NUMBERS 1 - Ngunese Bible

¹ Go Yehovah e pasa paki Moses masop̃alo ni Sinai, doko tap̃aup̃au ni nasaisaiana, nakup̃a vea ni atelagi kerua ni natau kerua edaku ki waina eu m̃elu dua ki navanua ni Ityipt umai, e naga,

² Kuga midiri nagisa mamau puti ni Israel natuna maga, ega vae naworada maga, ega vae nasum̃a maga ni tamada maga, po dape naveveana ni nagisada maga, sara naanoai euga sikasikai.

³ Tea maga waina eu pei tea ni natau rualima dua go do liu, ni Israel mamau puti waina eu mariatae paki navakalo, nimu ma Aaron koroga veve ra, ega vae taua adeada maga.

⁴ Go koroga veani naatam̃oli ega sikasikai m̃elu naworada sikasikai sarasara ra euga sikoti mu doko; tea mamau puti euga sikasikai pei nap̃au ni nasum̃a ni tamada maga.

⁵ Go naatam̃oli maga wanogoe waina kuga mamau doko, nagisada maga waia: ni Reuben; Elisur natu ni Shedeur.

⁶ Ni Simeon; Shelumiel natu ni Surishaddai.

⁷ Ni Yudah; Nahshon natu ni Amminadab.

⁸ Ni Issakar; Nethanel natu ni Suar.

⁹ Ni Sebulun; Eliab natu ni Helon.

¹⁰ Ni Yosef natuna maga: ni Efraim; Elishama natu ni Ammihud: ni Manasseh; Camaliel natu ni Pedahsur.

¹¹ Ni Benyamin; Abidan natu ni Cideoni.

¹² Ni Dan; Ahieser natu ni Ammishaddai.

¹³ Ni Asher; Pakiel natu ni Okran.

¹⁴ Ni Cad; Eliasaf natu ni Deuel.

¹⁵ Ni Naftali; Ahira natu ni Enan.

¹⁶ Tea maga wanogoe nara eu pei tea matadoaana maga m̃elu nasaisaiana, tea maraki maga ni naworawora ni tamada maga, nap̃au maga ni manu maga ni Israel.

¹⁷ Go Moses go Aaron ero piragi naatam̃oli maga wanogoe waina nagisada maga eu pei tea noasaiana:

¹⁸ Go eu piragi saisai ki nasaisaiana mamau nakup̃a vea ni atelagi kerua, go eu noasai navakilinaana adeada pae naworada maga, pae nasum̃a maga ni tamada maga, eu dape naveveana ni nagisada maga, tea maga waina eu pei tea ni natau rualima dua go do liu, sara naata sikasikai.

¹⁹ Dapala waina Yehovah e dip̃aki Moses asa, dapala nogoe ero peve parati ki da masop̃alo ni Sinai.

²⁰ Go Reuben natuna maga, tea takalapa ni Israel, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, sara naata sikasikai, sara naanoai kaka ni naatam̃oli maga waina eu pei tea ni natau rualima dua go do liu, tea mamau puti waina eu mariatae paki navakalo;

²¹ Tea maga wanogoe ni naworawora ni Reuben, waina eu pei tea veveana, eu pei naatam̃oli tivilia pati, manu latesa, p̃onotia lima.

²² Ni Simeon natuna maga, tagona adeada maga pae naworada maga, pae nasum̃a maga ni tamada maga, tea maga waina eu pei tea veveana pae naveveana ni nagisada maga, sara naata sikasikai, sara naanoai kaka ni naatam̃oli maga waina eu pei tea ni natau rualima dua go do liu, tea mamau puti waina eu mariatae paki navakalo;

²³ Tea maga wanogoe ni naworawora ni Simeon, waina eu pei tea veveana, eu pei naatam̃oli tivilia lima, manu loveti, p̃onotia dolu.

²⁴ Ni Cad natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

²⁵ Tea maga wanogoe ni naworawora ni Cad waina eu pei tea veveana, eu pei naatam̃oli tivilia pati, manu lima, p̃onotia latesa rualima takuna lima.

²⁶ Ni Yudah natuna maga pae tagona adeada maga, pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

²⁷ Tea maga wanogoe ni naworawora ni Yudah waina eu pei tea veveana, eu pei naatam̃oli tivilia larua, manu pati, p̃onotia latesa.

²⁸ Ni Issakar natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

²⁹ Tea maga wanogoe ni naworawora ni Issakar waina eu pei tea veveana, eu pei naatam̃oli tivilia lima, manu pati, p̃onotia pati.

