Estere 1 - BIBELE

Kgoši ya Peresia e hlala mohumagadi

¹ Ke tša mehla ya Ahasiwerosi. Ahasiwerosi o be a buša dinaga tše lekgolo le masome a mabedi a metšo e šupago tše di bego di goma ka la India le ka naga ya Kushe.

² Ke tša mehla yeo ge kgoši Ahasiwerosi a dutše sedulong sa bogoši kua Susani motseng wa mošate.

³ Ka ngwaga wa boraro wa mmušo wa gagwe o kile a direla bakgoma ba gagwe le bahlanka ba gagwe ka moka monyanya; gwa tla ba madira a Peresia le a Meda, le balaodi le balaki ba dinaga, ba kgobokana pele ga gagwe.

⁴ Gwa fela matšatši a mantši, a lekgolo le masome a seswai, a ba bontšha bogolo bja mahumo a bogoši bja gagwe, le botšhephi le letago la borena bja gagwe.

⁵ Ya re ge go fetile matšatši ao, kgoši ya direla setšhaba sa motse wa mošate wa Susani monyanya; ba bagolo le ba banyenyane ba fetša matšatši a šupago ba le kgorong ya meriti ya mošate.

⁶ Go be go bapilwe mašela a metwatwa a moretele le a matala, a ngangilwe ka dithapo tša mebalabala a purapura, di kgokilwe ka dimanego tša silifera mo dikokwaneng tša mantšwemašwana. Go be go beilwe didulo tša mesamelo ya mašela a a logilwego ka hlale tša gauta le tša silifere; lebato e be e le maswika a magakabje le a bohlokwa le a mebala e mentši.

⁷ Go be go nwewa ka dinwelo tša mehutahuta tša gauta; beine e be e le e ntši ya kgoši, beineserena.

⁸ Go be go nwewa go sa gapeletšwe motho, gobane kgoši e be e laetše balaki ba mošate ya re mang le mang a dire ka mo go mo kgahlago.

⁹ Le basadi ba be ba diretšwe monyanya wa bona ke mohumagadi Wasithi ka mo lapeng la ngwako wa kgoši.

¹⁰ Ka tšatši la go šupa, ge pelo ya kgoši e thabile ka beine, kgoši ya bitša Mehumani, le Bisitha, le Haribona, le Abakatha, le Sethara, le Karikasi, ona matona a magolo a bego a hlankela kgoši Ahasiwerosi,

¹¹ ya re ba tliše Wasithi go kgoši a rwele mofapahlogo wa bohumagadi, gore batho le bakgoma ba bone botse bja gagwe, gobane e be e le wa sebopego se sebotse.

¹² Mohumagadi Wasithi a gana go tla ge kgoši e mmitša ka bahlanka. Ke mo kgoši e befetšwego gagolo ya tuka bogale.

¹³ Ya bolela le ba bohlale, batsebi ba mabaka; gobane ditaba tša kgoši di be di išwa go bona bomaitse a melao le mekgwa.

¹⁴ Ba ba bego ba le kgauswi le yena e be e le Karasena, le Sethara, le Adimatha, le Tharasisi, le Merese, le Marasena, le Menukani, bakgoma ba ba šupago ba Baperesia le Bameda; ke bona ba ba bego ba bona sefahlogo sa kgoši, ba le madulong a pele mmušong.

¹⁵ A ba botšiša a re: Ge go iwa ka molao, mohumagadi Wasithi a ka dirwa bjang ge a ganne go dira se se boletšwego ke kgoši mola e mmitša ka bahlanka ba yona?

¹⁶ Menukani a fetola a le pele ga kgoši le bakgoma a re: Mohumagadi Wasithi ga a ka a senya kgoši fela, o sentše le bakgoma ka moka, le ditšhaba ka moka tše dinageng tšohle tša kgoši Ahasiwerosi.

¹⁷ Gobane taba ye ya mohumagadi e tlo kwala go basadi ka moka; mme ba tlo nyatša banna ba bona, ba re: Kgoši Ahasiwerosi o kile a laela a re mohumagadi Wasithi a bitšwe a tle pele ga gagwe, mme a gana go tla.

¹⁸ Gomme go tloga la lehono bahumagadi ba Baperesia le ba Bameda ge ba ekwa taba ye ya mohumagadi, ba tlo di sebela bakgoma bohle ba kgoši, ya tlo ba lenyatšo le lehloyo fela.

¹⁹ Ge kgoši e ka dumela, gona a go tšwe molao wa kgoši, o ngwalwe pukung ya melao ya Baperesia le Bameda, gore o sa tlo hlanošwa; mme molao wo o re: Wasithi a se ke a hlwa a etla pele ga kgoši Ahasiwerosi; gomme kgoši e tšee bohumagadi e bo nee e mongwe e a mo phalago.

²⁰ Molao wo wa kgoši ge o ka kwala mmušong wa yona ka moka, gona ba bagolo le ba banyenyane ba tlo godiša banna ba bona.

²¹ Lentšu le la kgahla kgoši le bakgoma; mme kgoši ya dira sona seo se boletšwego ke Menukani.

²² Mangwalo a romelwa dinageng ka moka tša kgoši, naga ya ngwalelwa ka mongwalo wa yona, setšhaba sa ngwalelwa ka leleme la sona, gore monna a buše ba ngwakong wa gagwe, mme a bolele ka mmolelo wa setšhaba sa gabo.