Bafilipi 1 - BIBELE

Moapostola o lebogela Bafilipi, a ba rapelela

¹ Paulo le Timotheo bahlanka ba Jesu Kriste, re ngwalela ba e lego bakgethwa ka Kriste Jesu ba lego motseng wa Filipi, le balebeledi le badiredi.

² Kgaugelo a e le tlele le khutšo e tšwago go Modimo Tata wešo le go Morena Jesu Kriste.

³ Ke leboga Modimo wa ka ka mehla ge ke le gopola.

⁴ Dithapelong tša ka ka moka ke le rapelela, ka moka ga lena, ke thabile;

⁵ ke thabela kgopu yeo le e tšeago modirong wa Ebangedi go tloga letšatšing la pele go fihla lehono.

⁶ Gomme se ke se holofetšego ke gore e a thomilego modiro woo o botse go lena, o tlo o phetha, gwa tlo ba gwa fihla letšatši la Jesu Kriste.

⁷ Go ntshwanetše ge ke le gopola ka mokgwa woo ka moka ga lena; ka gobane ke na le lena mo pelong ya ka, ke tlemilwe ke le bjalo, ke le wa go lwela Ebangedi le go e tiiša; mme lena le batee le nna ka go gaugelwa.

⁸ Gobane Modimo ke hlatse ya ka ka mo ke le hlolegetšwego ka moka ga lena ke le ratile boka Jesu Kriste.

⁹ Gomme se ke se kgopelago ke gore lerato la lena le fele le tlala le eya le na le tsebo le temogo ya ruri,

¹⁰ gore le tsebe go hlaologanya bolo le bobe, gore le be basekegi bailabosodi, go be go tle letsatsi la Kriste.

¹¹ Le be ba ba tletšego kenyo tša toko ya Jesu Kriste, tše Modimo a tlogo retwa a tumišwa ka tšona.

¹² Bana bešo! Ke rata ge le tseba gore tše di ntiregetšego di thušitše gagologolo go tšweletša Ebangedi pele.

¹³ Mo ngwakong ka moka wa kahlolo, le go ba bangwe, gwa ba gwa bonala ge ditlemo tša ka e le tša ga Kriste.

¹⁴ Ba bantši ba bana ba borena Moreneng ba tšea kholofelo ka ditlemo tša ka, ba napa ba tlema pelo ba tiišetša go bolela lentšu ba sa boife.

¹⁵ Ba bangwe ge ba dira ka mona le ka kgang, ba bangwe gona ba kwatša tša Kriste ka pelo e bolo.

¹⁶ Bao ba go bolela Kriste ka lerato, ba tseba ge ke beetšwe go emela Ebangedi.

¹⁷ Ge e le bao ba dikgang, ge ba bolela Kriste ga ba hloke mamenemene, ba ela go nthatafišetša ditlemo, e tle e be tlaišego.

¹⁸ Gomme e tlo bang? Tabakgolo ke ge Kriste a bolelwa. Ge a ka bolelwa ka bomenetša, le ge a ka bolelwa ka therešo, nna ke thabela ge a bolelwa; gomme ke tlo fela ke thabela fao.

¹⁹ Gobane nna ke tseba gore ka dithapelo tša lena, le ka go thekgetšwa ke Moya wa Jesu Kriste, dilo tše di tlo nkiša phologong.

²⁰ Ke sona se ke se hlologetšwego, se ke se holofetšego ke se na maseme, ke na le mafolofolo a go re ka mehla le lehono Kriste a godišwe ka tše di diregelago mmele wa ka, e ka ba bophelo, e ka ba lehu.

²¹ Gobane mo go nna go phela ke Kriste, go hwa ke leruo.

²² Gomme ge go phela go ka tšweletša seenywa sa modiro wa ka, gona ga ke tsebe se nkago itlhaolela sona.

²³ Ke sa farafarwa ke tše pedi: Ke na le tlhologelo ya gore ke tloge ke yo ba le Kriste, gobane ke sona se se kago phala tšohle kgole.

²⁴ Fela, go dula nameng ke se se tlogo hola bolena.

²⁵ Ka go holofela moo ke tseba gore ke tlo dula, ka dula ke le wa go le tšweletša pele ka moka ga lena, gore le thabe tumelong.

²⁶ Gore ge ke boetše go lena ke le wa lena, ditumišo tša lena e tle e be tše di tletšego re le ba Kriste Jesu.

²⁷ Tabakgolo ke gore le phedišane ka mokgwa o loketšego Ebangedi ya Kriste, gore ge nka tla ke le bone; ge nka se tle, ke kwe tša lena ge le eme le le ba moya o tee, ba pelotee, le tšea kgopu le hlabanela tumelo ya Ebangedi.

²⁸ Le se na mo le kago tšhoga baganyetši, bao go ganetša ga bona e lego bohlatse bja gore ba a lahlega, go lena ya ba bohlatse bja phološo, di etšwa go Modimo.

²⁹ Gobane ka baka la Kriste le tlo ba le seditšwe ka kgaugelo, e se ya go mo dumela fela, e le kgaugelo ya go tlaišwa ka baka la gagwe.

³⁰ Ke mo le tlogo lwa ntwa ye le e bonego ka nna, ye le kwago ba mpolela ka yona mehleng yeno.