Mateu 1 - BIBELE Taba yea Botse

Ba lešika labo Jesu Kriste

¹ Ba lešika la boJesu Kriste, setlogolo sa Dafida, yo e bego e le setlogolo sa Abrahama, ba latelana ka mokgwa wo:

² Abrahama e bile tatagoIsaka, Isaka a tswala Jakobo, Jakobo a tswala Juda le banababo,

³ Juda le Tamare ba tswala Peretse le Serage, Peretse a tswala Hetserone, Hetserone a tswala Ramo,

⁴ Ramo a tswala Aminadaba, Aminadaba a tswala Nagshone, Nagshone a tswala Salmone,

⁵ Salmone le Rahaba ba tswala Boase, Boase le Rute ba tswala Obede, Obede a tswala Isai,

⁶ Isai a tswala Kgoši Dafida. Dafida le yo e bego e kile ya ba mosadi wa Uria ba tswala Solomone.

⁷ Solomone a tswala Rehabeamo, Rehabeamo a tswala Abia, Abia a tswala Asafo,

⁸ Asafo a tswala Joshafate, Joshafate a tswala Joramo, Joramo a tswala Usia,

⁹ Usia a tswala Jotamo, Jotamo a tswala Ahase, Ahase a tswala Hiskia,

¹⁰ Hiskia a tswala Manase, Manase a tswala Amone, Amone a tswala Josia,

¹¹ Josia a tswala Joyakine le banababo. Ka morago ga moo batho ba Juda ba thopelwa Babilone.

¹² Morago ga ge batho ba thopetšwe Babilone, Joyakine a tswala Sealtiele, Sealtiele a tswala Serubabele,

¹³ Serubabele a tswala Abihude, Abihude a tswala Eliakime, Eliakime a tswala Asore,

¹⁴ Asore a tswala Tsadoko, Tsadoko a tswala Agime, Agime a tswala Eliude,

¹⁵ Eliude a tswala Eleasara, Eleasara a tswala Mathane, Mathane a tswala Jakobo,

¹⁶ Jakobo a tswala Josefa, monna wa Maria, mmagoJesu yo a bitšwago le ka la Kriste.

¹⁷ Ka gona, go tloga ka Abrahama go fihlela ka Dafida go bile le meloko ye lesome le metšo ye mene; go tloga ka Dafida go fihlela lebakeng la go thopelwa Babilone go bile le ye lesome le metšo ye mene, le go tloga nakong yeo go fihlela matswalong a Jesu Kriste go bile le ye lesome le metšo ye mene.

Matswalo a Jesu Kriste

¹⁸ Tša matswalo a Jesu Kriste di bile ka tsela ye: Maria, mmagwe, o be a beeleditšwe ke Josefa; eupša ya re pele ba nyalana, Maria a lemoga gore o imišitšwe ke maatla a Moya wo Mokgethwa.

¹⁹ Josefa e be e le monna wa go phetha melao ya Moshe, eupša o ile a se ke a rata go goboša Maria phatlalatša; ka gona a ikemišetša go mo tlogela ka go ngwega.

²⁰ Ge a sa gopodišiša taba yeo, morongwa wa Morena a tšwelela go yena torong, a re go yena: “Josefa, setlogolo sa Dafida, o se ke wa boifa go nyala Maria, gobane o imišitšwe ke maatla a Moya wo Mokgethwa.

²¹ O tla belega morwa, gomme o mo ree leina la Jesu, ka gobane o tla phološa setšhaba sa gabo dibeng tša sona.”

²² Tšeo ka moka di ile tša direga gore go tle go phethege sela se boletšwego ke Morena ka moprofeta mola a re:

²³ “Kgarebe e tla ima, ya belega morwa yo a tlago bitšwa Imanuele.” Ke go re “Modimo o na le rena”.

²⁴ Ka gona, ge Josefa a tsoga, a yo nyala Maria, bjalo ka ge morongwa wa Morena a be a mo laetše.

²⁵ Eupša a se ke a robala naye a ba a belega morwa yoo wa gagwe. Gomme Josefa a mo rea leina la Jesu.