1 PAKI TEA NI THESSALONIKA 1 - Ngunese Bible

¹ Paulo, go Silvano, go Timotheo, au midiri, paki ekalesia ni tea ni Thessalonika maga waina eu doko Sup̃e Tama go Nawota Yesu Kristo Nasaup̃iaana ega vei animu go natam̃ateana.

² Au do pasadodom̃ata ki Sup̃e sara ragi nalo kakamu mamau puti, doko do mari namidoakinoa‐muana doko natapasavasaana aginami maga;

³ au do midoaki pitip̃atip̃a ki nawosiana animu ni nasaralomauana go nawosimawosaana animu ni nadodomiana go nasokiana animu ni naleogoroana doko Nawota anigida Yesu Kristo, narae ni Sup̃e go Tamagida;

⁴ au atae, tai maga, tea dodomiana maga ki Sup̃e, namatadoa‐mu‐ana,

⁵ nalakena narogorogoana wia aginami e da umai paki mu doko navasaana sikina mau, ma e umai doko nakasuaana, go doko Naatana Tapu, go nasaralomau pakavuroana warua; dakiusi waina ku atae naga au pei naatam̃oli dapale m̃aleoputo kakamu nalakena nimu.

⁶ Go nimu ku pei tea mari oli gami go Nawota, ku dape sua navasaana doko nariesokiana warua, pilake nalaelaeaana ki Naatana Tapu;

⁷ dapala waina nimu ku pei naatulakeana sikai paki tea saralomau maga mamau puti waina eu doko Masedonia go waina eu doko Akaia.

⁸ Nalakena navasaana ki Nawota e m̃elu mu saruru pano, e da doko Masedonia go Akaia sikida mau, ma narogorogoana ni nasaralomauana animu paki Sup̃e e paki sara tokora pano; dapala waina kinami au da peani te nalakena naga auga vasa te navatuna mau.

⁹ Nalakena nara eu dum̃ada dogorogo nalo kakagami ki nasiliana waina au peani a paloti punusi mu naga e dapale sava; go dapala waina ku maradoa m̃elu dua ki nasup̃e maga paki Sup̃e, naga kuga magi Sup̃e mauri go lomau suasua,

¹⁰ go naga kuga leogoro Natuna pae nakoroatelagi umai, waina e sike a e duleana m̃elu dua ki tea mate maga, Yesu, waina e do pua lua gida m̃elu dua ki namaetoana waina ega wo umai.