तीतुस 1 - नोयरी नोवलू नियम

शुभकामना

¹ पौलाआ वोलरोत जो परमेश्वराआ दास अने येशु ख्रिस्तआ प्रेषित होय, परमेश्वरोओ निवडीला मांहोओ विश्वास त्या खोरो उलखातीई अनुसार जे भक्ती अनुसार होय.

² तिया अनंत जीवनोओ आशा उपो जिया शपथ परमेश्वराने जो उठित गोगू शकत नाहा सनातान सी कोअयी होय,

³ पोन हाजा टाईमोम आपाआ वचनाआ तिया प्रचार व्दारे प्रगट कोयु, जो आमाआ उद्धारकर्ता परमेश्वरोओ आज्ञा नुसार माहु तीया देखाडले गोये.

⁴ तीतूस नावोओ, ज्या विश्वासाआ सहभागीताआ विचार माआ खोरो पुत्र होय परमेश्वर बाह्हू अने आमाआ परमेश्वर उद्धारकर्ता ख्रिस्त येशु त्यापोरोत ताहू अनुग्रह अने शांती जोडती रोय.

प्राचीनोओ योग्यता

⁵ आय याकोअता ताहू क्रेतामेहे सोडीत आवयू ओतू का तू रोल्यो गोठीई हुधाऱ्यो कोईली, अने माआ आज्ञेनुसार नगरामेहे डायाहा नियुक्त कोआ.

⁶ जो निर्दोष अने एकाच बुई मारी रोहू जोवे, ज्याआ पोऱ्ये विश्वासी रोहू, अने तियाआ माय खोटो पणा अने बेताल पनाओ दोष नि जुवे.

⁷ काहाके अध्यक्षाहा परमेश्वरोओ कारभारी उविलाआ कारनोवाही निर्दोष रोंहु जोवे; हट्ठी नाहा, खोतलागनारू नाहा, होरू पिनारु नाहा, देनारो नाहा, अने अनीतीने पोशा मेलविणारा कायनेते,

⁸ पावनाय कोअनारू, हाजो कोअनारू, स्वयंमी, न्याय, पवित्र अने नीतिमान रोहू जुवे;

⁹ अने विश्वास वचनापो जो धोर्मी शिक्षना मेहे अनुसार, स्थिर रोही का खोरो लेखिलो शिक्षण आपुहू गोयो अने विरोध वाला सोब बंद कोहू गोयो.

पाखण्डी शिक्षक

¹⁰ काहाके जाअखो मांहे फसिवणारे अने व्यर्थ गोगनारे अने धोका आपणारे; विशेष कोईत सुंता कोईलो मायरोत.

¹¹ त्याआं सोब बंद कोअला जोवे ऐ मांहे अनीतीई कोमाई याकोअता व्यर्थ गोठी हिकाडीत कोओहो बिगाडीत टाकत्ले.

¹² तियाआ मायरोत एक जानोतांहि जो तीयाम संदेष्टा होय, का होय, “क्रेतिय मांहे सदा खोटो खराब जनावरे आळशी अने ओडख्यू होय”

¹³ ए साक्ष खोरी होय, याकोअता तियाहा कडकपणाने चेतावनी आपित जाका ते विश्वासाआ माय पाक्को होय,

¹⁴ अने यहुदियाआ कथा गोठी माय अने तिया मांहाहा आज्ञा न माय मोन लागाडहु नाहा, जे खोरो पोरोत भोटकीत जातेहे.

¹⁵ शुद्ध मांहो कोअता आखे वस्तू शुद्ध होय, पोन अशुद्ध अने अविश्वासी याकोअता किबी शुद्ध नाहा, ताहा तियाआ बुद्धी अने शहाणपणा बेनु अशुद्ध होय.

¹⁶ ते कोतले का आमू परमेश्वराहा ओलखीत, पोन कानोवाही तिया मोजर्यो कोअनारे होय, अने कोडलाज हाजा कामा कोअता योग्य नाहा.