ROMA 1 - Ghomala New Testament

Ca'tə

¹ Myə Polo, gɛfa' Yeso Kristo, bɑ Si ké a gɑ̀ bɑ́ gɛ nthəm, shwɔ' a gɑ bɑ siŋ Cuŋ pɑpuŋ ě.

² Cuŋ pɑpuŋ yə e lə la' shyə m nə mghɛ ghɔm ghɔ̀m tsyə́ ŋkha' nthʉm Mŋwa'nyə dɔlɔ̌ a.

³ Cuŋ pɑpuŋ bɔ gɔmnwə nə Mú e yə e nthəm nə ŋkhənyə David nə bap nɑ́ a.

⁴ E shyə m̀ nə Zhwenyə Dɔlɔ̌ bɑ Mu sǐ, bɑ e ghə tʉɔ shyə m nə yə nə yam nə vʉ̌, yʉ Yeso Kristo Cyəpɔ yɔk pɑ.

⁵ A lě shyə m nə e pyə kwi gho' nə pɑ́ gɛ nthəm nə cya pɔ nə nə́ yu'nyə nə piŋnthʉm, nə́ ghu'tə tso tsyə, shya gúŋ pɑ tə pɑ́ pɑ Yudea,

⁶ pyə ba wɔ yɔ bɑ wap a, wɔ pyə Yeso Kristo ŋkhe wɔ a.

⁷ A gho' ba hwitə yə a fɑ bi Si, Tá yɔk pɑ, ba m bi Cyəpɔ Yeso Kristo a pɑ bi guŋ pɔ pyə Si ŋkhuŋ wap Roma a, bi pɔ dɔlɔ̌ shyə m pa' Si ŋkhe wap a, bi po.

Polo pu a pɔ Kristo Roma

⁸ Gɑ̌ wə də́ŋdzə go'tə Si a nə guŋ yɔ awɛ shyə m nə́ Yeso Kristo: Pu nthʉm gùŋ dzʉ awɛ shyanyə gɑ pǒ bíŋ.

⁹ Nə pa' Si wə bɑ ŋkwinthɛ̌ a, yʉ yə gɑ fa' bi e nthʉm zhwenyə á nə cwə nə siŋ Cuŋ pɑpuŋ Mú e a: gɑ̌ nthʉ tso tsɔ tə pwa;

¹⁰ bɑ do nthʉm mcwyɛ'nyə mə̌ nə ghə sɔ̀ nə sɔ' wə po pa' e yɔ a.

¹¹ Nə yɔ wɔ́ wə́ nthəŋ a te', po'o gɑ a hɑ shɑ potsə tsyə a fɑ m bi Zhwenyə a bi po, po nə ŋkwyə nə piŋnthʉm,

¹² po'o tə́ pɑ nə ŋkhaktʉɔ wə po, shyə m nə piŋnthʉm yə a bɑ yɔ́k pɑ, yɔ ba yɑ̌.

¹³ Mfɑmfɑ bi a pɑ́ ŋ də cyətə siŋ wɔ gɑ́ gɑ̌ ka' nə sɔ' wə po tə la' jɔ sɔ tə ŋkhəm cwəlɔ, nə sɔ' jɔ mnthɔm fa' wə po pa' wə pyəshɑ pɑ tə pɑ pɑ Yudea a.

¹⁴ Gɑ̌ sɔlam nə pɑ Grikia ba nə pɑ tə pɑ́ pɑ Grikia, nə pɑ zhyənwə ba nə m mfʉmnyə pɔ;

¹⁵ a ywə́ yə a gə tə bɑ shəŋ nə siŋ Cuŋ pɑpuŋ ba m bi po yɔ, wɔ pyə pǒ Roma a.

Nwə dəŋdəŋ Si

¹⁶ Nə pa' ŋ tə ŋkhuso nə Cuŋ pɑpuŋ pɑ́: A bɑ tʉɔ Si nə ywə vɔk bi bǎ ya mo lə́ yə ě piŋ a. Də́ŋdzə̀ nə pɑ Yudea biŋ bɔtə́ nə pɑ Grikia.

¹⁷ A shyə m nə́ e tə́ pu yɔ nwə dəŋdəŋ Si, shyə m nə́ piŋnthʉm biŋ bɑ́ ba m nə piŋnthʉm, shyə m nə pa' a bɑ pu və gɑ́: Mo yə e bɑ dəŋdəŋ nə piŋnthʉm a gɔ sɔ' vɔk.

