EFESO 1 - Ghomala New Testament

Ca'tə̀

¹ Myə Polo, gɛ nthəm Yeso Kristo, m pa' Si jap a, bi pɔ dɔlɔ̌ ba m bi pɑ piŋ Yeso Kristo pyə wap Efeso a:

² gho' ba hwitə pɑ bi po shyə m nə Si, Tá yɔk pɑ̀ ba m nə Cyəpɔ Yeso Kristo.

Gho' tə́ dhə̀

³ Byǎnyə́ bi Si Tá Cyəpɔ yɔk pɑ Yeso Kristo: Ě nyəŋ guŋ byanyə́ zhwenyə nə pɑ̀ thə́ kɛbəŋ shyə m̀ nə Kristo.

⁴ E lə shwɔ' wɔk pɑ shyə m̀ nə e tə́ dzʉ̌ la' bɑwə́ po'o gɑ pɑ pɑ́ pɔ dɔlɔ̌, pɔ tə bya. Nə́ mnyə́ myə́, nthʉm ŋkhuŋnyə̀.

⁵ E lě da' gə gɑ́ pɑ pɑ́ mcwəpó pyə́ shyə m̀ nə Yeso Kristo. A pa' puŋnwə e lə yɔ a

⁶ po'o nə nə́ jwɔp ghu'tə e ba gho' yə e nyəŋ nə wɔk pɑ̀ shyə m̀ nə ŋkhuŋ pɑpuŋ e:

⁷ M nə é, shyə́ m nə mcyə́ myə, pɑ vɔk, pu lɑ mhɔ mɔk pɑ shwyɛ' wɔk pɑ shyə m̀ nə dəŋ gho' e nə pɑ.

⁸ Si hɑ bi pɑ tə a yɔ́m, nə pa' e nə da'tə guŋ fʉ̌ awɛ bi pɑ ba zhyə̌nwə yɔk pɑ.

⁹ E lě gə pɑ zhyə́ nwə cyə zhyə̌nwə yə a bɑ pɑ́ yə nə yap a. Nwə pɑpuŋ yə e lə la' jáp pɑ yʉ́ tə́ dzə̀ a.

¹⁰ Po'o nə ghə gɑ cwə pəmtə nə yap guŋ dzʉ̌ awɛ nə bǔ ta'fò gɛ sa': Kristo, ywə yə ǎ kɛbəŋ a ba yə ǎ dəmcǎ' a.

¹¹ Pɑ lə̌ shyə́ m nə é ŋkwi yɔk pɑ tsʉ': Nə pa' shyə m nə́ mka'nyə mo yə e jap guŋ ywə awɛ pa' ě yɔ a a bɑ pú lě shwɔ' wɔk pɑ tə́ dzə̀

¹² po'o gɑ pɑ pɑ nə nə hɑ mku' nə ghu'tə é, bɑ pɔ pyə wap lə ləŋdzə mɔktə Kristo a.

¹³ Po lě biŋ shyə m nə e, mu'cʉ́m ju' ghɔmnwə nyənyɔ, cuŋ pɑpúŋ yə a bvɔk wɔ a. Po lě biŋ e, pu yap stam Zhwenyə yə pu lə ka' a,

¹⁴ Zhwenyə Dɔlɔ̌ yə a bɑ zhwi'tə tsə́ mcʉ' mɔk pɑ tə́ nə gɔ ŋkhəm nə cwə yə pu gɔ sɔ' kwi wɔk pɑ ŋkwi cʉ̌m, pɑ cwə́ nə tsə́ mcʉ' bɔ, nə pɑ́ jwɔp ghu'tə e.

Mcwyɛ'nyə̀

¹⁵ A ywə yə a gə tə́ ba myə yɑ̌ tə fɑ́ pa' ŋ dɑ́ yǔ' piŋnthʉm yɔ nə Cyəpɔ Yeso ba yɔ kuŋnyə nə guŋ pɔ dɔlɔ̌ awɛ,

¹⁶ ŋ nthɑ́ nthak nə gho'tə Si nə po pɑ́ nə pa' gɑ̌ nyəŋ wɔ nthʉm mcwyɛ'nyə mə̌.

¹⁷ A Si Cyəpɔ yɔk pɑ Yeso Kristo, Tá yə́ ghu'tə bɑ m bi a hɑ zhwenyə fʉ́ bi po yə a gɔ la'tə e bi po, piŋ ghə po zhyə e kwa' nyənyɔ a.

¹⁸ E ghyɛ' tʉm tsɔ nə ŋkha' é, po'o gɑ́ po zhyə́ ywə mɔktəmoktə yə yə́ nə ke wɔ hɑ bi po a, po zhyə dəŋ ghu' e, dəŋ tsə́ mcʉ' tsyə́ e gə po a pɔ dɔlɔ̌ ghap a.

¹⁹ Dəŋ tʉɔ jɔmyɔ̌m yə é lə tě nə wɔk pɑ pyə pɑ̌ biŋ e a; dəŋ gʉ' fa' é, gʉ' nthʉɔtʉɔ e.

²⁰ E lě nthé guŋ e awɛ nə́ Kristo nə cwə yə e lə yam e nə vʉ̌, gə e cwə nə ghə́ŋ tʉɔ e kɛbəŋ

²¹ tə́ thə́ də̌m guŋ nə sa', guŋ pɑ́ sa', guŋ tʉɔ, guŋ nəfo, ba guŋ mtsǒ awɛ, kɑ pú ŋkhe pɑ́ gɑ kɑlə, tə da' nthʉm yə̀ŋ dzʉ̌ pɑ́, ba yə dzʉ́ yə ǎ wə tə́ sɔ' a.

²² Əŋ, é lě jap guŋ ywə awɛ to mkwə̀ e, hɑ dzə̀ bi e nə guŋ ywə awɛ, e pɑ thə́ cu'tə pɔ Kristo,

²³ yə a bɑ nɑ́ e a, bɑ mlonyə̀ Mo yə kwa' Si nə donyə awɛ a.