પ્રકટીકરણ 5 - परमेश्वरन सत्य वचन नवलो नियम

मुहरबन्द किताब आरू गाडरो

¹ जो सिंहासन पर बठ्यों हूँतों, हाव हेका जेवड़ा मा एक किताब देख्यों जो माहयती आरू बाहर लिखली हूँती, आरू वाँ सात मुहर लगाड़ीन बन्द करी गय हूँती।

² ओळतेन हांव एक घणो ताकत वाळा सोरगदूत न क देख्यों जो उची ओवाज मा यो परचार करतो हूँतो, इनी किताब क खुलने आरू ओकी मुहर ततोंड़ने क लायक (योग्य) कुण छे?

³ बाकीन नीहि सोरगमा, नीहि धरती पर, नीहि धोंरती क नेचो कोय उनी किताब क खुलने या उका पर नजर न्हाखने क योग्य निकल्यों।

⁴ तव हाव डुवा खुद रोड़ने लाग्यो काहकि ची किताब क खुलने या उका पर नजर न्हाखने क योग्य कोय नीहि जोड़यो।

⁵ “इनी वात पर उन डाहडा मा सी एक ने म्हार सी कयो, मा रोड़े; देख, यहूदा न जात क वो नाहार जो दाऊद क वारीसदार क थुड़ छे, ची किताब क खुलने आरू ओकी सातो मुहर तुड़ने क करता जित गयलों छे।”

⁶ तव हाव उना सिंहासन आरू च्यारो जीवों आरू वो च्यारो डाहडा क बीच मा, मानी लेय एक चढ़ावला गाडरा सारकों उबो देख्यों। उको सात सींगड़ा आरू सात ड़ळा हूता; यो यहोवा–भगवान की सातों जीव आत्मा छे जो सारी धरती पर मोकली गय छे।

⁷ चो आवीन् उका जेवड़ा हात मा सी जो सिंहासन पर बठ्यों हूतों, वाँ किताब ली लेदो।

⁸ जोत्यार वाँ किताब ली लेदो, तो वो च्यार जीव आरू चौबीस डाहडा वो गाडरा क ओगळ हिटी पड़्या। उका मा सी हर एक क हात मा वीणा आरू धुप, जो चुखलो लोगहन की प्रार्थना छे, उका सी भरेला सोना क वाटका हुता।

⁹ नी यो नवलो गीत गावने लाग्या, “तु किताब क ली लेने, आरू ओकी मुहर खुलने न योग्य छे; काहकि तु मोरीन् तारा लुहूय सी हर एक कुल आरू भाषा आरू लोगहन आरू जाती मा सी यहोवा–भगवान क करता लोगहन क मुलवी लेदो छे,

¹⁰ आरू ओका हमार यहोवा–भगवान क करता एक राज्य आरू पुजारा बनायों; आरू वाँ धरती पर राज करता छे।”

¹¹ जव हांव देख्यों, तों चो सिंहासन आरू चो जीव आरू चो डाहडा क च्यारो हावर घणा सोळटा सोरगदूतों न क सारको ओवाज सोमळ्यों, जेरो गिनती लाखो आरू कोरोड़ों न हूती,

¹² आरू वाँ उची ओवाज मा कयता हुता, “काटयलो गाड़ गाडरा ताकत वाळो जुरभर्‍यों आरू धन आरू गियान आरू शक्ति आरू विजुत आरू महिमा आरू धन्यवाद क योग्य छे।”

¹³ पछु हांव ने सोरग मा आरू धरती पर आरू धरती क नेचो आरू दरिया की आखी बनावली चीजों क, आरू आखो काय उका मा छे, यो कयतला समळ्यो, “आरू जो सिंहासन पर बठलो छे उको आरू गाडरा क, धन्यवाद आरू विजोत आरू महिमा आरू राज जलोमको रवे।”

¹⁴ आरू च्यारो जीवो ने आमने कयो, आरू मोनख्या नेचा पोड़िन वंद्या।