Hosea 1 - BIBELE Taba yea Botse

¹ Wo ke molaetša wo Morena a ilego a o fa Hosea, morwa wa Beeri, mehleng ya ge Usia, Jotamo, Ahase le Hiskia e le dikgoši tša Juda, gomme Jerobeamo, morwa wa Joase, e le kgoši ya Israele.

Mosadi wa Hosea le bana

² Mohla Morena a bolela la mathomo le Baisraele ka Hosea o ile a re go yena: “Sepela o yo nyala mosadi yo e ka tlago ya ba seotswa. Bana ba gagwe le bona ba tla mo abela. Ke ka moo setšhaba sa ka se ntlogetšego ka gona mme se tlogago se sa mpotegele.”

³ Hosea a yo nyala mosadi yo leina la gagwe e bego e le Gomere, morwedi wa Diblaime. Yena a ima, a tla a mmelegela morwa.

⁴ Ke moka Morena a re go Hosea: “Mo thee leina la ‘Jesriele’, ka gobane ga ke sa le kgole le go otla kgoši ya Israele ka lebaka la batho bao Jehu, rakgolokhukhu wa gagwe, a ba bolailego motseng wa Jesriele. Ke tlilo fediša mmušo wa Israele.

⁵ Gomme mehleng yeo ke tla dira gore madira a Israele a fenyetšwe sa ruri moeding wa Jesriele.”

⁶ Gomere o ile a ima gape gomme a belega ngwana wa ngwanenyana. Morena a re go Hosea: “Mo thee leina la ‘Mosegaugelwe’, ka gobane nka se sa gaugela setšhaba sa Israele goba ka se swarela.

⁷ Ge e le setšhaba sa Juda sona ke tla se gaugela. Nna, Morena Modimo wa bona, ke tla ba phološa, fela nka se ba phološe ka ntwa – ka mara le mesebe, goba ka ditšhoša, goba ka dipere goba ka banamedi ba dipere.”

⁸ Ge Gomere a tshwešitše Mosegaugelwe o ile a ima gape gomme a belega morwa yo mongwe.

⁹ Morena a re go Hosea: “Mo thee leina la ‘Gasesetšhabasaka’, ka gobane setšhaba sa Israele ga se sa ka, gomme le nna ga ke Modimo wa sona.”

Setšhaba sa Israele se tla tsošološwa

¹⁰ Le ge go le bjalo setšhaba sa Israele se tla swana le lešabašaba la lewatle, le ka se elwe goba la balwa. Bjale Modimo o re go bona: “Ga le setšhaba sa ka,” eupša mehleng ye e tlago ba tla bitšwa bana ba Modimo yo a phelago.

¹¹ Batho ba Juda le ba Israele e tla ba setšhaba se tee gape. Ba tla ikgethela moetapele o tee, ba buša ba gola mme ba atlega nageng ya bona. Ee, letšatši la Jesriele e tla ba le legolo.