LUKA 1 - Ngunese Bible

¹ Nalakena tea laapa eu mari dogo naga euga midiri tusi sikai nalo ni naleo maga waina eu pei tea saralomaupakavuroana m̃aleoputo kakagida,

² dapala waina tea maga waina eu punusi ra po pei tasiga maga ni navasaana pae ragi ni naatulakeana pa pa,

³ eu pitua ki da paki gida, kinau ma waina a puausi paratiki naleo maga mamau puti pae naatulakeana pa pa, a midoa ki nia naga e p̃ia naga aga midiri lawolawo ki da paki‐go, Theofilo wia liu;

⁴ naga p̃a atae m̃ata ki naveilomauana ni tea maga waina ku pei tea vasapiseikiana ara.

⁵ Naaleatia maga ki Herod, nawota ni Yudea, tea viri sikai e doko, nagisana Sakaria, tea ni tagona ki Abiyah: go anagoroi e pei sikai ni Aaron natuna nagoroi maga, go nagisana Elisabeth.

⁶ Go ero dua leana narae ni Sup̃e, ero surata pae natip̃akiana maga go natawonakiana maga mamau puti ki Yehovah, po da pei tea vasadip̃aana mau.

⁷ Go ero dika natuda, nalakena Elisabeth e dim̃o, go ero dua pei tea ni naaleatia laapa.

⁸ Go e pakilina, ragi waina e do mari nawosiana ki tea viri narae ni Sup̃e ragi ni naaleatia maga ni tagona aneana,

⁹ eu pisara pae natomariana ni navei‐tea‐viri‐ana, go gole aneana e pei naga nae ega vaki ekopu ni nasum̃a tapu ki Yehovah po dap̃ara ki tea ni nap̃o wia.

¹⁰ Go taua mamau ni narei eu do dapasavasa katama aura ni tea ni nap̃o wia.

¹¹ Go agelo ki Yehovah sikai e pakilina ki nia, e lawodu taleva ni matua ni tagura ni naviriana ni tea ni nap̃o wia.

¹² Go Sakaria e m̃anaunau ragi waina e punusi a, go namatakuana e dowo asa.

¹³ Ma agelo e noa ki nia, e naga, P̃a ta mataku mau, Sakaria: nalakena navavaraniana anigo e pei tea rogoana, go am̃agoroi Elisabeth ega wo manigo dape natum̃a naanoai sikai, go p̃a wo soso nagisana ki Yoane.

¹⁴ Go p̃a wo peani nalaelaeaana go nasokamidiana; go tea laapa euga wo laelaea nalakena navakilinaana aneana.

¹⁵ Nalakena ega wo p̃arua namata ni Yehovah, go ega wo da munu waine go namunuana kasua mau; go ega wo pura ki Naatana Tapu, pae nap̃ele ni p̃ilana pa pa.

¹⁶ Go ega wo pua doa Israel natuna maga tea laapa kakada paki Yehovah Sup̃e adeada.

¹⁷ Go nae ega wo surata pea ki naraena pilake naatana go nakasuaana ni Eliyah, naga ega vua doa nap̃op̃o ni tamada maga paki natuda maga, go tea rogopiri maga naga euga surata pae namanumatuaana ki tea leana maga; naga ega magi Yehovah mari m̃ata ki narei sikai euga maneana pei tea marim̃ataki‐sua‐ana.

¹⁸ Go Sakaria e noa ki agelo, e naga, Aga wo atae tea wanogoe pae nasava? Nalakena kinau a pei tea matua, go nagoroi aginau e pei tea ni naaleatia laapa.

¹⁹ Go agelo a pasa dara po noa ki nia, e naga, Kinau a pei Cabriel, waina a lawodu narae ni Sup̃e; go a pei tea tip̃akiluaana umai naga aga vasa ki‐go, po dogorogo paki‐go ki narogorogoana wia wanogoe.

²⁰ Go p̃a leo, p̃a wo punuta po mari sa pasa, pa pa paki naaleatia waina tea maga wanogoe euga wo pakilina asa, nalakena ku da saralomau navasaana aginau maga mau, waina euga wo lolomana ragi kakana.

²¹ Go narei eu do leogoro Sakaria, go eu maga nalakena e doko parau doko ekopu ni nasum̃a tapu.

²² Go ragi waina e dave, e mari sa pasa ki da: go eu midoaki atae naga e punusi navunusiana sikai ekopu ni nasum̃a tapu: go nae e do dasoki paki da, po pei pusa doko.

²³ Go e pakilina, ragi waina naaleatia maga ni nasuasuaana aneana eu pei tea vakavuroana, naga e paki nasum̃a aneana pano.

