२ तीमुथियुस 1 - परमेश्‍वर उन खरा वचन व्‍हाशोद नियम

¹ पौलुस इन दी टु जो परमेश्वर उन इच्छा देल मसीह यीशु उन प्रेरित आन, अदिक यारी यीशु मसीह दा ऊंद आगोर साटी वादा अन प्रचार माळोर साटी कळ्यान,

² प्रिय पार तीमुथियुस उन हेसुर: परमेश्वर आप्प अदिक नामव प्रभु मसीह यीशु उन दी टु नीनी अनुग्रह अदिक दया अदिक शांती सिकतेला ईरूल.

धन्यवाद अदिक प्रोत्साहन

³ याता परमेश्वर उन स्यावा ना तान आप्प दादागोळ रीति मा शुद्ध विवेक देल माळतीन, आऊन धन्यवाद आगुल अदिक ईळ्लक हागुल याग ना प्रार्थनागोळ दा नीमी हमेशा याद माळतीन, अदिक आऊक धन्यवाद माळतीन.

⁴ अदिक नीन कण्ण दाकळव नीर इन याद माळ माळकु दिल देल नीनी भेंट माळोद लालच ईटतीन कि खुशी देल तुमेगाईन.

⁵ ना नींद आ खरा विश्वास इक याद माळतीन, जो पयले नीन आजी लोईस अदिक नीन मोय यूनीके दा ईरोद, अदिक नानी पुरा यकीन आद कि अदा विश्वास नीन दा भी आद.

⁶ ईदा कारण ना नीनी याद कोळतीन कि नी आ वरदान इक जित्‍ता ईट जो नीन म्याकुच नांद कय ईटदुर द्वारा परमेश्वर नीनी कोटान.

⁷ यतिकी परमेश्वर नामी अंज्क इन ईला लेकीन सामर्थ्य अदिक प्यार अदिक संयम इन आत्मा कोटान.

⁸ इदुरसाटी नामव प्रभु उन गवाही देल, अदिक नान देल जो मसीह अन कैदी आईन, लज्जित आगबाळ, लेकीन आ सामर्थ्य जो परमेश्वर नीनी कोटान अदुर अनुसार खुशखबरी साटी नान सांगुळ दुख नेगु

⁹ याव नामी ऊळस्यान अदिक पवित्र जीवन जीऊसोर साटी नामी कारदुन, अदिक ईद नाम क्याल्सा अन अनुसार ईला लेकीन आऊन उद्देश अदिक अनुग्रह अन अनुसार आद. आव ईद अनुग्रह नाम मा माळ्यान मतलब प्रभु यीशु मसीह अन द्वारा काल इन सुरूवात देल नाम मा आग्याद,

¹⁰ लेकीन ईग नाम उद्धार माळावाळा मसीह यीशु उन प्रगट आगोद द्वारा प्रगटीत आत, याव मृत्यु उन सामर्थ्य अन नाश माळदुन अदिक जीवन इक खुशखबरी इन द्वारा प्रगट माळदुन.

¹¹ यार साटी परमेश्वर नानी प्रेरित, अदिक शिक्षा कोळावाळा नियुक्त माळदुन, ताकी ना खुशखबरी इन प्रचार माळाईन.

¹² ई कारण ना ई दुखगोळी भी नेगुतीन, लेकीन नाचालीन, यतिकी ना आऊक यार मा ना विश्वास माळदीन, अरूतीन; अदिक नानी विश्वास आद कि आव नांद धरोवर इंद आ दिन ताका रखवाली माळ सकतान.

¹³ जो सही मातगोळ नी नान बाय देल केळ्या अवरी आ विश्वास अदिक प्यार इन सांगुळ, जो मसीह यीशु दा आद, तान आदर्श माळकु ईट,

¹⁴ अदिक पवित्र आत्मा अन द्वारा जो नाम दा समुस्कु आद, ई वळ्लीद मातगोळ रखवाली माळ.

¹⁵ नी जान्सत्या कि आसिया नगर वाळेर सप्पा मुंदुर नान से तिर्गेग्यार, यारदा फूगिलुस अदिक हिरमुगिनेस आर.

¹⁶ उनेसिफुरूस उन घराना मा प्रभु दया माळुल, यतिकी आव हापाळ अनली नानी सुख पोहचुस्यान, अदिक आव नान शंकलीगोळ दा ईत्‍तुर देल नाचीदिल.

¹⁷ लेकीन याग आव रोम दा बंदुन, रा यागासताका ना सिकिदील आगासताका आव नानी ढुंढ्सतेला ईत्‍तुन, अदिक नान से मुलाकात माळदुन

¹⁸ प्रभु माळुल कि आ दिशी आऊन मा प्रभु उन दया आगुल अदिक जो जो स्यावा आव इफिसुस दा माळ्यान अवरी भी नी वळ्लीद देल जान्सत्या.