EBRAIKA 1 - Ghomala New Testament

Si ghɔmnwə bi pɑ̀ shyə m nə Mú e

¹ Si lə ghɔmnwə bi mtǎ cwədzə mcʉm mcʉ̌m, nthi nthi shyə m̀ nə mghɔm ghɔ̀m Si.

² A piŋ bɑ nə cwə jʉ̀m yəŋ yə pɑ̌ nə a, e ghɔmnwə bi pɑ, kwa' bi pɑ shyə m nə ta' Mú yə e jap e, e pɑ dzʉ́ mcʉ̌' guŋ ywə awɛ, yə e lə cyə m nə e gə guŋ dzʉ awɛ a.

³ Pu shyə m̀ nə Mú bɔ jɔ dəŋ pa' ghu' Si nə dəŋnyə a, ba pa' Si nə bɑ a. E dɑ́ gʉ' ghɔm tsyə́ ŋkwa dzʉ́. E lě shu' pɔ nə mhɔnwə, shwə nə ghəŋ tʉɔ mo yə a bɑ e zhi a tə́ thə́.

⁴ E bɑ ě cyə pɑ aŋgəle. Si hɑ tso tsyə́, la' a pɑ pa' tsap a.

Mu Si cyə́ pɑ aŋgəle

⁵ Si fɑ́ gɔm bi yá aŋgəle gɑ: O bɑ mú a, myə, gɑ̌ tsə o tyɛ' ɔ? Kɑ nə kwi' gɔm gɑ: Myə, gɑ̌ gɔ pɑ bi e pɑ́ tá e pɑ bəm bɑ mu?

⁶ A piŋ nə pɑ̌ po'o, bɑ cwə yə e shya thə́sə mú nthʉm dzʉ́ a, gɔm gɑ: A guŋ pɑ aŋgəle Si awɛ kam mkwi'tə dzə e.

⁷ A sɔ' m̀ nə pɑ aŋgəle bɑ ě ghə tsɔ ghɔm gɑ: Mo yə e dɑ pɑ aŋgəle pyə́ gə mzhwenyə, biŋ dɑ mghɛ fa' pyə́ gə mgwa mɔk a.

⁸ Da' gɑ sɔ' m nə Mu, a pɑ́ bɑ pu ghɔm gɑ: Leŋ fò o m Si bɑ mama! Ba m gɑ: O dɑ pɑ dəŋdəŋ tə nə sá' yu nəfò.

⁹ O lə kuŋ dəŋdəŋ, bɔ cwəpùŋ. A po'o m̀ Si tə Si o bɑ e lě jwɔ' o. Dɑ mwɑ ŋwɛnyə tə nə jwɔ' o, mwɑ nə ŋkhuŋ o shyə́ mso pǔ.

¹⁰ Ba m gɑ: Nə nə́ to' m Cyəpɔ, wə nə lə gə dəmcǎ' ba kɛbə̀ŋ bɑ mfa' bú mǔ.

¹¹ Tsə bɔ gɔ sɔ' pfʉtə da' gɑ wə! O bɑ màmà. Ə̌ŋ, guŋ yap awɛ gɔ sɔ' vo pa' dzə a.

¹² O piŋ dzʉm wap nə o pa' dzə bəŋ a. Piŋ kwyəpnyə wap pa' pu ŋkwyəpnyə dzə a. Da' gɑ́ wə̀, o tə ŋkwyəpnyə pɑ. Mgu'dzú mǔ lə pɑ gɔ la' mi.

¹³ E lə̌ fɑ gɔm bi ya nə pɑ aŋgəle gɑ: Cwə nə ghəŋ tʉɔ a. Gɑ̌ gɔ lɑ mghɛ bò pǔ ghə tʉ́ mkwə o?

¹⁴ Guŋ yap awɛ tə́ bɑ́ pɑ́ mzhwenyə, bɑ mghɛ fa' Si, bɑ ě təm gɑ wap fa' po' bi pɔ pyə wap gɔ sɔ' kwi ywə vɔk pa' mcʉ' a pɑ a?