MARKUS 1 - Nouveau Testament Doyayo

MARKUS Dɔgl Rɔb yɔ Markus b i̧i̧ MARKUS 1

¹ Hɛdi dɔgl yɔ gi book Yeesu Kristu Bɛt waaɔ Dɔgl Rɔbɔ gii yɛɛlɔ.

² A Bɛtya̧a̧kɛŋkya bɔ Esaya gi ɗɛɛrwol du hi bi̧i̧: a Bɛt raa a yɛrɛ be yaak tɔmsbeya gɛrɛ a mɔ muutdu an gi gɛbtsum gbɔnɔ mɔ a dood tees du.

³ Hi kɛm za̧a̧nza gi ya̧a̧ɓoolik a hɛtdɔŋ du: a gɛbtsin Waar bɔ gbɔnɔɔ̧! Gɛbtsinɛg gbɔnɔ wɔ hi er bɛttɔnɔ!

⁴ Yɔ Yohana tuur a hɛtdɔŋg du anbɔ, gi hotingo dood Bɛtmɛmɛ, wɛɛ gisihi hindɔko: a zɛmrin kpoos nɛ, loon Bɛtmɛmɛ, Bɛt gi bitsin hinha̧a̧l nɛ wɔ.

⁵ Dood Yahuduya wɔ hi Urusalimaya wɔ sɛw hi zaa a ge. Hi walk hinha̧a̧lya̧ wɔ a Yohana muutdu. Hotinihi Bɛtmɛm gɔ a Urdum zɛɛ du.

⁶ Yohana Bɛtmɛm Hotingoya bɔ heg gban yɔ hi gɔn gɛloba sɛɛsɛ, hi nahi̧i̧l a see du. Gi za̧a̧nik leesɔ dagrɛ hi hɔ̧dkurumi.

⁷ Gi dɔk anyɔ lɛ: a Za̧a̧n yɔ gɔ gi zaa a be kuudu gin tɛŋk daar bee daarɔ. Bé tuur doo rɔb a gi muutdu an be hu̧u̧r be pid taal ba̧a̧nɔ gɛ.

⁸ Bee be gin Bɛtmɛm hotingo hi mɛm tɔs; yɛrɛ giya, gi hotinnɛ Bɛtmɛm hi Bɛt Mɔkilɔ.

⁹ A ɔ̧tɔ gedu Yeesu fu̧u̧z a Nazarɛd, a Galile hɛbt du; tuur a lɛlyɔ Yohana gi ge, hotinge Bɛtmɛmɛ a Urdum zɛ̧ɛ̧rnɔ du.

¹⁰ Yɔ Yeesu gi tuuzig a mɛm bɔ gedu, gbɛn bɛtha kpɛ̧ɛ̧rɔ, Bɛt Mɔkil gi sizig gi muul an gutu buu.

¹¹ Hi wɛɛ hi kɛm ya̧a̧boon za fu̧u̧z bɛtha: a mɔɔ gi waa be yɔ ha̧a̧be hi kpoos be sɛw; be gaa hat be sɛw a mɔɔ.

¹² Ɓɔrbɔ Bɛt Mɔkil bɔ renig a hɛtdɔŋ du.

¹³ Yɔ Saydanu maatige, waa lɛlɔge ɔ̧t dumbili nasɔ. Waa nam hɛtum wɔ hi teesdu, Bɛt walɛsɛrɛ wɔ hi gig ooko.

¹⁴ Yɔ hi yaa Yohana a luknɔ du, kuudu Yeesu rek a Galile, dɔg Dɔgl Rɔb bɔ fu̧u̧z a Bɛt ge.

¹⁵ Raa: a ɔ̧tyɔ Bɛt dɛ̧ɛ̧ tuurɔ, wáátɔ sɛ̧ɛ̧bɔ! Zɛmrin kpoos nɛ, ɗɔbsin Dɔgl Rɔb bɔ!

¹⁶ Yɔ Yeesu gi daak a mɛmbal ya̧ gbarɔ, a Galile, gbɛn dutwa̧a̧kyaadɛ Simɔŋ hi yɛ̧ɛ̧tɔ Andrɛ, hi gbalik zagr a mɛmbal du hi wa̧a̧nik dutu.

¹⁷ Yeesu raahi: a fɔbzinbe, an be wɛɛnin doodkamzigyaadɛ a Bɛt wáát du an dut yɔ nɛ wa̧a̧zig be.

¹⁸ Wɔrɔ ɓɔrbɔ hi ɔɔ zagrya̧ wɔ, hi fɔ Yeesu gɔ.

¹⁹ Yɔ Yeesu re gi hɛ̧ml kaasi, gbɛn Zebede waatɔ walɛ wɔ Yakuba hi yɛ̧ɛ̧tɔ Yohana hi gɛbsig zagr a lɛmb du.

²⁰ Ɓɔrbɔ elihi, hi ɔɔ baaya̧ Zebede a lɛmb du hi woosya wɔ, hii be hi retin hi giya.

²¹ Yeesu hi walɛsɛrɛ ɔ̧ɔ̧ wɔ hi tuur a Kapɛrnayum. Yɔ Yahuduya wɔ holum-ɔ̧tya̧ rii, Yeesu gul a mɔksilluk du yɛɛl hingoko.

²² Anyɔ gii taa an Bɛtmaakdɔkya wɔ, hingokɔ bɔ kɔms dood wɔ gɛrsɛ; wɛɛ gisihi hingok an doo yɔ gin tɛŋk an gi gog hinɛ.