²⁴ Go edaku ki naaleatia maga wanogoe anagoroi Elisabeth e diena; go e dokoloku atelagi lima,

²⁵ e naga, Yehovah e po maginau mari dapala waia naaleatia maga waina e leo punusi au, naga ega tape lua navasapinoa‐ki‐nauana m̃aleoputo ni naatam̃oli maga.

²⁶ Go atelagi kelatesa agelo Cabriel e pei tea tip̃akiluaana m̃elu Sup̃e umai paki natokoana sikai ni Calilea, nagisana Nasareth,

²⁷ punusi nagoroi atara sikai waina e magi naatam̃oli sikai pei tea vasasokiana waina nagisana Yosef, tea sikai ni nasum̃a ni David; go nagisa ni nagoroi atara wanogoe Maria.

²⁸ Go agelo e paki ekopu punusi a, po naga, P̃a laelaea, ku pei tea saup̃iakiana, Yehovah e sikoti ko doko.

²⁹ Ma nae e m̃anaunau p̃arua nalakena navasaana wanogoe, po midoakiusiusi navasadodomiana wanogoe ega tapale sava?

³⁰ Go agelo e noa ki nia, e naga, P̃a ta mataku mau, Maria, nalakena ku pap̃ai nasaup̃iaana sikoti Sup̃e.

³¹ Go p̃a leo, p̃a wo diena, po dape natum̃a naanoai sikai, go p̃a wo soso nagisana ki YESU.

³² Nae ega wo p̃arua, po pei tea sosoana ki Natu ni Tea Vakilagi Mau: go Yehovah Sup̃e ega wo dua e malo tasake ki tamana David:

³³ go ega wo maramara dap̃au nasum̃a ni Yakob pa pa pa ega tu po du mau du; go nanopuana ni namarakiana aneana ega wo dika.

³⁴ Go Maria e noa ki agelo, e naga, Tea wanogoe ega wo pakilina dapale sava, nalakena a da atae te naanoai mau?

³⁵ Go agelo e pasa dara po noa ki nia, e naga, Naatana Tapu ega wo umai doko ako, go nakasuaana ni Tea Vakilagi Mau ega wo melu goro ko: nalakena tea wanogoe tea tapu waina ega wo pakilina ega wo pei tea sosoana ki Sup̃e Natuna.

³⁶ Go p̃a leo, Elisabeth waina e pei namatarau anigo, nae ma e diena ki natuna naanoai sikai ragi waina e pei tea matua: go atelagi waia e pei kelatesa aneana waina e pei tea sosoana ki tea dim̃o.

³⁷ Nalakena te navasaana sikai waina e m̃elu Sup̃e e da mari sap̃o mau.

³⁸ Go Maria e naga, P̃a leo, a pei tea suasua nagoroi ki Yehovah; ega vakilina ki nau ega tapala navasaana anigo. Go agelo e m̃elu dua ki nia pano.

³⁹ Go Maria e duleana naaleatia maga wanogoe po paki malo ni tava maga m̃araverave, paki natokoana sikai ni Yudah;

⁴⁰ po paki ekopu ni nasum̃a ki Sakaria po pasadodomi Elisabeth.

⁴¹ Go e pakilina, ragi waina Elisabeth e dogo navasadodomiana ki Maria, pipia e sokamidi nap̃elena; go Elisabeth e pura ki Naatana Tapu;

⁴² go e sike nadaleona ki naviosoana kasua, po naga, Nigo ku pei tea vasap̃iakiana m̃aleoputo ni nagoroi maga, go nawa ni nap̃elem̃a e pei tea vasap̃iakiana.

⁴³ Go tea waia e maginau pae esava, naga Nawota aginau p̃ilana ega umai punusi au?

⁴⁴ Nalakena p̃a leo, ragi waina nadaleo ni navasadodomiana anigo e sili nadaligagu, pipia e sokamidi nap̃elegu ki nalaelaeaana.

⁴⁵ Go tea waina e saralomau e maropa; nalakena tea maga waina eu pei tea noaana paki nia pae Yehovah euga wo lolomana.

⁴⁶ Go Maria e naga, Naatagu e do samasamani Yehovah,

⁴⁷ Go nap̃op̃ogu e laelaea Sup̃e Tea mauti pauri au.

⁴⁸ Nalakena e leo punusi navei‐teani‐etano‐ana ki tea suasua nagoroi aneana: Nalakena p̃a leo, tagona maga mamau puti euga wo soso au ki tea maropa pae ragi waia pa pa.

⁴⁹ Nalakena tea waina e kasua e maginau mari tea warua maga; Go nagisana e dapu.

⁵⁰ Go nadodomiana aneana e paki tagona maga go tagona maga Doko tea maga waina eu matau ki nia.

