Johanese 1 - BIBELE Taba yea Botse

Lentšu ke Jesu Kriste

¹ Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo.

² E sa le a eba go Modimo go tloga le go tloga.

³ Tšohle di hlodilwe ka yena, gomme go tše di hlodilwego ga go le se tee se se sego sa hlolwa ka yena.

⁴ Dihlolwa tšohle di hweditše bophelo ka yena, bophelo bjo e bilego seetša sa batho.

⁵ Seetša seo se bonega leswiswing, gomme leswiswi ga se la kgona go se fenya.

⁶ Modimo o kile a roma monna yo mongwe yo leina la gagwe e bego e le Johanese.

⁷ O be a tlile go begela batho seetša, gore bohle ba kwe se a se begago gomme ba se dumele.

⁸ Yena ka boyena e be e se seetša; se a bego a se tletše e be e le go bega seetša.

⁹ Seetšaetša sa go bonegela batho bohle se be se etla lefaseng.

¹⁰ Lentšu o be a le lefaseng, gomme le ge Modimo a hlodile lefase ka yena, batho ba lona ga se ba mo amogela.

¹¹ O be a tlile ga gabo, fela ba gabo ba se mo amogele.

¹² Eupša ba ba ilego ba mo amogela mme ba dumela go yena, bona a ba fa tokelo ya go ba bana ba Modimo.

¹³ Ya ba bana ba Modimo, e sego ka go tswalwa bjalo ka bana ba bangwe, e sego ka go tswalwa ka tumo ya nama, goba ka thato ya monna, eupša ka go tswalwa ke Modimo ka boyena.

¹⁴ Yena Lentšu e bile motho, a dula le rena e le yo botho kudu go rena, a re utollela ka botlalo se Modimo a lego sona. Ra bogela letago la gagwe, letago le a le filwego ke Tatagwe, e le yena Morwa a nnoši wa Tatagwe.

¹⁵ Johanese o be a bolela ka yena mola a goeletša a re: “Ke be ke era yena yo ge ke be ke re: ‘Yo a ntlhatlamago o mpheta ka maemo, ka gobane o be a le gona pele nna ke tswalwa.’ ”

¹⁶ Ka ge a re loketše kudu, o re šegofaditše bohle, a re šegofatša leboelela.

¹⁷ Melao Modimo o re file yona ka Moshe, gomme ka Jesu Kriste a re utollela ka mo e lego yo botho go rena ka gona, a ba a re utollela se a lego sona.

¹⁸ Ga go motho yo a kilego a bona Modimo. Batho ba mo tseba ka go mo utollelwa ke Morwagwe, Motswalwanoši, yo ka boyena e lego Modimo, yo a lego kgauswi le Tatagwe.

Go ruta ga Johanese Mokolobetši

¹⁹ Mola baetapele ba Bajuda Jerusalema ba romile baprista le Balefi go Johanese gore ba ye go mmotšiša gore ke yena mang, yena o ile a ipega,

²⁰ a se gane go ba fetola, a bolela phaa a sa iphihle a re: “Ga se nna Mesia.”

²¹ Ba mmotšiša ba re: “Bjale o mang? Kgane ke wena Eliya?” Yena a re: “Aowa, ga ke yena.” Ba re: “Kgane e ka ba o yena Moprofeta?” A ba fetola a re: “Aowa.”

²² Ba napa ba re: “Gona re botše gore o mang, gore re yo botša ba ba re romilego. O reng ge o ipega?”

²³ Johanese a ba fetola ka go tsopola se se boletšwego ke moprofeta Jesaya a re: “ ‘Ke nna segoeledi lešokeng se se rego: Otlollelang Morena tsela!’ ”

²⁴ Baromiwa bao ba bego ba romilwe ke Bafarisei

²⁵ ba botšiša Johanese ba re: “Bjale ge eba ga o Mesia, ga o Eliya, ebile ga o yena Moprofeta, o reng o kolobetša?”

²⁶ Johanese a ba fetola ka go re: “Nna ke kolobetša ka meetse, fela mo gare ga lena go na le yo le sa mo tsebego.

²⁷ Ke yena yo a ntlhatlamago, eupša nna le go mmofolla marala a dieta ga se gwa ntshwanela.”

²⁸ Ditaba tšeo ka moka di diregile Bethania ka mošola wa noka ya Jordane, moo Johanese a bego a kolobetša gona.

