YOEL 1 - Ngunese Bible

¹ Navasaana ki Yehovah waina e umai paki Yoel, natu ni Pethuel.

² Kuga rogo navasaana waia, nimu namariki maga, go kuga taki nadaligamu, nimu naatatoko maga mamau puti ni navanua. Ku punusi tea waina e dakiusi a naaleatia animu maga, kite naaleatia maga ki tamamu maga, kite?

³ Kuga noakisai natumu maga asa, go natumu maga euga noakisai natuda maga asa, go natuda maga euga noakisai tagona p̃ota sikai asa.

⁴ Tea waina raasi e gani kovai a, midiri e gani a; go tea waina midiri e gani kovai a, tipekini e gani a; go tea waina tipekini e gani kovai a, uraasi e gani a.

⁵ Kuga tarapa, nimu tea matamaloku maga, po dagi; go kuga lalagaarova nimu tea maga mamau puti waina ku do munu waine, waine gagadi; nalakena e pei tea taeluaana pa dua ki nagolemu.

⁶ Nalakena nalauna sikai e sake umai dip̃a navanua aginau, tea kasua sikai, go tea veve‐sap̃o‐ana; napatina maga eu pei napati ni laion, go napati ni nasina eu pei napati ni laion warua.

⁷ E darasi vaine aginau, po mulusi nawili ni napuliva aginau; e mulusi lua e po nadi ki nia pano; arana maga eu pei tea mariana eu dare.

⁸ Kuga tagi dakiusi naatara waina e suni nakulukulu ni sak, nalakena naanoai ni navei‐naatara‐ana aneana.

⁹ Navituaana ni flaur, go navituaana takiana ero pei tea taeluaana pa dua ki nasum̃a ki Yehovah; tea viri maga, tea suasua maga ki Yehovah, eu do susue.

¹⁰ Vanua e pei tea marisakiana sua, navanua e do susue; nalakena korn e pei tea marisakiana, waine vau e dap̃a, naroro e do sa.

¹¹ Kuga maliere, nimu tea wosiwosi maga ni natano O, kuga lalagaarova, nimu tea mari pakasa ki vaine O, nalakena whiit go nalakena barle; nalakena nalolovaeana ni vanua e sa puoli.

¹² Vaine e kokolo, go napuliva e do sa; go pomekranet, ma paama, go nakavika, nakau maga mamau puti ni vanua eu kokolo: go nalaelaeaana ki naatam̃oli natuna maga e sirinopu.

¹³ Kuga tum̃amu dasoki mu ki nakulukulu ni sak, po susue, nimu tea viri maga; kuga lalagaarova, nimu tea suasua maga ni wede ni naviriana; kuga umai, kuga vilake nakulukulu ni sak, po one natano one p̃ogi mamau, nimu tea suasua maga ki Sup̃e aginau: nalakena navituaana ni flaur go navituaana takiana ero pei tea mautiana pa dua ki nasum̃a ki Sup̃e animu.

¹⁴ Kuga tapugoro navaliana sikai, kuga soso saisai ki nasaisaiana tatutakiana sikai, kuga viragi saisai ki tea matua maga go naatatoko maga mamau puti ni navanua, paki nasum̃a ki Yehovah Sup̃e animu, go kuga vioso paki Yehovah.

¹⁵ Awi ki naaleatia wanogoe! Naaleatia ki Yehovah e pei m̃aladigi, go ega wo umai dakiusi namarisakiana m̃elu Tea Kasua Mau.

¹⁶ Navinaga e da pei tea taeluaana pa dua ki namatagida, go nalaelaeaana go nasamasamaana pa dua ki nasum̃a ki Sup̃e anigida mau, kite?

¹⁷ Napati maga eu mate etano ni nap̃eretano maga; nasum̃a maga ni natauakiana eu pei maso maladi, nasum̃a maga ni korn eu makaka; nalakena korn e kokolo sua.

¹⁸ Awi, nalo tuavati maga eu do gi! Navata maga ni katel eu pinovinoi, nalakena eu dika malo kaniana; go navata maga ni shiip eu mavunuvunu.

¹⁹ Yehovah O, a do kua pioso paki‐go, nalakena nasiinu e gani malo kaniana maga ni masop̃alo, go mena ni nakapu e dap̃ara ki puti ki nakau maga ni namalasi.

²⁰ Go nalo mila maga ni namalasi eu do gaegae paki‐go: nalakena nap̃ap̃a maga ni noai eu dap̃a, go nakapu e gani malo kaniana maga ni masop̃alo.