⁵¹ E pisei ki nakasuaana ki naruna; E daperavera ki tea leomadaga maga ki namidodoana ni nap̃op̃oda.

⁵² E pua siwo ki nawota maga m̃elu dua ki malo tasake adeada maga, Go e pua sake ki tea ni etano maga.

⁵³ E pakavuro tea vitolo maga ki tea wia maga; Go e dip̃aki lua tea sogolapa maga eu p̃alo pano.

⁵⁴ E silae Israel, tea suasua aneana, Naga ega midoaki nadodomiana

⁵⁵ (Dapala waina e pasa ki tamagida maga) Paki Abraham go naworaworana pa pa ega tu mau du.

⁵⁶ Go Maria e doko sikoti a doko e alagoro pei atelagi dolu, po moro liliu paki nasum̃a aneana pano.

⁵⁷ Go ragi ki Elisabeth e pei tea vakavuroana naga ega visola; go e piragi natuna naanoai sikai;

⁵⁸ Go tea ni m̃aladigi ki nia maga go namatarau aneana maga eu dogo naga Yehovah e mari p̃arua ki nadodomiana aneana paki nia; go eu laelaea sikoti a.

⁵⁹ Go e pakilina naaleatia kelatolu, naga eu rumai naga euga tovadavivi piakiki wanogoe; go eu naga euga soso e ki Sakaria, pae nagisa ni tamana.

⁶⁰ Go p̃ilana e pasa dara po naga, Ee; ma ega vei tea sosoana ki Yoane.

⁶¹ Go eu noa ki nia, eu naga, Namatarau anigo maga tea sikai kakada e da pei tea sosoana ki nagisa wanogoe mau.

⁶² Go eu dasoki paki tamana, e pe masauna naga ega vei tea sosoana ki sei?

⁶³ Go e datago napapa midiri sikai, go e midiri, e naga, Nagisana Yoane.

⁶⁴ Go eu maga puti. Go nawokana e pei tea wolagatiana m̃araverave, go namenana e maviri, go e pasa, po pasa p̃ia ki Sup̃e.

⁶⁵ Go namatakuana e pakilina ki tea maga mamau puti waina eu doko dalivirigoro ra: go navasaana maga mamau puti wanogoe eu pei tea rogorogokiana usuraki malo ni tava mamau ni Yudea;

⁶⁶ Go tea maga mamau puti waina eu dogo ra eu doropusi ra nap̃op̃oda, eu naga, Nalakena tea wanogoe piakiki waia ega wo dapale sava? Nalakena nam̃elearu ni Yehovah e sikoti a doko.

⁶⁷ Go tamana Sakaria e pura ki Naatana Tapu, po pea noa sai, e naga,

⁶⁸ Yehovah, Sup̃e ki Israel, ega vei tea vasap̃iakiana; Nalakena e umai punusi narei aneana po madeada mari natauluaana,

⁶⁹ Po manigida mari napati sikai ni namautipauriana e pakilina Nasum̃a ni tea suasua aneana David

⁷⁰ (Dapala waina e pasa pae nawoka ni profeta tautau aneana maga pae ragi vea ni maramana pa pa pa),

⁷¹ Namautipauriana m̃elu dua ki tea kokona kigida maga, go m̃elu dua ki nam̃elearu ni tea maga mamau puti waina eu pilosi gida;

⁷² Naga ega mari nadodomiana paki tamagida maga, Go naga ega midoaki navasasokiana tapu aneana;

⁷³ Navivisaana waina e pivisa paki Abraham tamagida asa,

⁷⁴ Naga ega tua gida naga tuga vei tea vualuaana m̃elu dua ki nam̃elearu ni tea kokona ki gida maga, Go naga tuga maneana suasua po da mataku mau,

⁷⁵ Doko natautauana go namarinaleoleanaana naaleatia anigida maga mamau puti.

⁷⁶ Io go nigo, piakiki, p̃a wo pei tea sosoana ki profeta ki Tea Vakilagi Mau: Nalakena p̃a wo surata pea ki narae ni Yehovah naga p̃a marim̃ataki napua aneana maga;

⁷⁷ Naga p̃a tua narei aneana naataeana ni namautipauriana Pae namidoakikorokoroana ni namarinaleosaana adeada maga,

⁷⁸ Nalakena namaritadodomiana ki Sup̃e anigida, Waina natola ega wo pae elagi umai punusi gida asa,

⁷⁹ Naga ega maramalaga paki tea maga waina eu doko namaligo go melu ni namateana; Naga ega viragi nam̃elegida maga paki napua ni natam̃ateana.

⁸⁰ Go piakiki wanogoe e do atum̃aki, po do kasua ki naatana, po doko masop̃alo maga doko pa pa paki naaleatia ni navakilina‐ki‐Israel‐ana aneana.