Kwanyana ya Modimo

²⁹ Ka tšatši le le latelago Johanese a bona Jesu a etla go yena. A re: “Bonang Kwanyana ya Modimo ye e tlošago dibe tša lefase!

³⁰ Ke yena yo ke bego ke bolela ka yena mola ke re: ‘Monna yo a ntlhatlamago o mpheta ka maemo, ka gobane o be a le gona pele nna ke tswalwa.’

³¹ Le nna ke be ke sa tsebe gore ke ofe, etšwe ke tšwetše ke kolobetša ka meetse gore a tle a utollelwe setšhaba sa Israele.”

³² Johanese o hlatsetše ka go re: “Ke bone Moya o theoga legodimong nke ke leeba, wa fihla wa dula godimo ga gagwe.

³³ Nna ke be ke sa tsebe gore ke yena, fela Modimo yo a nthomilego go yo kolobetša ka meetse o be a rile go nna: ‘Yo o bonago Moya o theogela go yena o dula godimo ga gagwe, ke yena yo a kolobetšago ka Moya wo Mokgethwa.’

³⁴ Bjale ke bone, gomme ke hlatsela gore ke yena Morwa wa Modimo.”

Barutiwa ba mathomo ba Jesu

³⁵ Ka tšatši le le latelago Johanese o be a le moo gape a na le ba babedi ba barutiwa ba gagwe.

³⁶ Ya re ge a bona Jesu a feta, a re: “Bonang Kwanyana ya Modimo!”

³⁷ Barutiwa bao ba babedi ba mo kwa ge a realo, gomme ba latela Jesu.

³⁸ Jesu a retologa, a ba bona ba mo latela, a ba botšiša a re: “Etse le nyakang?” Bona ba re: “Rabi,” (ke go re “Moruti”), “na o dula kae?”

³⁹ A ba fetola a re: “A re yeng le yo bona.” E be e šetše e le iri ya bone mathapama. Ke moka ba ya le yena ba yo bona mo a dulago gona, ba hlwa le yena tšatši leo.

⁴⁰ Yo mongwe wa bao ba babedi ba go re go kwa Johanese a bolela ba latela Jesu e be e le Andrease, ngwanaboSimone Petrose.

⁴¹ Yena a raka a yo nyaka Simone, mogolwagwe, gomme ge a mo hweditše, a re: “Re hweditše Mesia!” (Ke go re “Kriste”.)

⁴² A nama a iša Simone go Jesu. Jesu ge a mmona a re: “Etse ke wena Simone, morwa wa Johanese, fela o tla bitšwa Kefase.” (Ke go re “Petrose”.)

Jesu o botša Filipi le Nathaniele gore ba mo latele

⁴³ Ka tšatši le le latelago Jesu ge a re o ya Galilea a hwetša Filipi, gomme a re go yena: “Ntatele!”

⁴⁴ Yo Filipi ga gabo e be e le Betsaida, motse wa gaboAndrease le Petrose.

⁴⁵ O rile go hwetša Nathaniele, a re go yena: “Re hweditše yola Moshe a ngwadilego ka yena ka pukung ya melao, le baprofeta ba ngwadilego ka yena; ke Jesu wa Nasaretha, morwa wa Josefa.”

⁴⁶ Nathaniele a mmotšiša a re: “Na go na le se sebotse se se ka tšwago Nasaretha?” Filipi a mo fetola a re: “A re ye o yo bona.”

⁴⁷ Ge Jesu a bona Nathaniele a etla go yena, a bolela ka yena a re: “Šo Moisraele wa mmakgonthe yo a se nago bomenetša.”

⁴⁸ Nathaniele a mmotšiša a re: “O ntsebela kae?” Jesu a mo fetola a re: “Ke go bone o le mola moriting wa mogo, pele ga ge Filipi a go bitša.”

⁴⁹ Nathaniele a mo fetola a re: “Moruti, o Morwa wa Modimo! Ke wena Kgoši ya Israele!”

⁵⁰ Jesu a re: “Na o dumela ka ge ke go boditše gore ke go bone o sa le mola moriting wa mogo? O sa tlilo bona tše di fetago tšeo.”

⁵¹ A tšwela pele a re: “Ruri, ruri, ke le botša gore le tla bona legodimo le bulegile gomme barongwa ba Modimo ba namelela ba bile ba theogela go Morwamotho.”