मरकुस 1 - नोयरी नोवलू नियम

युहन्ना बप्तिस्मा आपनाराआ संदेश

¹ ओ परमेश्वरोओ पोऱ्या येशु ख्रिस्त याविषयी सुसमाचारो सुरवात होय.

² यशायाह संदेष्टाआ ग्रंथात लेखिलो होय का, “होमला आय आपाआ दूत ताआगाडी मोकलित होय, तो ताआ मार्ग तीयार कोए.”

³ डोगोम घोषणा कोअनाराआ शब्द होमला आवीत होय “प्रभु कोअता वाट तीयार को.” “अने तियाआ वाट सिद्ध को.”

⁴ योहान माहुंहु जंगलूम बाप्तिस्मे लेवा पापो माफी एहली घोषणा कोईत प्रकट ओवयू.

⁵ तेहलाम आरन्यो यहुदा देश अने यरुशलेमकर तिया जागे आव्ये अने तिये स्वताची पापे मानीत यार्देन खाडीम त्याआरोत बाप्तिस्मे लेदो.

⁶ योहान उटडाहा सिंज्याआ कापडे पाघरीलो एहलो तियाआ कमरूम सामडाआ कोमरबोंद एहलो अने तो टोळ अने रानमध खायलो एहलो.

⁷ तो घोषणा कोईत कोयो एहलो, मांपोरोत समर्थ एहेलू कोडु एक माहहू मापासाडी आवीत होय; माआ तियाआ चप्पलो बंद लागाडी सोडीला तीयाहाभी माआ लायकी नाहा.

⁸ आय तुमाआ बाप्तिस्मे पायोंवाही आपित होय, पण तो तुमाआ बाप्तिस्मे पवित्र आत्मावांहि कोअनारू होय.

येशुउ बाप्तिस्मा

⁹ तियाअ दिहोम एहलो उवे का येशु गालीलामे नासरेथामरोत आवयू अने योहानाआ आथोवाही यार्देन खाडीम तिया बाप्तिस्मे ओवयू.

¹⁰ जेहलो तो पाअयोपोरोत उपो आवयू, जुग विदारले होय अने आत्माआ कबूतरो होस रुपोमे आपापो उतरीलो होय एहलो तियाहा देखायो.

¹¹ तेहलाम जुगोमोरत एहेलू आवाज आवयू का, “तू माआ पोऱ्या, माहु परम प्रिय होय, तोओ बारामे आय संतुष्ट होय.”

येशुउ परीक्षा

¹² लागेज आत्मावांहि तियाहा लगेंच डोगोम मोकल्यीत.

¹³ त्याजागे शैतान तियाआ परीक्षा लेत ओतलू तो डोगोम सालीह दीही रोला, तो वनपशुमेहे ओतु, अने स्वर्गदूत तियाआ सेवा कोईत ओते.

गलील मेहे येशुउ सन्देश

¹⁴ योहानाआ अटक उवलानंतर येशु गलीलाम आवयू अने परमेश्वरोओ राज्याआ सुवार्ता कोहू लाग्यू.

¹⁵ तो कोयु काळाआ पूर्णता उवी होय अने देवोओ राज्य जागे आव्ये होय पश्चाताप को अने सुवर्तेवर विश्वास को.

चार मासाराहा हाद्लोओ

¹⁶ जांहा येशु गालील समुद्राआरी रोत जात ओतलू तियाहा शिमोन अने तिया पाही आंद्रिया ओ समुद्राम जाळे टाकत्ले देखायो, काहाके ते मासे दोनाराआ ओते.

¹⁷ येशु तियाहा कोयु, मा फासाडी आव, म्हणजे आय तुमाहा मांहे तोअनारु उवे एहलो कोअनारू.

¹⁸ फासाडी ते जालो सोडीत लागेज तियाआ फासाडी आव्ये.

¹⁹ तिहीरोत आगाडी जातु ओतु तेहलाम तियाहा जब्दीचा पोऱ्या याकोब अने तिया पाही योहान ओ नावीम जाली हुदारते देखायो.

²⁰ अने तिये लागेज हादाडये, फासाडी ते लागेज आपाआ बाह्हू जब्दी याहा मजदूरो आरी नावूमे सोडीत तिया फासाडी गोये.

दुष्टआत्मा सी पीडीत मांहोहो छुटकारु

²¹ फासाडी ते कफर्णहुमाम गोये अने लागेज तिये शब्बाथ तेदीही सभास्थानात जात शिक्षण आप्लु.

²² तियाआ शिक्षणापोरोत मांहे थक्क उवे, काहाके तो तियाहा शास्त्री माहुंहोस नाहा ताहा अधिकार ओय एहलू हिकाडतो ओतु.

