëë? Pist tuu khom fer uns fernichte? Ich wees kans kenau weyer tuu pist: pist te Hayliche woo Hërkot kexikt hot!

²⁵ Tan hot Yeesus en ortnung kep fer te xlechte kayst: — Hal tayn xnis un kee aus tëm man!

²⁶ Too hot te kayst te man kexitelt mit kewalt un, en xraay am kewe, is eyer raus kang fon tëm.

²⁷ Al hon sich ferwunert un saate eene fer te anere: — Was sol tas petayte? Tas is en nay untericht mit autoriteet kep. Tee xikt sokaar an ti xlechte kayste, un tii tuun iim aan heere.

²⁸ Un Yeesus sayne naame is klaych pekhant kep in te kans rechioon fon Kalilëya.

Yeesus heelt Pheeter sayn xwiicher moter

²⁹ Klaych tëm noo, sin Yeesus, Simon, Antrëas, Tiaako un Yohan aus te sinakook kang un sin pis an Simon sayn haus kang.

³⁰ Simon sayn xwiicher moter waar im pet, mit fiiwer. Soo wii Yeesus aan khom is, hon se tëm fertseelt tas sii krank weyer.

³¹ Eyer is ticht pay se kang, hot tëm sayn hant fest kehal un hot se keholef uf xtaye. Te fiiwer is wech kang fon te fraa un tii hot aan kefang se xafe fer ti mëner se petiine.

Yeesus heelt fiil layt

³² Foer nacht, wii ti sun xon uner kang waar, hon se ti kranke un layt woo tomineyert waare fon temoone pis pay Yeesus kenom.

³³ Tas kanse folek fon te xtat hot sich kesamelt foer em haus.

³⁴ Yeesus hot fiil layt kuriert fon aler sorte krankheete un hot fiil temoone aus kextoost. Eyer hot ti temoone net xpreche kelos, wayl tii wuste weyer Yeesus waar.

Yeesus saat te ewankeelium aan in Kalilëya

³⁵ Moynts kans frii, wii es noch tunkel waar, is Yeesus uf kextii, is aus te xtat kang un is uf en tesërt plats kang un is too keplip am peete.

³⁶ Simon un sayn khameraate hon Yeesus uf ale plets kesuucht.

³⁷ Wii se em kefun hon, hon se kesaat: — Al sin aych am suuche.

³⁸ Yeesus hot keantwort: — Meyer keen noo te wile woo ticht too rom sin, tas ich te ewankeelium aach too aan saan khan, wayl is fer tas woo ich khom sin.

³⁹ Yeesus is iwer ti kans Kalilëya kang, te ewankeelium am aan saan in te sinakooke un temoone fort am yaae.

Yeesus heelt en lepra kranke

⁴⁰ En lepra kranke is ticht pay Yeesus khom, hot sich kekniit un saat: — Hër, ich wees tas tuu mich heele khanst wënst tuu wilst.

⁴¹ Yeesus hot em aarich ketauert, hot aan em kethupt un saat: — Yoo! Ich wil. Tuu pist keheelt.

⁴² Im selwiche momënt is ti lepra ferxwun un tee is keheelt kep.

^43-44 Un Yeesus hot xtram tii ortnung kep: — Kuk! Saa tas fer nimant, awer kee ferlange fer te priister tas tee tich unersuuche sol. Tëm noo, fer se pewayse tas tuu kuriert pist, kee ti opfer mache woo Mooses kexikt hat. Tan hot Yeesus iim fort kexikt.

⁴⁵ Awer, te man hot aankefang fiil se xpreche un hot ti naychkheet ferprayt. Tesweche, khont Yeesus net mee fray in ti xtet rin keen, awer is yaus keplip, in tesërte plets. Un layt fon aler sayte sin em uf suuche khom.