प्रेरितन 6 - परमेश्वरन सत्य वचन नवलो नियम

सात नावन सेवकन नेवाड़नो

¹ तिनु दाहड़ा मा जव चेला न गिनती बढ़ती गय, तव यूनानी बुली बुलने वाळा इब्रानीया पर किचवायने लागिया कि दाहाड़ीन सेवकाई मा हामरी रंडायली बाई सुधी नी ली जाती।

² तव तिनु बारा चेलान मंडळी क आपसे पास बुलावीन कयो, “यो वारू नी होय कि हामु यहोवा–भगवान न वचन क छुड़ीन खावाड़ने आरू पिवाड़नेन सेवा मा रहवजे।

³ हेरेन करिन ए भाईस्यो, आपने माईन सात नावन ओदेमड़ा क जो चुखली आत्मा आरू ओकल छे भरायला होय, नेवाड़ लेय, कि हामु ओको इना काम पर ठराय देजे।

⁴ बाकीन हामु ते विनता मा आरू वचन क सेवा मा लागला रहवसु।”

⁵ यी वात आखी मंडळी क वारू लागी, आरू त्या स्तिफनुस नावन एक मानुस क जो भुरसा मा आरू चुखली आत्मा छे भरायलो होतो, फिलिप्पुस, प्रुखुरूस, नीकानोर, तीमोन, परमिनास आरू अन्ताकिया वासी नीकुलाउस क जो यहूदि यान मत मा आय गयो होतो। निवाड़ लेदा।

⁶ आरू हेनुक नेळताळान सामने उबा करिया आरू ओका जुगु प्रार्थना करिन ओका पर हात हावलिया।

⁷ आरू यहोवा–भगवानन वचन फैलतो गयो आरू यरूशलेम मा चेला न रावन्या जादा बढ़ती गय; आरू पुजारा न एक समाज इना मत न हक मा होय गया।

स्तिफनुसन धरायनो

⁸ स्तिफनुस दया आरू ताकत छे भराइन लोगहन मा मोटा–मोटा काम आरू सोहलाणी देखाड़तो गयो होतो।

⁹ तव तिना आराधना घरो माईन जो बांधयला छुटला कहवायती होती, आरू कुरेनी आरू अलेक्जेन्द्रिया आरू किलिकिया आरू आसिया न लोगहन मा छे थुड़ाक उबा होईन स्तिफनुस छे वात विचार करिन जुराका हुयने लागिया।

¹⁰ पर तिनी ओकल आरू तिनी आत्मा न जिना छे त्यो वात करतो होतो, त्या सामनो नी कर सकिया।

¹¹ इना पर त्या थुड़ाक लोगहन क भड़काया जो कयनो लागिया, हामु इनाक मूसा आरू यहोवा–भगवानन विरोध मा निन्दा क वात कयता समळीया छे।

¹² आरू लोगहन आरू डाहडा आरू ओकल वाळा क भड़कावीन चढ़ीन आश आरू हेके धरीन मोटली मिटिंग मा ली आश।

¹³ आरू झुठा गवाह उबा होय गया त्या यो कयो, यो मानुस इना चुखलो धरतीन आरू नियम विरोध मा बुलनो नी छुड़ियो।

¹⁴ “काहकि हामु हेके यो कयता सोमळीया, कि ईशु नासरत इना जागा क उदार देसे, आरू तिनु रीति क बदली देयगो जो मूसा हामुक आपलो छे।”

¹⁵ तव आखा लोगहन जो मोटली मिटिंग मा बठला हुता, हेकी भेणी भालीन हेको मुय सोरगदूत सारको देखिया।