Lukase 1 - BIBELE Taba yea Botse

¹ Theofilose yo a hlomphegago, batho ba bantši ba lekile go ngwala taodišo ya ditaba tše di diregilego mo go rena.

² Ba ngwadile tše re di boditšwego ke ba ba di bonego ka mahlo go tloga mathomong a tšona. Ke bona babegi ba Taba ye Botse ya Modimo.

³ Le nna ge ke seno nyakišiša ditaba tše ka moka gabotse go tloga mathomong a tšona, ke bone go lebane gore ke go ngwalele tšona ka lenaneo le lebotse,

⁴ gore o tle o tsebe gore tše o di rutilwego ke nnete.

Johanese Mokolobetši o tla tswalwa

⁵ Mehleng ya ge Heroda e le kgoši ya naga ya Judea, go be go na le moprista yo mongwe yo leina la gagwe e bego e le Sakaria, e le wa kgoro ya boprista ya Abia. Mosadi wa gagwe e be e le Elisabetha, le yena e le wa leloko la boprista.

⁶ Bobedi bja bona ba be ba phela ka mokgwa wa go kgahla Modimo, ba phetha melao le ditaelo tšohle tša Morena gabotse.

⁷ Ba be ba se na bana ka ge Elisabetha e be e le moopa, le gona ka babedi ba be ba šetše ba tšofetše kudu.

⁸ Ka tšatši le lengwe Sakaria o be a dira modiro wa gagwe wa boprista ka Tempeleng, ka ge e be e le mayo a kgoro ya gabo.

⁹ Go ya ka setlwaedi sa baprista, o be a kgethilwe ka matengwa go yo thuntšha seorelo aletareng. Ka gona a ya ka Tempeleng ya Morena,

¹⁰ mola lešaba ka moka la batho le eme ka ntle le rapela ka nako ya ge go thuntšhwa seorelo.

¹¹ Morongwa wa Morena a iponagatša go yena a eme ka letsogong la go ja la aletare ya seorelo.

¹² Ya re ge Sakaria a mmona a tšhoga, a boifa.

¹³ Morongwa a re go yena: “Se boife, Sakaria, gobane Modimo o kwele thapelo ya gago. Mosadi wa gago, Elisabetha, o tla go belegela morwa, mme o mo thee leina la Johanese.

¹⁴ Go tswalwa ga gagwe go tla go thabiša wa hlalala, gwa thabiša le ba bantši,

¹⁵ gobane e tla ba yo mogolo pele ga Morena. A ka se tsoge a nwele beine le seno se bogale. O tla tlala Moya wo Mokgethwa go thoma ge a belegwa,

¹⁶ gomme a sokollela Baisraele ba bantši go Morena Modimo wa bona.

¹⁷ O tla eta Morena pele a sa boife, a le bogale bjalo ka moprofeta Eliya. O tla boelanya bana le botatagobana; ba ba sa theeletšego o tla ba bušetša tseleng ye e lokilego, gore a lokišetše Morena setšhaba sa gagwe.”

¹⁸ Sakaria a re go morongwa: “Ke tla tseba bjang ge o bolela nnete? Gape ke mokgalabje, mosadi wa ka le yena o tšofetše.”

¹⁹ Morongwa a mo fetola a re: “Ke nna Gabriele yo a dulago a emetše go hlankela Modimo. Ke romilwe go tlo bolela le wena, go go begela ditaba tše dibotse tše.

²⁰ Fela ka ge o se wa dumela se ke go botšago sona, sona se se tlago phethega ka nako ya sona, o tla ba semumu, wa se kgone go bolela, gwa ba gwa fihla letšatši le seo ke go boditšego sona se tlago phethega.”

²¹ Ge e le lešaba lona le be le letetše Sakaria, mme le makaditšwe ke gore na o diegišitšwe ke eng ka Tempeleng.

²² Ge a etšwa o be a sa kgone go bolela, gomme bona ba lemoga gore o bone pono ka Tempeleng. Ka ge a be a mumufetše o ile a bolela le bona ka diatla.

²³ Ge nako ya gagwe ya go dira modiro wa gagwe ka Tempeleng e fetile, a boela gae.

