लूका 1 - नोयरी नोवलू नियम

लूकाआ उद्देश

¹ जास्तीज माहुहु तियाअ गोठीई खात्री लिखुहुं आपाआ आथोमेहे लेधलो जे आमा माय घोडये होय,

² हारको तियाआ गोठी ज्या आमाहा माहापो रोत जोड्या होय जिये याआ गोठी पेलेरोत पालल्या कोयु अने जे वचनाआ सेवक ओते.

³ त्यापोत ऐ स्नमानोवाही योग्य थियुफिलुस पेलेरोत याआ आखे गोठी सावधानी पुर्वोज अने आरी होद कोईत माहु ओ हाजो होमज्ये का आय पण ताहु लाइनिमेहे लिखेहू.

⁴ म्हणजे तू आव गोठी निश्चितपणे जाईत ले ज्याआ ताहु शिक्षण जोडयेहे होय.

जकर्याह अने एलीशिबा

⁵ यहूदिया राजा हेरोदाआ टायमोमें जखऱ्या नावाआ एक याजक ओतु जो अबियाआ वर्गामे ओतू एन तियाआ लाडीई नाव एलीशिबा ओते जी हारूनआ कुलामेरयु ओती.

⁶ ते बेन परमेश्वरोओ राज्याम धोर्मी ओते तियाआ वागनुक परमेश्वरोओ विधीने अने आज्ञा निर्दोष ओते.

⁷ त्याआं किबी पोऱ्यो निमिले काहाके एलीशिबा वांझ ओती अने बेन डाये उवे ओते.

स्वर्गदूत द्वारा युहन्ना जन्मो भविष्यवाणी

⁸ एहलो उवे का तो आपाआ वर्गाआ नंबर आवयू तेहलाम परमेश्वरा आगाडीही लेवीई काम कोईत ओतु

⁹ ताहा लेवीई रीतीनुसार तो चिठी टाकीत निवडीला आवयू का परमेश्वरोओ मंदिरोम जात धूप बलीलो.

¹⁰ धूप पेताडीलाआ टायमोमें आखे मांहे बारथे उभे रोत प्रार्थना कोईत ओते.

¹¹ अने तियाहा धूपआ वेदीई हाजावोगे परमेश्वरोओ एक स्वर्गदूत उबु रोतगोल्यु देखायू.

¹² तियाहा पालीत जखऱ्या भिईल्यो गोल्यो अने बितकोईत ओवयू.

¹³ पण स्वर्गदूतोवाही तियाहा कोयु, ओ जखऱ्या बितकोईत ओवुहू नाहा काहाके ताआ प्रार्थना होमलित आवयी होय ताआ लाडी एलीशिबा त्यापोरोत ताहु एक पोऱ्या उवे अने तू तियाआ नाव योहान मेकीला.

¹⁴ ताहु आनंद अने आनंद लागे अने तियाआ जल्माआ तेदीही जाखो मांहे आनंद कोअनारू,

¹⁵ काहाके प्रभूउ नजरेम तो वोडू ओयताहू द्राक्ष रोह अने मद्द्य पीही नाहाएने तिया याह्हीई पोटामेज तो पवित्र आत्मावांहि जाअखो ओतगोयु जानारू,

¹⁶ तो इस्राएलोओ पोऱ्यामरोत ताहा कोअता जो तो आपाआ प्रभू परमेश्वराही घेऊन आविलो.

¹⁷ अने तो तियाआ आगाडी एलियाआ आत्माम अने सामर्थ्याआ माय पोईत चाले का बाह्हाआ मोनाहा पोऱ्या हनापोऱ्यापो घेऊन आविलो अने आज्ञा न मानणाराहा धार्मिका वाटेपो घेऊन आविलो किबिकोईत तो प्रभु कोअता योग्य एह्ली प्रजा तीयार कोअनारू.

¹⁸ जखऱ्यावाही स्वर्गदूतोहो फ़ुस्ल्याआ आय याहा काहयो पोरोत होमज्यू शकतो? काहाके आयताहा डायू होय माआ लाडी पण डाई होय.

