Numeri 1 - BIBELE Taba yea Botse

Go balwa ga setšhaba la mathomo

¹ Ka letšatši la pele la kgwedi ya bobedi ngwageng wa bobedi ka morago ga ge setšhaba sa Israele se tlogile Egepeta, Morena a bolela le Moshe ka Tenteng ya bodulo bja gagwe lešokeng la Sinai a re:

² “Wena le Arone, balang setšhaba sa Israele ka dikgorwana le malapa. Le ngwaleng maina a banna ka moka

³ ba ba nago le mengwaga ye masome a mabedi goba go feta moo bao e kago ba bahlabani. Le ba beeng ka dihlopha.

⁴ Le kgopeleng ntona ya kgorwana kgorong ye nngwe le ye nngwe go le thuša.”

^5-16 Banna ba ba ilego ba kgethelwa modiro wo setšhabeng e le mantona a dikgorwana le baetapele dikgorong tša bona šeba: Kgoro Ntona ya kgorwana Rubene Elitsure, morwa wa Shedeure Simeone Shelumiele, morwa wa Tsurishadai Juda Nagshone, morwa wa Aminadaba Isakara Netanele, morwa wa Tsuare Sebulone Eliaba, morwa wa Helone Efraime Elishama, morwa wa Amihude Manase Gamliele, morwa wa Pedatsure Benjamene Abidane, morwa wa Gidoni Dane Ahiesere, morwa wa Amishadai Asere Pagiele, morwa wa Okrane Gade Elisafo, morwa wa Reuele Naftali Ahira, morwa wa Enane

Kgoro Ntona ya kgorwana

¹⁷ Moshe le Arone ba ile ba thušana le banna ba lesome le ba babedi ba

¹⁸ go bokanya setšhaba ka moka ka letšatši la pele la kgwedi ya bobedi, mme setšhaba ka moka sa ngwadišwa ka dikgorwana le ka malapa. Maina a banna ka moka ba mengwaga ye masome a mabedi goba go feta a ngwalwa mme a balwa,

¹⁹ bjalo ka ge Morena a be a laetše. Moshe o ngwadišitše setšhaba lešokeng la Sinai.

^20-46 Banna ba mengwaga ye masome a mabedi goba go feta ba e bego e ka ba bahlabani ba ile ba ngwadišwa ka maina, go ya ka dikgorwana le malapa, go thoma ka kgoro ya Rubene, morwa yo mogolo wa Jakobo. Palo ya bona e bile ka mokgwa wo: Kgoro Palo Rubene 46 500 Simeone 59 300 Gade 45 650 Juda 74 600 Isakara 54 400 Sebulone 57 400 Efraime 40 500 Manase 32 200 Benjamene 35 400 Dane 62 700 Asere 41 500 Naftali 53 400 Palomoka: 603 550

Kgoro Palo

⁴⁷ Eupša Balefi ba ile ba se ke ba ngwadišwa le dikgoro tše dingwe,

⁴⁸ ka gobane Morena o be a rile go Moshe:

⁴⁹ “Ge o bala Baisraele o se ke wa ngwala le ba kgoro ya Lefi.

⁵⁰ Balefi o ba bee bahlokomedi ba Tente ya bodulo bja ka le ditlabakelo tša yona ka moka. Bona ba e rwale gotee le ditlabakelo tša yona, ba e hlokomele, mme ba hlome mešaša ya bona go e dikologa.

⁵¹ Ge le huduga, Balefi ba rutlolle Tente gomme ba e hlome gape mo le hlomago mešaša. Motho yo e sego Molefi ge a ka batamela Tente a bolawe.

⁵² Ba bangwe ba Baisraele ba hlome mešaša, ka dihlopha ka dihlopha, monna yo mongwe le yo mongwe le sehlopha sa gabo ka sefoka sa gabo.

⁵³ Balefi bona ba hlome mešaša ya bona go dikologa Tente go e leta, gore go se ke gwa ba le yo a e batamelago mme a mpefediša, ka otla setšhaba sa Israele.”

⁵⁴ Ka gona Baisraele ba dira tšohle tše Morena a bego a di laetše Moshe.