2 Korintu 4 - Sura Malelaha

Tauna au mobambari Ngkora Marasa hangangaa manoto babehianda

¹ Mewali, Pue Ala moangkangkai mewali topobagoNa, hai kibuku mampopolumao bago ide anti kamaroana laluNa irikami. Ido hai bara ope peharungangki i Pue Ala.

² Kikaraohi hinangka babehia au mepakaea; bara ara au kiwuwuniangi; barangkai mopakanawo tauna, barangkai mobaliki tunggaiana Ngkorana Pue Ala. Kipahawe pea apa au tou i kanoto-notoana bona ope-ope tauna mopangaku katouna bambari au kianti. Napetirongkai Pue Ala!

³ Ane Ngkora Marasa au kibambari, bara rapoinalai hai radoko tauna, iti mewali pea i tauna au tanganda monontohi kahurewu, lawi tetuko pekirinda.

⁴ Napawulihe Datu Tokadake au mokuasai dunia ide datihe mampoinalai Ngkora Marasa. Kuasa Ngkora Marasa bara mopamabaa lalunda. Mewali, barahe moisa peawana tuwona Kerisitu au mopatongawa peawana Pue Ala.

⁵ Barangkai mopahawe bambari kana i watangki haduduangki. Agaiana mopahawengkai bambari au manguli: Yesu Kerisitu iami Pue. Hai ikami ide mewalimongkai hawimi moula hawana Yesu.

⁶ Lawi Pue Ala au mongkora, Nauli, “Hangko i kamakaindi, mesupami baa!”, Ia worimi au mampopesupa baa i lalunta, bona moisake peawana tuwona Pue Ala au tongawa i tuwona Kerisitu.

Hai kuasa au kihumba hangko i Pue Ala, mopahawengkai Ngkora Marasa

⁷ Ikami manusia biasa peangkai, agaiana mahile mpuu kuasana Pue Ala au mobago i lalungki. Ikami rapandiringkai nodo kori tampo au buke anu-anu au masuli holona. Hangko i ngkora pandiri ide, tongawami kuasa au ara irikami bara kuasangki haduduangki, agaiana kuasa iti kihumba hangko i Pue Ala.

⁸ Iumba pea kalaoangki, narumpangkai ngkaia kapari, agaiana barangkai manawo. Wulingkai, agaiana bara ope peharungangki i Pue Ala.

⁹ Rapopeahi-ahingkai, agaiana barangkai napalehi Pue. Rawombe-wombengkai alangki madungka, agaiana barangkai mate.

¹⁰ Iumba pea kalaoangki, raawunga peamongkai rapapate nodo Pue Yesu bona katuwona Yesu rapatongawa wori i watangki.

¹¹ I lalu katuwongki i dunia ide, bosa tauna mampeinaohe mopapatengkai anti peulangki i Pue Yesu. Agaiana iti mewali bona tongawa katuwona Pue Yesu, i lalu watangki au bara monono.

¹² Anti pobambaringki Ngkora Marasa raawunga peamongkai rapapate, agaiana matana lalungki lawi pobambaringki Ngkora Marasa ide mopaara katuwo maroa irikamu.

¹³ I lalu Sura Malelaha, teuki node: “Anti pepoinalaingku, ido hai barana langa mololita.” Nodo wori ikami. Mepoinalaingkai i Pue Ala, ido hai barangkai langa mopahawe Ngkora Marasa.

¹⁴ Pue Ala mopatuwo hulemi Pue Yesu. Ido hai kiisa hambela tempo ina Napatuwo hule woringkai hai Naantingkai lao i lindoNa hihimbela hai ikamu.

¹⁵ Ope-ope ide mobundu irikamu bona tauna au mohadi Ngkora Marasa, alana kabosa-bosaa tauna au manguli ngkaia kamaroana i Pue Ala. Hangko inditi hangana Pue Ala rapomahile.

¹⁶ Ido hai bara ope peharungangki i Pue Ala. Nauri kamalede-ledea watangki ide, agaiana alo-alona kilambi karoho lalu au wou hangko i Pue.

¹⁷ Kapari au kipolumaongi ide-ide bara hanoumba hai hampalai pea, hai ane mantahangkai ina molambingkai katuwo maroa au bara mokahopoa. Peawana katuwo au ina kilambi iti melumbu kamahilena hangko i kapari au kihampei ide-ide.

¹⁸ Mewali, barangkai mampekiri apa au taita agaiana mampekiringkai apa au bara mani taita. Lawi au taita, hampalai pea, agaiana au bara mani taita, itiri au mantaha liliu hawe i hae-haena.