याकूब 1 - नोयरी नोवलू नियम

शुभकामना

¹ परमेश्वरा अने प्रभु येशु मसीहाआ दास याकूबो वोलरोत ते बारा गोत्राहा जो वेरा सेर ओत कोईत रोतेहे तीही नमस्कार पुगे.

परीक्षाआ महत्व

² ऐ माआ पाही, जाहा तुमु नाना प्रकारोओ परीक्षाआ सामना कोअता ताहा याहा वोडा खुशिमेहे गोठी सोमजा,

³ ओ मालुम ओमेत का तुमाआ विश्वासाआ पारखिलो धीर उत्पन्न ओतू,

⁴ पण धीराआ आपाआ पुरो काम कोहू दया का तुमु पुरो तिहिज सिद्ध उवनारा जानारू ज्याही का तुमामे कोडला गोठीई कमी नि रोय.

⁵ जर तुमाआ मायरोत कोडाआ ज्ञानाने कमी होय ताहा तो देवापो मागिलो अने तियाहा जोडीत, काहाके हर एक जनाला पुर्वोज उदारताच्या आरी आपोहो.

⁶ पोन विश्वासानी माग्ये, अने किबी संशय नाहा तोयलो, काहाके संशय तोअनारू समुद्राआ लाटा सोमोर होय जी वारू त्यापोरोत वोहत्लू अने उटत्लू.

⁷ एहेलू मांहु होय नाहा होमजो का माहु प्रभूकडून किबी जोडीत

⁸ तो वेक्ती बेन दुचित्तु रोतो अने आपाआ आखे गोठीमेहे चंचल होय.

धनी अने निर्धन

⁹ दीन स्थिती मेहे पाहीही आपाआ उसू स्थितीविषयी अभिमान बाळगावे,

¹⁰ अने धनवान तियाआ नीसा स्थितीविषयी; काहाके तो खोडो होसे फुल सारखो जात रोही.

¹¹ काहाके दिह तीव्र लाडीवाला तापतो अने खोडोहो सुकाळल्यो आपोहो, अने तियाआ फुल गोलीत जाहो अने तियाआ रूपोओ होबा जात रोत आव प्रकारे धनवान पण आपाआ मार्गापो जाता-जाता कादवोमे मिलून जानारू.

परमेश्वर परीक्षा नि लेत्लू

¹² धन्य होय तो मांहु जो परीक्षेमेहे स्थिर रोतलू, काहाके तो खोरो निहित जीवनामे तो मुगुट मिळविण्नारो ज्याआ प्रतिज्ञा प्रभूनी आपाआ प्रेम कोअनारापो कोअयी होय;

¹³ जाहा कोडाआ परीक्षा होय, ताहा तोओ नाहा कोअल्यो का माआ परीक्षा देवापो; काहाके नाहा ताहा वाईट गोठीही देवाची परीक्षा उवहू सेकोहो, अने नाहा तो कोडाआ परीक्षा आपु कोअत्लू.

¹⁴ पोन हर एक वेक्ती आपाआ वासिलोओ ओढलेला अने फोसित एहेलू परीक्षा मेहे पोडत्लू.

¹⁵ फासाडी वासना गर्भवती होतगोयो पाप जोल्मो आपोहो अने पाप जांहा वोडीत जाहो ताहा मोईलाकाजे उपजाडीलो.

¹⁶ ऐ माआ प्रिय पाही, फोसहाआ नाहा.

¹⁷ काहाके हर एक हाजो दान अने हर एक-एक उत्तम देणगी वरून होय, अने उजवोडोओ बाह्हा पोरोते उतरीत्ले, ज्याम न किबी परिवर्तन उवहू सेकोहो, अने न अदल-बदल विषयी तियापो सावलू पोडे.

¹⁸ तिये आपाआ ए इच्छावाही आमाहा सत्त्याआ वचनाआ द्वारा पोयदा कोअयू, अने आपु तिया सृष्टी ओवली वस्तू मेहे एक प्रकारो पेल्लो फल होय.

होमलिलोओ अने तियापो साल्लोओ

¹⁹ ऐ माआ प्रिय पाही, ए गोठी तुमु होमजीतल्या हर एक मांहु होमलुहू तत्पर अने गोगाडन्या कोअता धीमा अने खत मेहे मंद रोहूजवे,

²⁰ काहाके माअहा खोत देवाच्या नितीमत्वाचे काम उवत्लो नाहा

²¹ यकोअता आखे मलीनता अने उंच बळून आवल्यु दृष्ट भाव सेटे कोईत, तियाअ वचनाआ सौम्यतेणे ग्रहण कोईत ल्या हृदयात ओअत्लू अने जे तुमाआ जीविलो तारण कोहू शकतो.

²² पोन वचनापो चालणारो बन्यो, अने फक्त होम्लाड़नारू ए नाहा जो आपाआ माह ठोगत्लू.

²³ काहाके जो कोडु वचनला होम्लिनारो होय अने त्यापो चालनारांहा नाहा होय, ताहा तो तिया महाआ सारखू आहो जो आपाआ शारीरिक मुख दर्पण पालत्लू.

²⁴ यकोअता का ते आपाआ माह पालीत निहित जात्लू अने लागेज विहराइत जात्लू का आय केहलु ओतु.

²⁵ पण जो वेक्ती स्वातंत्र्याच्या पुरोओत नियमोमेहे ध्यान कोईत योपो लक्ष मेकीत रोतलू, तो आपाआ कामोमे तीया कोअता आशीष मेहे मेलविनारू का होमलित विहीऱ्यो नाहा पण तेहलूज कृती कोअत्लू.

भक्तिई खरु मार्ग

²⁶ जर कोडु आपाआ स्वताला धर्माचरण होमजाडीत होय अने आपाआ जीभेहे आळा काले ने ओय पण आपाआ मनाहे ठोग्त्लू होय, ताहा तियाआ धर्माचरण व्यर्थ होय.

²⁷ आमाआ देव अने बाह्हाआ नोजरेवाही शुद्ध अने निर्मळ धर्माचरण ओ होय का अनाथांचा अने रोंडालो तियाआ संकटाम तियाआ खोबोर लेदलेए, अने आपाआ माह जगोह देखाडूहू निष्कलंक मेका.