¹⁹ स्वर्गदूतांवाही उत्तर आप्लु “आय गब्रिएल होय जो परमेश्वरोओ आगाडी उभे रोतलू माहु यकोअता मोक्ल्यीत होय का आयताआ आरी गोगू अने ए सुसमाचार कोव”

²⁰ पाला, ज्या दिहेजा ए गोठी पुरो उवनारा नाहा तू गुटू रोही अने गोगू सेकेहे नाहा काहाके तू माआ गोठीपो विश्वास कोअयु नाहा जी योग्य टायमोमें पुरो उवे.

²¹ मांहे जखऱ्याआ वात पालीत ओते अने तियाहा आश्चर्य वाटत ओते का तियाहा मंदिरोम ऐतू वेल काहा लागित होय?

²² पोन जाहा तो बारथे आवयू तेहलाम तो कोहू शकला नाहा अने ते होमजीत गोये का मंदिरोम तियाहा किबी तेबी दर्शन जोडयेहे होय तो खून कोईत देखाडीत रोला अने मुक्कोज रोला.

²³ अने एहलो उवे का जांहा तियाआ लेवीई काम पुरो उवे तेहलाम तो आपाआ कोआ गोल्यो.

²⁴ आव दिहो नंतर तियाआ लाडी एलीशिबा गर्भवती रोली अने तीही ओ कोत स्वतःहा पाच मोयना निकाडीत मेकल्ये,

²⁵ तिया दिहोम मापो कृपा नजर कोईत माहुमो माआ बदनामी सेटे कोयालाकोताच प्रभू परमेश्वराने माआरी एहेलू व्यवहार कोअयु होय.

स्वर्गदूत मरियमो सामने प्रगट ओवयु

²⁶ सहावू मोयनाम परमेश्वारापोरोत गब्रिएल स्वर्गदूत नासरेथ नावोओ गालील नगरामे,

²⁷ होमला कुवारी जागे मोक्ल्यीत गोये जीई मंगनी होमला योसेफ नावोओ मांहाआरी उवी ओती तो दाविदाआ कुलामोरोत ओतु अने तियाअ कुवारीई नाव मरिया ओते.

²⁸ अने विसमे आविलो तीही स्वर्गदूतोवाही कोयु, ओ प्रभूउ कृपा पावलेली बुई नमस्कार, प्रभू ताआरी होय.

²⁹ आव आभार मानिला होमलित ती घाबरील्यो गोयी अने विचारोम पोडीत गोयी का ओ कोडला विषयाहा आभार मानत्लू ओवुहू सेकोहो?

³⁰ तेहलाम स्वर्गदूतांवाही तीही कोयु, ओ मरिया, बित नाहा काहाके तापो परमेश्वरोओ कृपा उवी होय.

³¹ पाल तू गर्भवती उवे अने होमले पोऱ्याहा जोल्मो आपी अने तू तियाआ नाव येशु मेकीला.

³² तो वोडू उवे अने परमप्रधानो पोऱ्या कोअहो जाइअलो प्रभू परमेश्वर तिया बाह्हू तियाहा दाविदाआ सिहासन तियाहा आपी.

³³ अने तो याकोबाआ कोऱ्यापो कायम काळपर्यत राज्य कोअनारू अने तियाआ राज्याआ अंत उवे नाहा.

³⁴ मरीयाई स्वर्गदूतो कोयु ओ केहलो ओवुहू सेकोहो? काहाके आयताहा कुवारी होय?

³⁵ स्वर्गदूतोवाही तीही कोयु, पवित्र आत्माआ अने परमप्रधानो सामर्थ्य तापो सावलू कोअही ह्याप्रमाणे जो उत्पन्न उवे तो परमेश्वरोओ पोऱ्या कोअहो जाइअलो

³⁶ पाला ताआ होगवाड्ये एलीशिबाहा पण आव डायू पाणोम पोऱ्या उवे होय अने ती जी वांझ कोल्यी जात ओती तीई सहावू मोयनु चालीलो होय.