²⁴ Ka morago ga lebakanyana Elisabetha, mosadi wa gagwe, a ima, mme a dula ka gae dikgwedi tše tlhano, a re:

²⁵ “Se ke se ke se diretšwego ke Morena. Bjale ke gona a nkgopotšego, a mphumola go goboga bathong.”

Jesu o tla tswalwa

²⁶ Ka kgwedi ya boselela ya ge Elisabetha e le moimana, Modimo a roma morongwa Gabriele motseng wo mongwe wa Galilea wo o bego o bitšwa Nasaretha,

²⁷ go kgarebe ye nngwe ye e bego e beeleditšwe ke monna yo mongwe wa moloko wa Dafida, yo leina la gagwe e bego e le Josefa. Leina la kgarebe yeo e be e le Maria.

²⁸ Morongwa a ya go yena, a fihla a mo dumediša a re: “Dumela, wena mokgahlago Modimo! Morena o na le wena!”

²⁹ Maria a tlabega kudu ge morongwa a realo, gomme a ipotšiša gore na tumedišo yeo e ka ba e ra go reng.

³⁰ Morongwa a re go yena: “Se tšhoge, Maria, gobane o kgahlile Modimo.

³¹ O tla ima, wa tla wa belega morwa yo o swanetšego go mo rea leina la Jesu.

³² Yena e tla ba yo mogolo, o tla bitšwa Morwa wa Yogodimodimo. Morena Modimo o tla mmea kgoši ya Baisraele bjalo ka Dafida, rakgolokhukhu wa gagwe.

³³ O tla buša ditlogolo tša Jakobo go ya go ile, gomme bogoši bja gagwe bo ka se fele.”

³⁴ Maria a botšiša morongwa a re: “Go ka kgonega bjang ke se ka ka ka robala le monna?”

³⁵ Morongwa a mo fetola a re: “Moya wo Mokgethwa o tla theogela go wena, gomme maatla a Yogodimodimo a tla go aparela. Ke ka lebaka leo yo o tlago mmelega a tlago bitšwa yo mokgethwa, a bitšwa Morwa wa Modimo.

³⁶ Le Elisabetha, moloko weno, o imile morwa botšofading bja gagwe, gomme yena a tsebjago e le moopa o šetše a na le kgwedi tše di selelago e le moimana.

³⁷ Gobane ga go se se ka palelago Modimo.”

³⁸ Maria a re: “Ke nna mohlanka wa Morena; tše o di boletšego a di ntiregele.” Ke moka morongwa a mo tlogela.

Maria o etela Elisabetha

³⁹ Yona nakong yeo Maria a re go itokiša a itlhaganela a ya motseng wo mongwe nageng ya dithaba ya Judea.

⁴⁰ A fihla a tsena ka ga Sakaria, a dumediša Elisabetha.

⁴¹ Ya re ge Elisabetha a ekwa Maria a mo dumediša, ngwana yo a mo imilego a itšhikinya. Elisabetha a tlala Moya wo Mokgethwa.

⁴² A goeletša a re: “O šegofaditšwe go feta basadi ka moka, le ngwana yo o tlago mmelega o šegofaditšwe.

⁴³ Go tla bjang gore mmagoMorena wa ka a nketele?

⁴⁴ Gobane ke rile ge ke ekwa o ntumediša, ngwana yo ke mo imilego yo a itšhikinya ka lethabo.

⁴⁵ Go lehlogonolo wena o dumetšego gore tše Morena a go boditšego tšona di tla phethega.”

Maria o tumiša Morena

⁴⁶ Maria a re: “Pelong ya ka ke reta Morena;

⁴⁷ moyeng wa ka ke hlalalela Modimo, Mophološi wa ka,

⁴⁸ gobane o ntšheditše, nna, mohlanka wa gagwe yo ke nyatšegago. Go tloga bjale batho bohle ba tla re ke nna yo lehlogonolo,

⁴⁹ ka ge Ramaatla a ntiretše tše kgolo, mme leina la gagwe e le le lekgethwa.

⁵⁰ O gaugela ba ba mmoifago go tloga molokong wo mongwe go ya go wo mongwe.

⁵¹ O dirile tše maatla ka letsogo la gagwe, a ba a šwalalanya baikgogomoši ba ba ipotago.