²³ तियाआ टायमोमें तियाआ सभास्थानात अशुद्ध आत्माआ लागल्यो एक मांहु ओतु

²⁴ तो आयडीत कोयु, ओ येशु नासरी, तू आमा माय काहा गुंगदिलो? आमाआ नाश कोईलाकाजे आवयू का नाहाकोत? तू कोडू होय ओ माहु मालूमे होय, देवाआ पवित्र तो तांहुज होय.

²⁵ येशु तियाहा धमकाव्यो कोयु, चुप रो अने यामेरोत निह

²⁶ तेहलाम अशुद्ध आत्माआ तियाहा निपटी जोरेज आअड्यू अने तीयामरोत निहित गोल्यो.

²⁷ तेहलाम ते एवडे थक्क उवे का ते एकमेकाहा फुसिलो लागाडीत, ओ होय तेबी नाहाकोत? नाहाकोत ए अधिकार युक्त नवो हिकवन ओ दुष्ट आत्माहा ए आज्ञा कोअत्लू अने ते तियाआ होमलित्ली.

²⁸ ए तियाआ वाहवा लागेज गालीलाआ चारवोगेरोत आखे भागुम फेलितगोई.

बीमार मांहोहो हाजु कोअलोओ

²⁹ सभास्थानामरोत निहीलानंतर ते लागेज याकोब अने योहान त्याआरी शिमोन अने आंद्रियाआ कोओ गोये.

³⁰ शिमोनाआ हाविह्ही जाखो ताव मांदवाड्यू पोड्यी ओती, त्याविषयी लागेज तिये तियाहा कोयु.

³¹ तेहलाम तिये जागे जात तिया आथ तोईत तीही उठविले अने तीई ताव निघाल्यू, अने तियाआ सेवा कोहू लागीई.

³² दिह बुडेताहा हांजेपो माहु आखे दुष्टात्मा अने तिया जागे लाविले.

³³ अने सबंध शहर बाअणारी आव्ये.

³⁴ तेहलाम नाना एह्लाम रोगोम पोडीत रोल्या खूप मांहोहो तिये हाजो कोल्यु अने अनेक दुष्टात्मा काढीलो; तियाअ दुष्टात्मा तिये ओलख कोईत तिये तियाहा गोगूहु नाहा देदे.

एकान्त मेहे येशुउ प्रार्थना

³⁵ कोईत तो वेगीई वोडो वेगर्युज उठित बारथे गोल्यो अने जंगलूम जात तीही तिये प्रार्थना कोअयी

³⁶ तेहलाम शिमोन अने तियाआ होबती तिया होद. कोईत गोये

³⁷ अने तो जोडल्यापो ते तियाहा कोयु, आखे मांहे आपाआ होद कोईत होय.

³⁸ तेहलाम तो तियाहा कोयु, माहु आसेपासेए गावून उपदेश कोअता आवे कोईत आपु दिहरी जागे जाऊ काहाके इयाच उद्देशावाही आय निहयू होय.

³⁹ फासाडी तो आरन्यो गालील माय तियाआ सभास्थानात जात उपदेश कोईत अने दुष्टात्मा काडीन फिरीत.

येशु कोड़ीही हाजु कोअलोओ

⁴⁰ तेहलाम एक कुष्ठरोगी तिया जागे आवयू अने त्याआगाडी टोसणे टेक्यू तियाहा विनंती कोहू लाग्यू अने तियाहा कोयु आपाआ इच्छा होय ताहा माहु शुद्ध कोईलाकाजे आपु समर्थ होय.

⁴¹ तेहलाम तियाहा तिया तरस खादु तिये आथे आगाडी कोईत तियाहा स्पर्श कोअयु अने कोयु माआ इच्छा होय, शुद्ध होय.

⁴² तेहलाम लागेज तो कुष्ठरोगी शुद्ध ओवयू.

⁴³ ताहा तो तियाहा चेतावणी आप्यी अने लागेज मोकलित आप्लु.

⁴⁴ अने कोयु पाला, कोडाआ याविषयी किबी मा कोही, ताहा जात स्वतः याजकाहा देखाळ अने तियाहा प्रमाण पोटुहुजोवे कोईत तू आपाआ शुद्धीकोअता मोशेई निवडीलेले अर्पण को याकोअता का तू शुद्ध होऊला साक्षी प्रत्येकाहा सोमजे.

⁴⁵ पोन तो बारथे गोइत्लुताहा घोषणा कोईत तियाअ गोठीकोता एवडे प्रसिद्ध कोल्यु का येशुहू उघडपणे शहरामे जाता नेआवतली; कोईत तो बारथे डोगोमेज रोला तेबी मांहे चारीवोलेरोत तिया जागे आविलो.