Mhɔnwə pɑ tə́ pɑ́ pɑ Yudea

¹⁸ Nə pa' Si da'tə yɛluŋ e kɛbəŋ nə guŋ mhɔnwə ba nə guŋ msɔkmsɔk nwə pɔmnəŋ, myə a nyəŋ nyənyɔ cɛ́ bi msɔkmsɔk nwə a;

¹⁹ nə pa' ywə yə bi a pɑ pu zhyə́ nə Si a, a bɑ wap zhyə, a bɑ Si la'tə wap.

²⁰ Nə pa' tə fɑ nə nə́ nyaptə dzʉ̌, tsə dɔlɔ̌ Si tsyə́ pú tə́ jɔ a pɑ, yə a bɑ tʉɔ mama, ba pa' e nə bɑ a, pu jɔ nə mfa' myə, nə zhyənwə; a po'o tə bi a pu lə lɑ sɔmywə nə shwyɛ' wap pɑ.

²¹ Nə pa' wap lə bɑ wap zhyə Si, da' gɑ la' wap ghu'tə́ e, wap lə nəŋ go'tə e nə mfa' pa' a shəŋ bi Si a. Wap le hɔ pɑ́ jyə̀ nthʉm msɛ́nwə tə kwitə̀ map, tʉ̌m fʉ̀mnyə tsap cʉ' ywə jʉ́m.

²² Wap lě bɑ sɛ gɑ́ wap bɑ mzhyənwə, shʉ' mpʉəpó.

²³ Wap lə dɑ fó' mo pfʉpfʉ̌ pu a pǒmsəŋ, ba mnɔm mkwə pfʉə pu a pyə wap fəŋ mvam map si a nə ŋkwyəpnyə ghu'tə Si yə e tə npfʉ a pɑ.

²⁴ A ywə yə a lə ghə tə́ Si cyə m nə́ ghi'nyə nthʉm tʉm tsap hɑ wap nə nwə mviŋ myə́ wap nə dɑ nɑ tsap gə ywə tə ywə a.

²⁵ Wap lě dɑ cwanwə ŋkwyəpnyə nyənyɔ Si, wap lě gamtə biŋ fa' m̀ bi ywə yə Si nyaptə nə cwə yə wap lə bɑ gɔ ghamtə Si nyaptə dzʉ̌ yə byanyə bɑ nə e mama a. Amɛn.

²⁶ A ywə yə a lə ghə́ Si hɑ gɑ́ wap yap mtʉm map pɑ́ nə ywə yə a dɑ mo gə mzhʉm a: Pɑjwǐ pap lě ŋkwyəpnyə pa' Si lə yap gɑ wap pɑ gə a, gə pɑ́ ywə yə pu nthé bya nə a.

²⁷ Ba pɑ bɛ tak yap nə ghə pa' pu lə yap nə nwə mbɛ pu mjwǐ a, pɑ bɛ pɑ di' pɑ́ pɑ bɛ, gə bɔkbɔ̀k nwə cəcɑ̌ pu, tə ŋkwi mcwɔ'fa' go' yap myə ǎ ku' nə pu a.

²⁸ A cyə m pa' wap lě tə kúŋ nə tɔm nwə nə zhyə́ Si a, Si le nthak wap bi zhyə̌nwə yap yə a tə́ nthya sɔmywə a pɑ: A po'o tə wap pɑ gə pɑ ywə yə wap ka tə́ bɑ gɔ ghə a pɑ́.

²⁹ Wap bɑ wap lo nə nthinthi msɔknyə nwə̀, nə pɔptə nwə, ghi'nyə, tʉm shɔkcɔ̌k, nə khiŋ, nə zhwə mo; nə cəŋ mshɛ́, fʉ̌, nə cyə́tə́ ghə mku', nə ghɔmnwə bɔkpɔ̌k nə pɔ,

³⁰ nə tʉ tsǒ pɔ cwəpuŋ, nə pɑ́ mghɛ bo Si, nə kam shɛ́, ŋa'nɑ́, ka'tə̀, fʉ̌ nwə cwəpuŋ, nə tʉɔthə́ bi tá pu má.

³¹ Nə cyə́tə ghə zhyənwə, nə cyə́tə zhyə nə ghiŋ nə mco', tə ghə tʉm, nə cyə́tə ghə nə piŋ.

³² Ba pa' a bɑ wap zhyə gɑ yə nə ya'shɛ Si bɑ gɑ́ pɔ pyə wap gə mɔ mnwə a bɑ wap ku' pɔ vʉ́ a, ba tə po'o wap tə gə da' mnwə bɔ pɑ. Wap biŋ bíŋ ba pyə pɔ pyə wap gə mnwə bɔ a.