²³ Za̧a̧n za gi nɛ a mɔksilluk bɔ gedu gin loorɛha̧a̧l muul du. Yɔ Yeesu yɛɛl hingok her, za̧a̧n bɔ ɓooya̧a̧: a dɔgl mɔ nɔ hi wiiya,

²⁴ Yeesu Nazarɛdya? Mɔ zaa an mɔ ha̧tirwi ha̧tir ya? Be mɛɛ bɛttɔnɔ a mɔɔ bɔ; mɔɔ gi Doo Gaat yɔ Bɛt yaazige!

²⁵ Yeesu ya̧a̧lig, raag a loorɛha̧a̧lɛ, wagsumɔ, tuum za̧a̧n yɛrɛ gi muul du!

²⁶ Loorɛha̧a̧l bɔ zikt wal bɔ ha̧a̧ltɔnɔ tuu gi muul hi kaal ɓoottɔnɔ.

²⁷ Yɔ anbɔ dood sɛw hin kɔmsihi gɛrs yɛ̧ltɔnɔ, hi ɛtinu: a hin bɔrɔ lab nɔ hinɔ be? Hingok seg za hi tɛŋk ya mi! Wal yɛrɛ gɔ raa loorɛha̧a̧l wɔ hɛw hi kɛmsig tɔn kɛmsɔ!

²⁸ Hi wɛɛ hi kɛm Yeesu nuŋgɔ ɗuk a Galile hɛbt du sɛw nɔɔktɔnɔ.

²⁹ Yeesu hi walɛsɛrɛ ɔ̧ɔ̧ hi ɔɔ mɔksilluk bɔ, hi wɛɛ hi tuu hi rek a Simɔŋ hi Andrɛ raa du. Yakuba hi Yohana hi fɔhi.

³⁰ Simɔŋ gɔnsiŋ zulɔ laag gi kusig be. Yeesu bɛɛ tuuruko, hi dɔgsig nis bɔ dɔglɔ.

³¹ Yeesu sɔɔ gi dɔŋdi, wa̧a̧ naanɔ ɗuksig ha. Zullaanɔ bɔ da̧a̧ gɔ, nis bɔ wɛɛ gaa Yeesu hi walɛsɛrɛ ɔ̧ɔ̧ leesɛ hi le.

³² Yɔ lɛɛsig tuurɔ, ɔ̧t gi legɔ, dood hi kams Yeesu gumtil wɔ sɛw hi wɔ hi gin loorɛha̧a̧l muul du.

³³ Dood a waal gbɔɔl bɔ gedu sɛw hi zaa hi mɔks a luk gbɔnɔya̧ bɔ ge.

³⁴ Yeesu za̧a̧s dood kit wɔ hi gin nɛ gums gaŋsɛ gaŋsɛ, wɛɛ nin loorɛha̧a̧l kittɔnɔ; gāāhi gbɔnɔ an hi booya̧a̧ gɛ, anyɔ loorɛha̧a̧l wɔ hi mɛɛ za̧a̧nɔ be.

³⁵ A bi̧i̧l ɗɔbt du Yeesu tuu waal bɔ rek a lɛl-aakil du an gi zɔ̧ Bɛto.

³⁶ Simɔŋ hi dood zaadɛ wɔ hi gi elo hi tɛge.

³⁷ Yɔ hi midige, hi raage: a dood sɛw hi gi mɔɔ tɛko.

³⁸ Hɔnɛ Yeesu wɛɛ raahi: a ɗɛwɛ rek a lɛlza, a raat wɔ hi sɛ̧ɛ̧b di gedu, an be re be dɔg Bɛt dɔglɔ hɔ hɛw, ya̧a̧nɛ be zaa.

³⁹ Yeesu ɛmb a Galile waalɔ du sɛw, gi Bɛt dɔglɔ dɔk a hi mɔksilluk du be, wɛɛ gi ninik loorɛha̧a̧l wɔ be.

⁴⁰ Ɗobtilya za zaa a Yeesu ge, zagl gi muutdu zɔ̧ge: a gid ha̧a̧mɔ, mɔ ɗɛɛ an mɔ za̧a̧sibe.

⁴¹ Yɔ ha̧a̧sig ya̧a̧rɛ, yɔd naanɔ ki̧i̧ge, raage: a ha̧a̧be, gaamɔ!

⁴² Ɓɔrbɔ ɗobtil bɔ da̧a̧da̧ gi muulɛ, wal bɔ za̧a̧za̧ wɛɛ gaaga.

⁴³ Kuudu Yeesu yaag ɓɔrbɔ wɛɛ raage hi naati:

⁴⁴ a kɛm bɛttɔnɔ, bɔmɔ raas nɛ doo za hin yɛrɛ zaŋ! Yɛrɛ yà, remɔ, mɔ zuns Bɛtmaakwookya bɔ gik yɔ mɔ giyɔ. Kuudu wɛɛmɔ mɔ gɔs Bɛt maako anyɔ Muusa raa, an mɔ zuns dood a mɔ gaaga, mɔ za̧a̧za̧.

⁴⁵ Hɔnɛyɔ wal bɔ bɛɛ reko yɛls dood sɛw hinyɔ Yeesu woosig fɔkig a lɛl sɛw. Yɔ anbɔ, Yeesu ɗɛ̄ɛ̄ rek a waal gbɔɔl za du an gi zuun muutɔ ma gɛ. Kɔm a lakɛ a lɛl-aakil du. Wɛɛ dood hi fu̧u̧zig a lɛl sɛw hi zaak a ge.