TITO 1 - Ghomala New Testament

Ca'tə

¹ Myə Polo, gɛfa' Si, gɛ nthəm Yeso Kristo, nə lɑ pɔ pyə Si ci wap a nə gɔ nə piŋnthʉm ba nə nə́ zhyə́ nwə nyənyɔ po nə lɑ mku' biŋ,

² nthʉm nə mɔktə vɔk mama yə Si yə e tə́ shwanwə a pɑ́ lə la' ŋkha'nyə tə nə mɑ fǐ gu',

³ a piŋ bɑ nə cwə yə́ e lə́ yap a, e la'tə̀ ghɔm tsyə nə ŋkhʉɔ yə e lə hɑ̌ bəm shyə m̀ nə pa' Si, Cyəpɔ yɔk pɑ lə yap a.

⁴ Bi Tito mú a nyənyɔ nthʉm piŋnthʉm yɔk pɑ: a gho' pu hwitə pɑ bú shyə m nə Si Tá ba m nə Kristo Yeso Cyəpɔ yɔk pɑ.

Nə ghə ŋkhɛ nə́ cu'tə pɔ Kristo Kreta

⁵ A pɑ gɑ́ ŋkhe nthak o Kreta, bɑ a bɑ́ gɑ́ o miŋ nə ghə ŋkhɛ biŋ jap mghətso pɑ cya bǎ nə ya tisuŋ lə́ pa' ŋ də nə da'tə bu a.

⁶ Bǎ ya mo lə nə pú gɔ pɑ́ mo yə pu tə́ gɔ pɑ kyak e a pɑ́, pɑ́ dhə́ ta' mjwǐ, a po pyə ghə piŋnthʉm tə bi a pɑ pu lə ghɔm gɑ̀ wap ghiŋ cwəpuŋ kɑ m gɑ́ wap tə ju'nyə a lə.

⁷ Mo yə e dé pɔ a gɔ pɑ mo yə pu tə gɔ kyak e nə yə nə pɑ ŋkho nthɛ Si a pɑ́: E lə pɑ ŋa'nɑ́, e lə pɑ ŋkhamshɛ, e lə pɑ nwə́ mlù', e lə pɑ nthuŋkwà, e lə pɑ shə́ŋ fʉ' kuso.

⁸ E gɔ pɑ dɑ mghʉ̀ɔ, pɑ so nwə pɑpúŋ pɑ gɛ msə̀m, pɑ dəŋdəŋ, pɑ dɔlɔ̌, pɑ bɑ ě zhyə nə tɔm nɑ é,

⁹ bɑ ě cəŋtə nthɔm ghɔm piŋnthʉm, tsyə a bɑ ǎ pəmtə nə ywə yə pu ji'tə a. E gɔ pɑ́ bɑ ě ku' nə səso pɔ nə nwə dɔlɔ̌ ba nə kəŋnyə tɛshwə̀.

¹⁰ Pɑ tə yu'nyə, pɑ ghɔm vəŋ mghɔ̀m nə fʉtə́ pɔ̀ bɑ wap yɔm cəcɑ̌ pɔ pyə a bɑ pu lě bvo wap a.

¹¹ Cɑ́ mshwə̀ map. Wap ji'tə ywə yə a ka puŋ nə ghə, ywə yə a bɑ pɑ ywə mfʉm, bɑ nwə kuso a bi mtuŋdyə bɑ nə bva' wap.

¹² Mu' mo cəcɑ̌ pú, gɔm ghɔm Si yap lə ghɔ̌m gɑ: Pɑ Kreta, mcwanwə nə guŋ mcwə awɛ, mnɔm shɔkcɔk, mvàm tə fa'.

¹³ Yəŋ kwǐnthɛ bɑ nyənyɔ, a po'o tə o gɔ tɔk wap shɔkcɔ̌k po'o gɑ wap ghə piŋnthʉm dɔlɔ̌.

¹⁴ Wap kɑ la nɑ́ tsap nə tsə pomkəfeli pɑ Yudea ba nə mco' pɔ pyə wap fɛ mnyə nə nwə nyənyɔ a.

¹⁵ Guŋ ywə awɛ bɑ dɔlɔ̌ bi pɔ pyə́ wap bɑ dɔlɔ̌ a. Da' gɑ́ sɔ' m nə pɔ pyə wap bɑ wap viŋ nɑ tsap, biŋ bɑ ŋkhəŋnyə nə piŋ a, sɔmywə tə́ bɑ dɔlɔ̌ pɑ́; zhyənwə yap pu a tʉm tsap bɑ ǎ viŋ.

¹⁶ Wap gə pa' a bɑ wap zhyə Si a da' gɑ bɑ shyə m̀ nə mfa' map bɑ ŋkhəŋnyə e. Wap bɑ wap pɔk, bɑ mtʉɔthə́, bɑ wap ka ku' nə sɔm fa' pɑpúŋ.