तीतुस 1 - परमेश्‍वर उन खरा वचन व्‍हाशोद नियम

¹ पौलुस उन दी टु जो परमेश्वर उन दास अदिक यीशु मसीह अन्द प्रेरित हुन. नाम मंडली इन खरा ग्यान इन अगुवाई माळोर साटी कळकु आग्याद अदिक सच्चाई इन पयचान जो भक्ति इन अनुसार आद,

² आ अनन्त जीवन इन आशा मा यदुर्द वादा परमेश्वर, जो ख्वाटा माताळालुन सनातन देल माळ्यान,

³ लेकीन सही समय मा तान वचन इक आ प्रचार इन द्वारा प्रगट माळदुन, जो नाम उद्धारकर्ता परमेश्वर उन आग्या अन अनुसार नानी सौप्सकु आग्याद.

⁴ तीतुस उन हेसुर, जो विश्वास इन सहभागीता अन्द विचार देल नान खरा पार हुन: परमेश्वर आप्प अदिक नाम उद्धारकर्ता मसीह यीशु उन दी टु नीनी अनुग्रह अदिक शांती सिकतेला ईरूल.

क्रेते दा तीतुस उन कार्य

⁵ ना इदुरसाटी नीनी क्रेते दा बिटकु बंदिदीन कि नी मिग्द मातगोळ्द सुधारन माळ्या, अदिक नान आग्या अन अनुसार नगर नगर स्याणागोळी नियुक्त माळ्या.

⁶ जो निर्दोष अदिक ऊंदा हिंग्स उन गंळ्स ईरूल, यारोर चिकोर विश्वासी ईरूल, अदिक अनुशासन इन हिनता अन्द दोष आंदुर मा हचकु ईला आग सकुल तथा आंदुर निरंकुश भी ईरबाळुल.

⁷ यतिकी मंडली इन अध्यक्ष उक परमेश्वर उन कार्य अन निरीक्षक आगा कारण आव निर्दोष ईर पायजे; आऊक ना हटीला, ना सिट्ट, या कुडावाळा, या झगळेलु, या पैस्या अन लालची ईला ईर पायजे,

⁸ लेकीन पाऊनागोळ्द आदर माळावाळा, भलाई इक चाहसावाळा, संयमवाळा, न्याय माळावाळा, पवित्र अदिक सभ्यताशील ईरूल;

⁹ आऊक आ विश्वास माळा योग्य अदिक सिद्धांतगोळ मा सयमत आगावाळा बातणी इक मजबूती देल हुडुकु ईर पायजे ई प्रकार आव लॉकुरी सही शिक्षा कोटकु आंदरी प्रोत्साहित माळुल अदिक ईदुर दा सांगुळ जो ईदुर विरोधी आर आंदुर्द खंडन माळ सकुल.

¹⁰ यतिकी हापाळ सा लॉकुर निरंकुश, व्यर्थ माताळावाळेर अदिक ध्वाका कोळावाळेर आर; यक्कुल माळकु यहूदी दा टु बंदार.

¹¹ ईद जरूरी आद कि ईंदुर बाय बंद माळ पायजे. यतिकी ई लॉकुर नीच कमाई साटी अनुचित मातगोळी कल्सकु मान्ना अन्द मान्ना बिगळुस बुळतार.

¹² आंदुर दा टु ऊंद क्रेते नोर अच भविष्यवक्ता, तान लॉकुर बारा दा खुद अंदान, “क्रेते अन निवासी हमेशा ख्वाटा माताळतार आंदुर आळी दाकळोद जनावर आर अदिक आलसी व्हाट्टा तुमावाळेर आर.”

¹³ ईद गवाही सत्य आद, इदुरसाटी आंदरी कळकता देल चेतावनी कोळतोग कि आंदुर विश्वास दा पक्‍का आगेगुल,

¹⁴ अदिक यहूदीगोळ्द कहानी कात्‍तागोळ अदिक आ मंळसागोळ्द आग्यागोळ मा मन हचबाळुल, जो सच्चाई इन हादी देल काळदोगतार.

¹⁵ शुद्ध लॉकुर साटी सप्पा वस्तुगोळ शुद्ध आव, लेकीन अशुध्द अदिक अविश्वासीगोळ साटी येनु भी शुद्ध हैलेच, उलटा आंदुर्द बुद्धी अदिक विवेक येढ्ढु अशुध्द आव.

¹⁶ आंदुर अनतार कि नाव परमेश्वर उक अरूतेव, लेकीन तान क्याल्सा देल आऊन इनकार माळतार; यतिकी आंदुर बेकार अदिक आग्या ईला मानसावाळेर उर, अदिक यातोदु वळ्लीद क्याल्सा अन लायक हैलेच.