DANIEL 1 - Ngunese Bible

¹ Natau ketolu ni namaramaraana ki Yehoiakim nawota ni Yudah, Nebukadnessar nawota ni Babelon e umai paki Yerusalem, po kelugoro e.

² Go Nawota e pitua ki Yehoiakim nawota ni Yudah, paki nam̃elearuna, go namagovai ni lasa maga ni nasum̃a ki Sup̃e; go e dape ra paki navanua ni Shinar paki nasum̃a ki sup̃e aneana: go e dape lasa maga wanogoe paki ekopu ni nasum̃a ni natauakiana ni nalo wia maga ni sup̃e aneana.

³ Go nawota e pasa ki Ashpenas nap̃au ni atavau aneana maga, naga ega viragi umai paki ekopu Israel natuna maga seara kakada, go nawora ni nawota seara kakada go navarapule maga seara kakada;

⁴ Natureai maga waina te wotu sikai e da doko ara mau, ma waina eu pei tea leom̃atakiana, go tea midoakiatae nalo ni sara namanumatuaana, po atae naataeana, po pei tea midoakiatae naataeana, go waina nakasuaana e doko ara naga euga lawodu ekopu ni nasum̃a warua ki nawota; go naga ega vasa pisei ki da namidiriana go namena ni tea ni Kaldea.

⁵ Go nawota e madeada dawona ki namagovai ni navinaga ki nawota, go ni waine munuana aneana, tea ni naaleatia sikai tea kakana, go naga euga vei tea viseikiana natau dolu; go ragi waina natau maga wanogoe euga nopu euga wo lawodu narae ni nawota.

⁶ Go m̃aleoputo ni tea maga wanogoe, tea ni Yudah natuna maga, Daniel, Hananiah, Mishael, go Asariah eu doko.

⁷ Go nap̃au ni atavau maga e dua ra nagisa maga: go e dua Daniel nagisa ni Belteshassar, go e dua Hananiah nagisa ni Shadrak; go e dua Mishael nagisa ni Meshak go e dua Asariah nagisa ni Abed‐neco.

⁸ Ma Daniel e midoa ki nia nap̃op̃ona naga ega ta dum̃ana mari a ega loa ki navinaga ki nawota mau, go ki waine munuana aneana mau: go e pavara ni nap̃au ni atavau maga naga ega ta dum̃ana mari a ega loa mau.

⁹ Go Sup̃e e mari Daniel e pap̃ai nasaup̃iaana go namaritadodomiana narae ni nap̃au ni atavau maga.

¹⁰ Go nap̃au ni atavau maga e noa ki Daniel, Kinau a matau ki nawota aginau nawota, waina e dawona ki navinaga animu go tea munuana animu: nalakena ekasana ega vunusi naraemu euga sa liu narae ni natureai maga waina eu pei tea ni natau animu maga? Go kuga wo mari au aga lagati dua nawota nap̃augu.

¹¹ Go Daniel e noa ki tasiga leoparatiki, waina nap̃au ni atavau maga e dawona ki nia e dap̃au Daniel, Hananiah, Mishael, go Asariah:

¹² P̃a maridogo tea suasua anigo maga, a pavara ni ko asa, naaleatia rualima sikai; go euga tua gami navinaga m̃oli auga kani a, go noai auga munugi a.

¹³ Go naraegami auga vei tea leopunusiana, go narae maga ni natureai maga waina eu do gani navinaga ki nawota: go p̃a mari paki tea suasua anigo maga ega tapala waina p̃a wo punusi a.

¹⁴ Go e dogo parati ki da nalo ni naleo wanogoe, po maridogo ra naaleatia rualima sikai.

¹⁵ Go ragi waina naaleatia rualima sikai eu nopu naraeda eu pei tea leom̃atakiana go eu m̃anopunopu ki nap̃okasida p̃arua liu natureai maga waina eu do gani navinaga ki nawota.

¹⁶ Go tasiga leoparatiki e dape lua navinaga adeada, go waine munuana adeada, po dua ra navinaga m̃oli.

¹⁷ Go natureai pati wanogoe, Sup̃e e dua ra naataeana go namidoakiataeana nalo ni sara namidiriana go ni sara namanumatuaana: go Daniel e midoakiatae nalo ni sara navunusiana go ni sara nap̃ereana.

¹⁸ Go ragi waina naaleatia maga waina nawota e noa e naga ega viragi ra paki ekopu eu nopu, nap̃au ni atavau maga e piragi ra paki ekopu paki narae ni Nebukadnessar.

¹⁹ Go nawota e pasa ki da; go tea sikai waina e dakiusi Daniel, Hananiah, Mishael, go Asariah, e da pei tea vap̃aiana m̃aleoputo kakada mamau puti mau: go eu lawodu narae ni nawota.

²⁰ Go sara naleo ni namanumatuaana go ni namidoakiataeana, waina nawota e pusuusu paki da asa, e pap̃ai ra eu paka rualima sikai p̃ia liu tea midiri tapu maga go tea kikita maga mamau puti waina eu doko namarakiana mamau aneana.

²¹ Go Daniel e doko pa pa paki natau vea ki nawota Sairus.