1Pheeter 1 - Novo Testamento

Pekrisung

¹ Ich, Pheeter, Yeesus Kristus sayne aphostel, xraywe tee priif fer Hërkot sayn folek woo ferxtraut leept in te prowinse fon Pontus, Kalatia, Kapatosia, Aasia un Pitiinia.

² Teyer sayt aus kesuucht kep tëm noo Hërkot, te Fater, sayne wile. Un torich Hërkots Kayst sayt teyer een haylich folek kemach kep, fer Yeesus Kristus aan se heere un purifikeyert kewe torich sayn pluut. Tas teyer, mee un mee, te knaate un te friite fon Hërkot pehalt!

Hofnung tswixe ti proope

³ Keloopt say te Hërkot un Fater fon unser Hër Yeesus Kristus! Weche sayn kroos paarmhërsichkheet, hot eyer uns en nay leewe kep torich Yeesus Kristus sayn peleepung. Tesweche is unser hërts fol fon en leewent hofnung.

⁴ Soo, hofe meyer ti rayche seechnunge se hon woo Hërkot uf heept fer sayn folek. Tee tuut se uf heepe im himel, woo se net te weyert ferleere un khëne net fertërept kewe un net fernicht kewe.

⁵ Tii seechnunge sin fer aych woo, torich em klaawe, uf kehoop kept torich Hërkot sayn macht fer ti retung woo fërtich is fer reweleyert se kewe am ën fon te tsayte.

⁶ Frayt aych tesweche, wën teyer yets traurich playpt iwer en khorts tsayt, weche te fiile sorte proope woo teyer am mit mache sayt.

⁷ Tii proope sin fer se tsayche tas ayre klaawe echt is. Wayl sokaar tas kolt, woo ferxmolst kewe khan, kept im fayer keproopt. Kraat soo, te klaawe woo teyer het, woo fiil mee kilt wii tas kolt, mus in proop kextelt kewe tas er wayter fest playpt. Un soo kriit teyer ti aproweerung, ti kloor un ti eere am taach woo Yeesus Kristus reweleyert kept.

⁸ Teyer liipt iim, toch oone iim kesiin hon, un klaapt an tëm, wën teyer ach tëm net yets am siin sayt. Soo tuut teyer aych fraye mit soo en kroos un kloorix frayt, tas ti wërter es net pexraywe khëne.

⁹ Teyer het tii frayt wayl sayt ayer retung am kriin, woo resultaat is fom klaawe woo teyer het.

¹⁰ Es waar iwich tii retung woo ti profëte kefroot un kesuucht se wise hon mit kroos acht. Ti hon profetiseyert iwich ti retung woo Hërkot fer aych kewe teet

¹¹ un wolte wise in was fer tsayt tii retung paseere teet. Kristus sayne Kayst, woo in tëne waar, hot ti tsayt kewiis, wan eyer ti layte aan kesaat hot woo Kristus aus hale mist un ti kloor woo tëm noo khome teet.

¹² Wan ti profëte kexproch hon iwer ti woerheete woo teyer yets am aan heere sayt, hot Hërkot tëne reweleyert tas ti aarwat woo se am mache waare net fer tëne iire aychne penutsung weyer, awer fer kuut se sin fer aych. Ti mensajeyer fom ewankeelium, woo torich ti macht fom Hayliche Kayst fom himel kexikt am xpreche waare, hon ti woerheete fer aych aan kesaat. Tas is tings woo sokaar ti ëngle kërn ferxteen teere.

En haylich leewe

¹³ Also, playpt fërtich fer in se krayfe. Halt ayre ketanke wach un tuut ayer hofnung an ti seechne woo aych kep wërt wan Yeesus Kristus reweleyert kept.

¹⁴ Tuut Hërkot aan heere un lost net tas ayer leewe tomineyert kept fon tëne winxe woo teyer hat wan teyer noch net ti woerheet kekhënt hat.

¹⁵ Im keeche teel, sayt haylich in ales was teyer mache tuut, soo wii Hërkot, woo aych keruuf hot, haylich is.

¹⁶ Wayl ti Hayliche Xrifte saan: “Sayt haylich wayl ich haylich sin.”

¹⁷ Wan teyer Hërkot aan peete tuut, ruuft teyer iim Fater, tee woo mit ekaliteet ti layt julkeere tuut, tëm noo mit was yeete ëne kemach hat. Also, iwer te rest fon ayer leewe hier uf te eyert, het rexpekt fer iim.

¹⁸ Wayl teyer wist te prays woo petsaalt kep waar fer aych pefraye fom unnutsliche leewe woo teyer keërept hat fon ayre foerkhomer. Tee prays is net etwas woo sayne weyert ferleere tuut wii kolt un silwer.

¹⁹ Teyer sayt pefrayt kep torich tas tayre pluut fon Kristus, woo waar wii en xeefye oone feeler ore fleke.

²⁰ Hërkot hot iim aus kesuucht eep ti welt ketsoo kep waar un is reweleyert kep in tëne letste tsayte fer kuut fer aych.

²¹ Torich iim tuut teyer an Hërkot klaawe, woo iim peleept hot un hot em kloor kep. Soo, te klaawe un ti hofnung woo teyer hot sin an Hërkot fest kextelt.

²² Yets woo teyer aych xon sauwer kemach hot torich tas aan heere fon te woerheet un yets woo teyer xon te echte liipe fer ayre priiter im klaawe het, liipt ëne em anere mit ale kraft un mit en sauwer hërts.

²³ Wayl teyer, torich tas leewent un eewich wort fon Hërkot, sayt noch mool kepoer kep, net als khiner fon xtërwliche eltre awer als khiner fon en Fater woo unxtërwlich is.

²⁴ Wii ti Hayliche Xrifte saan: “Ale mënxe sin wii planse fom khamp, un tëne sayn kroosheet is wii ti pluum fon tëne planse. Ti plans trokent, un ti pluum falt ap,

²⁵ awer em Hër sayn wort halt fer imer.” Tas wort is te ewankeelium woo fer aych aan kesaat kep is.