³⁷ काहाके परमेश्वरा कोअता किबी कठिन नाहा

³⁸ मरीयेअ कोयु पाला, आयताहा प्रभूऊ दासी होय ताआ वाचनाहोस माआरी ओवुहू आप तेहलाम स्वर्गदूत तिया त्यापोरोत निहित गोल्यो.

एलीशिबा जागे मरियम गोयी

³⁹ तेहलाम तियाआ दिहोम मारिया उठित वेगुज डोगु भागुम यहुदा नगरोत गोयी,

⁴⁰ अने जखऱ्याआ कोअमे जात तीही एलीशिबाहा नमस्कार कोल्यु.

⁴¹ एहलो उवे का जेहलो मरीयेअ अलीशिबा भेट लेदि तीई पोटाम पोऱ्यो उधलील्या अने एलीशिबा पवित्र आत्मावांहि पुरोओत उवी.

⁴² तिये वोडो आवाजोमें ती गोगल्यी, तू बुई माय धन्य अने ताआ पोटामे पोऱ्यो पण धन्य होय

⁴³ मापो ए कृपा केहली उवी का माआ प्रभूऊ याह्ही मा आहने आवयी?

⁴⁴ पाला, ताआ नमस्कार शब्द माआ कानोम पोडये अने माआ पोऱ्यो उधलील्या.

⁴⁵ धन्य होय ती बुई जीयी विश्वास कोअयु काजे किबी परमेश्वराने तीही कोयु होय ते पुरो उवे.

मरियमो द्वारा परमेश्वरो स्तुति

⁴⁶ तेहलाम मरीयेअ कोयु, “माआ जीव परमेश्वरोओ गौरव कोईत होय.”

⁴⁷ अने माआ आत्माआ माआ तारणाऱ्याआ परमेश्वर मेहे आनंदाम ओवयू होय,

⁴⁸ काहाके तिये आपाआ दासीई गरिबीई परीस्थीतीम दया कोअयी होय त्यापोत पाला, ओमोरोत पिढ्यानपिढ्या ताहु धन्य कोअही,

⁴⁹ काहाके परात्परावाही माकोअता वोडो काम कोल्यु होये आने तियाआ नाव पवित्र होय,

⁵⁰ अने तियाआ दया पिढ्यानपिढ्या पर्यंत तियापो जे तिया बित मानतेहे तियापो रोही.

⁵¹ तिये आपाआ बाह्हा वाही पराक्रमाआ काम कोल्यु होये आने तियाहा तितर बितर कोईत आप्लु जे आपाआ मोनम गर्वकोतारू ओते.

⁵² तिये अधिपती सिहासनपो रोत पोडीत आप्लु अने गोरब्योहो वोडो कोईत आप्लु.

⁵³ तिये फुक्ल्याहा हाजा वस्तूवाही तृप्त कोल्यु होय अने जे श्रीमंत तियाहा निसे ओतु कोईत काढीत आप्लु

⁵⁴ जेहलो तिये आमा सेवक इस्रायलोहो सामाल्यू तेहलूज तिये दया ओर कोए,

⁵⁵ आब्राहम अने तियाआ वंशाआ प्रती आपाआ दया ओर कोईत इस्राएल ची सेवा कोअयी

⁵⁶ मरियम तियाआरी तीन मोयना रोत आपाआ कोअ फासी आवयी.

युहन्ना बप्तिस्मा आपनाराआ जन्म

⁵⁷ ताहा एलीशिबाआ ठाल्ली उविला दीही पुरो उवे अने तीही होमला पोऱ्याहा जोल्मो आप्लु.

⁵⁸ तियाआ जागरयु अने कोऱ्यामाहुहू ओ होमल्यु तेहलाम प्रभूऊ तीपो दया नजर कोअयी होय ताहा तिये आनंद कोअयु,

⁵⁹ अने एहलो उवे का मांहे आठवो तेदीही पोऱ्याहा सुंता कोइला कोअता आव्ये तेहलाम तियाआ बाह्हाआ नावोहोस तियाआ नाव पण जखऱ्या मेकहु लागाडीत.

