इब्रानि 1 - नोयरी नोवलू नियम

पुत्रोओ स्वभाव

¹ पेल्ला युग मेहे परमेश्वर बापदादाहा थोड़ो थोडो कोईत अने भाति-भाति सी भविष्यद्वक्‍ता द्वारा बुल्यू.

² आव शेवटच्या दिहोमे आमाहा पोऱ्याआ मार्फत गोठी कोअल्यो, ज्याहा तिये आखे वस्तूंऊ वारस ठेरव्यो तियाद्वारे तिये आखे सृष्टीची बनिवल्या कोअयी होय.

³ तो तियाआ गौरवो तेज अने तिया तत्वाचा प्रतिरूप होय, अने आखे सामानोओ आपाआ सामर्थ्याआ वचनाने सामालीत होय तो पापोहो तोवीत उसा जागापो महामहीम हाजावोगे जात बोहयु होय,

⁴ अने स्वर्गदूताहून एतोजे श्रेष्ठ ठरवील्यु, जेवडे तिये त्यापोरोत वोडो पदाआ वारस ओत श्रेष्ठ नाव प्राप्त कोअयु.

येशुउ स्वर्गोदुतो सी श्रेष्ठ

⁵ काहाके स्वर्गदूत मेहे तोओ कोडाआ कोयु, “तू माआ पुत्र होय, आज आय ताहु जोल्मो आप्यू होय?” अने फासाडी ओ, “आय तिया बाह्हू ओविही, अने तोओ माआ सुउ ओवे?”

⁶ अने जाहा जेष्ठ पोऱ्याहा जगात फासी घेऊन आवत्लू, ताहा कोत्लू, “परमेश्वरोओ आखे स्वर्गदूत तियाहा नमन कोआ”

⁷ अने स्वर्गदूताआ विषयाम ओ कोयु होय, “तो आपाआ दूतोहो वारू, अने आपाआ सेवकांआ जास्तीज होलगिलो आग बनाडत्लू”

⁸ पोन तुमाआ विषयाम कोयु होय, ओ परमेश्वरा, ताआ सिहासन कायम रोही; ताआ राज्याआ राजदंड न्यायाआ राजदंड होय.

⁹ तू धार्मिकता प्रेम अने अधर्मा बरोबर इटो राख्यो; त्यापोत परमेश्वराने ताआ दोस्ती कोता जाखो हर्ष रूप तेलोवांही ताहु अभिषेक कोअयु होय.

¹⁰ अने ऐका ऐ प्रभू सुरवातीती तू धोरतीई गुडू टाक्यू अने होर्गा ताआ हाथो आरी कृती होय

¹¹ ते ताहा कायनेते ओत जानारू पण तू टीकित रोही अने ते आखे कापड़ा होस जुनो ओत जानारू,

¹² अने तू तियाहा चादरा प्रमाणे गुडालिलो अने ते कापड़ा होस बोद्लीत जानारू; पण तू तोज होय अने ताआ वोरोजे संपली उवे नाहा.

¹³ अने स्वर्गदूत मधून तिये कोयो कोडाआ कोयु का तू माआ हाजाड़ीवगे बोह जोपोरोत का आयताआ वैऱ्यी ताआ गुडानिसेए पिढी बोणाडीत आपी नाहा?

¹⁴ केते आखे पावनाहा खावाडीलो कोनारी आत्मा नाहा जे तारण होद्नारा कोता सेवा कोअला मोकलिली जातेहे.