फिलोमोन 1 - नोयरी नोवलू नियम

शुभकामना

¹ पौला वोलरोत जो मसीह येशुउ कैदी होय अने पाही तीमुथियुस वोलरोत आमाआ प्रिय हेगांति फिलेमोन,

² अने बोईहही आफ्फीया, अने आमाहा हेगाती सिपायडू अरखिप्पुस अने फिलेमोनाआ कोआ मंडली नाव

³ आमाआ बाह्हू देव अने प्रभू येशु ख्रिस्ता वोलरोत कृपा अने शांती तुमाआ मिलीलो राहो.

धन्यवाद अने प्रार्थना

⁴ आय कायम देवोहो धन्यवाद कोईत रोनारू, अने आपाआ प्रार्थनाम पण ताहु ओर कोईत रोही,

⁵ काहाके आयताआ तिया प्रेमावाही अने विश्वासाआ विषयी मानत्लू, जो आखे पवित्र मांहोरी अने प्रभू येशुपोओ होय.

⁶ आय प्रार्थना कोअत्लू का विश्वासामेहे आयताआ सहभागीता उवे, तुमु आखे हाजा ओलखील्यु ताहा, ख्रिस्ता कोअता सफल उवे.

⁷ ताआ प्रेम वाही माहु जाअखो आनंद ओवयू अने माआ सांत्वन उवे, काहाके अने पाही, तापोरोत पवित्र जोओ जीवोहो विसाक जोड़ी होय.

उनेसिमुसो कोअता विनती

⁸ याकोअता यास्तव माहु ख्रिस्तात वोडो उचो होय का ज्या गोठी ठीक होय, तियाआ आज्ञा माहु आप.

⁹ तेबी पोन माहु वृध पौलाहा जो आत्माआ ख्रिस्त येशुहू बाधित मेकल्यो होय, अने फासी बी होमजीत पोडये का प्रेमाहा विनंती कोहू.

¹⁰ आय आपाआ पोऱ्याहा उनेसिमुस याकोअता, जो माआ त्यापोरोत माआ कैद जोल्मो लेदो होय, ताहु विनंती कोअत्लू.

¹¹ तो ताहा पहीले ताआ आखे कामा ने ओतू, पोन ओमे ताहु अने माहु ए वोडो कामुज होय.

¹² तीयाहा म्हणजे जो ताआ हृदयआ बोटकु होय, मिती ताआ जागे फासी कोयु होय.

¹³ तियाहा आय आपाआ जागे मेकीला ओते का ते ताआ जागे आव बादइलो जे सुवार्ता मुळे, माआ सेवा कोअनारू.

¹⁴ बी आयताआ इच्छा विना किबी कोआडीलो नाहा होमजतोलो का ताआ ओ उपकार दाबाडनारू नाहा पोन आदाजी होय.

¹⁵ काहाके याकोंअता मालुम तो ताआ जागे किबी दिहेजा अर कोइला मुळे अलग ओवयू का कायम ताआ जागे रोही

¹⁶ पोन ओमे पोरोत दासाआ हारखू नाहा तियाहा दासाआरी बी जाखा, म्हणजे पाही सारखो रोअलो, जेताहा माआ तो विशेष प्रिय होय पोन ओमे डीलोम अने प्रभूमे बी, ताआ पोन विशेष प्रिय होय.

फिलेमोनो आज्ञाकारिता सी उत्साहित

¹⁷ आखरी जर तू माहु आपाआ सहभागी उल्लासीत, ताहा तियाहा आव प्रकारे ग्रहण को जेहलो माहु.

¹⁸ जर तिये ताहु किबी नुकसान कोयु होय, कोयो जागे किबी आपलो होय, ताहा माआ नावापो लेखित ले.

¹⁹ आय पौलुस आपाआ आथोसी लेखोहो का आय फेडीत आपी; अने याहा कोअला किबी गोरोज नाहा का माआ कर्ज जो तापो होय ते तांहुज होय.

²⁰ ऐ पाही, ओ आनंद माहु प्रभू मेहे ताआ त्यापोरोत जोडीत ख्रिस्ती मेहे माआ जीवोहो निलो कोईत देदु.

²¹ आयताआ आज्ञाकारी लेईलो भरसो वाही ताहु लेखोहो, अने ओ होमजीत्लू काजे किबी आय कोत्लू, तू याआ पेक्षा किबी जाखा कोअनारू.

²² अने ऐ बी का माआ याकोअता दाबिला कोते जागू तीयार मेका माहु आशा होय का ताआ प्रार्थनावाही ताहु आप्या जानारू.

आखरी शुभकामना

²³ इपफ्रास, तो ख्रिस्त येशुआरी कैदी होय,

²⁴ अने मार्क अने अरिस्तर्खुस अने देमास अने लुक जे माआ मोदत कोल्यो होय, याहा माआ नमस्कार.

²⁵ आमाआ प्रभू येशु ख्रिस्ताआ कृपा तुमाआ आत्मा आरी होय आमेन.