⁶⁰ यापो तियाआ याह्ही कोयु नाहा, तियाआ नाव योहान मेकण्याम आवे.

⁶¹ तेहलाम तिये तीही कोयु, तुमाआ होगावढ्यामेहे ताहा कोडाआज एहलो नाव नाहा.

⁶² तिये तियाआ बाह्हाहा निशाण लेखित फ़ुस्ल्याआ का ताहु तियाआ नाव नाहाकोत मेकीला होय?

⁶³ साहा तिये लेखिलाआ पाटी मागित ह्यापो लेखिलो ह्याआ नाव योहान होय अने आखाहा आश्चर्य वाटेम.

⁶⁴ लागेज तियाआ सोब अने जीभ उगडाव्यी अने तो परमेश्वरोओ गौरव कोईत गोगू लाग्यू.

⁶⁵ योपो आगाडी फासाडी रोणारे मांहे बितकोईत ओतगोयु गोये अने यहुदाआ आखे डोगुमेह भागुम आव आखे गोठीई चर्चा ओवुहू लागीई,

⁶⁶ जिये ओ आखे होमल्यु तियाअ आखाहा आप आपाआ मोनामे विचार कोईत कोयु, “ओ पोऱ्यो केहलु होय?” काहाके खरोज प्रभूआ आथे तियापो ओतु.

जकर्याहआ भविष्यवाणी

⁶⁷ अने तिया बाह्हू जखऱ्या पवित्र आत्मावांहि जाअखो ओवयू अने ओ कोत भविष्यवाणी कोहू लाग्यू.

⁶⁸ इस्राएलाआ प्रभू परमेश्वर धन्य होय काहाके तिये आमाआं कालजी लेदि होये आने आपाआ मांहाहा छुटकारा काम पुरो कोल्यु होय,

⁶⁹ अने आमा कोअता आपाआ सेवक दाविदाआ गारानाम उद्धारो एक सिंग काड्यू,

⁷⁰ जेहलो तिये धोरती पेलरोत आपाआ पवित्र भविष्यवक्ता सोबिमरोत कोहू लागाडले ओते,

⁷¹ का आमा दुश्मनापोरोत अने आमा आरी द्वेष कोअनाराआ आथोम रोत आमाहा तारण उवे,

⁷² का आमा आगाडी दया को अने आपाआ पवित्र करार ओर को,

⁷³ कोअतीज ती शपथ जी आमाआ बाह्हू अब्राहमोओ आरी कोअयी ओती,

⁷⁴ का आमाहा ओ वरदान आप का आमाहा आपाआ दुष्मनांआ आथोम रोत सोडव्ये जात,

⁷⁵ आगाडी पवित्रता अने धार्मिकतेवाही जीवन पोईत नारू रोत याहा सेवा कोईत रो.

⁷⁶ अने तू ओ पोऱ्या परमप्रधान भविष्यवक्ता कोयू जानारू काहाके तू प्रभूआ वाट तीयार कोइला कोअता तियाआ आगाडी-आगाडी सालनारू होय,

⁷⁷ का तियाआ मांह्हू उद्धारो ज्ञान आप जो तियाआ पापोओ माफिवाही जोडयो ओते.

⁷⁸ ओ आमा परमेश्वरोओ तियाअ वोडो दयावाही उवे, याकोअता उसेरोत आमापो वेगऱ्यू प्रकाश आमापो उगे,

⁷⁹ का आंदारो अने मोईला सावलामे बोहणाराहा प्रकाश आपी अने आमा गुडाहा शांती वाटेमे वारुई सालाडणारु.

⁸⁰ तो पोऱ्यो वोदतो अने आत्मा मेहे ताकतवालू ओवतु गोयु अने इस्राएलापोओ प्रकट उविलाआ दिहेजा जंगलूम रोल्यु.