Ef 1 - MKPAMAṄ AMVOE Nouveau Testament en langue Ewondo 2012

Mësugan

¹ Ma Paulus, man apostel Kristus Yesus a ṅyian Zamba, matil mimfufub ya minë a Efesi, a bayëbë Kristus Yesus:

² Maa ai mvoè bibòòg ai mina, bisòò abë Zamba esya waan ai Nti Yesus Kristus.

Maa ya Nsisim abë Kristus

³ Olugu ai Zamba, esya Nti waan Yesus Kristus, ya angafubu bia ai nsalan Nsisim osë a yob abë Kristus,

⁴ akyaè angatòb bia abë nyè osusua akomo-lë yob ai si, na bibò mimfufub, tègè ai atòn a mis moe a ediṅ,

⁵ atari bia tòb na bitëbë a etye bòn abë nyè, etòm Yesus Kristus, mbol angadiṅa ṅyian woe,

⁶ asu olugu duma maa woe ya angafaè bia abë ndindiṅ woe.

⁷ Abë nyè ngò bibëlë akode asu mëki moe, evaè minsëm, anë akuma maa die layi,

⁸ maa te angabulu abë bia, a fëg esë ai mbindan osë,

⁹ abò na biyëm ndimba ṅyian woe, akyaè emen angadiṅ, mbol angatele abë nyè,

¹⁰ na eyòṅ zul mëtiṅ engaboman, abò na Kristus abò nlo byem bisë, tò ebi ya yob, tò ebi ya si, abë nyè.

¹¹ Abë nyè ngò bingavëṅan ngab-elig dzie okoba, akyaè e nyò ya abò mam mësë akyaè ṅyian woe wadiṅ, angatele,

¹² na bibò e ba bë osu ya bafidi Kristus asu olugu duma die.

¹³ Abë nyè ngò fë mina mingawog ebug bëbëla, mbëmbë foe akode waan, abë nyè ngò bëngalig mina ndëm a nyòl mbol mingayëbë asu Mfufub Nsisim ya angakagban,

¹⁴ ṅnyè anë eban ngab-elig dzaan, asu akode ya anë fë na bibëlë ai mò, asu olugu duma die.

Ngogëlan Paulus

¹⁵ Asu te, mbol mëngawog foe ṅyëbë waan ya abë Nti Yesus ai ediṅ ya miadiṅ mimfufub misë,

¹⁶ ndò mënë të kat mvëṅan ngaṅ a su daan, mëtsogo mina a ngogëlan,

¹⁷ asu yë na Zamba Nti waan Yesus Kristus, esya duma, avë mina Nsisim fëg ai Nsisim wakuli ayëmë die,

¹⁸ afyè mis ya nnëm waan, na miyëm afidi ya nloe waan, akuma duma ngab-elig dzie a mimfufub,

¹⁹ ai abim mod anen ngul dzie, asu bia ya biayëbë, akyaè mod ngul woe asye.

²⁰ Ngul te endzò asye ai dzò abë Kristus, ai nkulan angakuli nyè a bëkon, atoa nyè a mbo-nnomo woe a yob,

²¹ alodo edzoe esë, ai ngul esë, ai ntomba osë, ai e dzoe asë ya bënë dzam loe, së ki hm hë enyiṅ dzi, tò fë enyiṅ yazu.

²² Ndò angatele nyè dzom esë a mëkol a si, atele fë nyè na anë nlo nda-Zamba,

²³ endzò enë nyòl dzie, ntud e mod abò mam mësë ntud kan esë.