³⁰ Ni Sebulun natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

³¹ Tea maga wanogoe ni naworawora ni Sebulun waina eu pei tea veveana, eu pei naatam̃oli tivilia lima, manu larua, p̃onotia pati.

³² Ni Yosef natuna maga, eu pei Efraim natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

³³ Tea maga wanogoe ni naworawora ni Efraim waina eu pei tea veveana, eu pei naatam̃oli tivilia pati p̃onotia lima.

³⁴ Ni Manasseh natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

³⁵ Tea maga wanogoe ni naworawora ni Manasseh waina eu pei tea veveana, eu pei naatam̃oli tivilia dolu, manu dua, p̃onotia dua.

³⁶ Ni Benyamin natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

³⁷ Tea maga wanogoe ni naworawora ni Benyamin, waina eu pei tea veveana, eu pei naatam̃oli tivilia dolu, manu lima, p̃onotia pati.

³⁸ Ni Dan natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

³⁹ Tea maga wanogoe ni naworawora ni Dan waina eu pei tea veveana, eu pei naatam̃oli tivilia latesa, manu dua, p̃onotia larua.

⁴⁰ Ni Asher natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

⁴¹ Tea maga wanogoe ni naworawora ni Asher waina eu pei tea veveana, eu pei naatam̃oli tivilia pati, manu sikai, p̃onotia lima.

⁴² Ni Naftali natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo;

⁴³ Tea maga wanogoe ni naworawora ni Naftali waina eu pei tea veveana, eu pei naatam̃oli tivilia lima, manu dolu, p̃onotia pati.

⁴⁴ Tea maga wanogoe eu pei tea maga waina eu pei tea veveana, waina Moses go Aaron ero peve ra, nara ma tea maraki maga ni Israel, naatam̃oli rualima sikai tamate dua: eu sikasikai pei tea ni nasum̃a maga ni tamada maga.

⁴⁵ Dapala nogoe tea maga mamau puti ni Israel natuna maga waina eu pei tea veveana, pae nasum̃a maga ni tamada maga, tea maga waina eu pei tea ni natau rualima dua go do liu, tea mamau puti ni Israel waina eu mariatae paki navakalo:

⁴⁶ Tea mamau puti wanogoe waina eu pei tea veveana, eu pei naatam̃oli manu p̃onotia latesa go manu dolu, p̃onotia lima rualima takuna lima.

⁴⁷ Ma naworawora ni Levi pae naworawora ni tamada maga, eu da pei tea veveana sikoti ra mau.

⁴⁸ Nalakena Yehovah e noa ki Moses, e naga,

⁴⁹ Naworawora ni Levi ega sikina, p̃a ta peve ra mau, go p̃a ta midiri nagisada maga sikoti Israel natuna maga mau:

⁵⁰ Ma p̃a lawo ki naworawora ni Levi euga tap̃au nasum̃atokoana ni nanoasokisokiana, go euga tap̃au sara naleo kakana maga, go sara naleo waina eu doko asa: nara euga tapetape nasum̃atokoana, go sara naleo kakana maga; go euga suasua nawosiana ki tea viri, go euga m̃enaki dalivirigoro nasum̃atokoana.

⁵¹ Go ragi waina nasum̃atokoana ega vei tea rakaiana, naworawora ni Levi euga rakai a: go ragi waina nasum̃atokoana ega vei tea sike‐lawo‐kiana, naworawora ni Levi euga sike lawo ki nia: go te naata p̃ota e pe umai paki m̃aladigi ki nia, e pe wo pei tea toropusiana paki namateana.

⁵² Go Israel natuna maga euga sike tap̃aup̃au adeada maga, sara naatam̃oli euga sikasikai doko tokora ni nam̃enakiana adeada maga, go sara naatam̃oli euga sikasikai doko tokora ni manututu adeada maga, euga vae taua adeada maga.

⁵³ Ma naworawora ni Levi euga m̃enaki dalivirigoro nasum̃atokoana ni nanoasokisokiana, naga namaritausuana ega ta pavaga dip̃a nasaisaiana ni Israel natuna maga mau: go naworawora ni Levi euga vavaigoro nawosiana ni nasuasuaana ni nasum̃atokoana ni nanoasokisokiana.

⁵⁴ Go Israel natuna maga eu mari dapala nogoe; pataka ni tea mamau puti waina Yehovah e dip̃aki Moses asa, eu mari dapala nogoe.