⁵² O wišitše babuši ditulong tša bona, a godiša ba ba nyatšegago.

⁵³ Ba ba swerwego ke tlala o ba khorišitše ka dijo tše dibotse, mme bahumi a ba gomiša ba le fela.

⁵⁴ O babaletše bahlanka ba gagwe, Baisraele, a tla a ba šokela, ka gona o ba thušitše.

⁵⁵ Ke sona se a se tshepišitšego borakgolokhukhu ba rena, Abrahama le ditlogolo tša gagwe, gore yeo ke tshepišo ya go ya go ile.”

⁵⁶ Maria a dula moo ga Elisabetha dikgwedi tše e ka bago tše tharo, a kgona a boela gae.

Matswalo a Johanese Mokolobetši

⁵⁷ Lebaka la Elisabetha la go belega la fihla, mme yena a belega ngwana wa mošemane.

⁵⁸ Baagišani le meloko yabo ge ba ekwa gore Morena o mo gaugetše kudu o mo file ngwana, ba thaba le yena.

⁵⁹ Ka letšatši la seswai la ge ngwana a tswetšwe ba tla go mmolotša; ba be ba nyaka go mo rea leina la Sakaria, tatagwe.

⁶⁰ Eupša mmagwe a gana a re: “Aowa! Leina la gagwe e swanetše go ba Johanese.”

⁶¹ Bona ba re go yena: “Ga ke re mo melokong ya geno ga go na motho yo a nago le leina leo?”

⁶² Ba bolela le Sakaria ka diatla ba mmotšiša gore na leina la ngwana e swanetše go ba lefe.

⁶³ Yena a kgopela gore ba mo tlišetše letlapa, mme a ngwala mo godimo ga lona a re: “Leina la gagwe ke Johanese.” Ba tlabega ka moka.

⁶⁴ Ka yona nako yeo Sakaria a rarologa leleme a kgona go bolela gape, a reta Modimo.

⁶⁵ Baagišani ba gagwe bohle ba welwa ke poifo; nageng ka moka ya dithaba ya Judea gwa bolelwa ditaba tše ka moka.

⁶⁶ Bohle ba ba di kwago ba di nagana, ba ipotšiša ba re: “Na ngwana yo e tla ba eng?” Gobane go be go bonagala gabotse gore o thekgilwe ke maatla a Modimo.

Sakaria o reta Modimo

⁶⁷ Sakaria, tatagoJohanese, a tlala Moya wo Mokgethwa, mme a porofeta a re:

⁶⁸ “A go retwe Morena Modimo wa Israele, gobane o tlilo phološa setšhaba sa gagwe a se lokolla.

⁶⁹ O re file Mophološi yo maatla, setlogolo sa Dafida, mohlanka wa gagwe.

⁷⁰ O re tshepišitše go tloga kgale ka baprofeta ba gagwe ba bakgethwa

⁷¹ gore o tla re phološa manabeng a rena, le diatleng tša bohle ba ba re hloilego.

⁷² A re o tla gaugela borakgolokhukhu ba rena, a gopola kgwerano yela ya gagwe ye kgethwa.

^73-74 “O enetše rakgolokhukhu wa rena, Abrahama, gore o tla re hlakodiša manabeng a rena, a re kgontšha go mo hlankela re sa boife,

⁷⁵ re mo kgothaletše, re mo hlompha bophelong bjohle bja rena.

⁷⁶ “Wena, ngwanaka, o tla bitšwa moprofeta wa Yogodimodimo. O tla sepela pele ga Morena go mo lokišetša tsela,

⁷⁷ go begela setšhaba sa gagwe gore se tla phološwa ka go swarelwa dibe.

⁷⁸ Modimo wa rena o na le lešoko le kgaugelo. O tla re romela Mophološi yo a tlago re bonegela bjalo ka letšatši le le hlabago la bonega le le godimo.

⁷⁹ O tla bonegela ba ba dutšego leswiswing le moriting wa lehu, rena a re iša tseleng ye e lebilego boiketlong.”

⁸⁰ Ngwana yoo o ile a gola, a fela a tia le tlhaologanyong, a dula lešokeng gwa ba gwa fihla letšatši le a ilego a iponatša phatlalatša go setšhaba sa Israele.