इफिसी 1 - नोयरी नोवलू नियम

अभिवादन

¹ पौलाआ वोलरोत जो परमेश्वराआ इच्छावाही येशु मसीहाआ प्रेषित होय, ते पवित्र अने मसीह येशुमेहे विश्वासी माहाआ नावे जे इफिसुस मेहे होय.

² आमाआ बाह्हू परमेश्वर अने प्रभू येशु ख्रिस्ता वोलरोत तुमामे कृपा अने शांती मिलती रोय.

मसीह मेहे छुटकारु

³ आमाआ प्रभू येशु ख्रिस्ताआ परमेश्वर अने बाह्हाआ धन्यवाद होय का तिये आमाहा ख्रिस्तामेहे होर्गाआ स्थानामेहे आखे प्रकाराआ आत्मिक आशीर्वाद कोयु होय.

⁴ जेहलो तिये आमाहा जुगाआ उत्पतीई पेले तीयाम निवडीत लेधलो का आमू तियाआ जागे प्रेमाम पवित्र अने निर्दोष रोहू जोवे.

⁵ अने आपाआ आसा हाजा आज्ञेपो रोत आपाहा तिया कोअता पेलरोत ठेरव्यो का येशु ख्रिस्ताच्या त्यापोरत आमू तियाआ दत्तक पुत्र रोहू,

⁶ का तियाआ तिया अनुग्रह वाइहि गौरवाने स्तुती ओये कोईत तिये तियाहा आमाहा तिया प्रिय जनामे आप्लु.

⁷ आमाहा तीयाम तियाआ रक्ताआ त्यापोरत सोडव्ये अर्थात अपराधाची क्षमा, तियाआ तिया कृपाआ धनोओ नुसार जोड़ी होय,

⁸ तिये तियाहा आखे ज्ञान अने समाजोआरी आमापो विपुलतेने कोल्यु.

⁹ काहाके का तिये आपली इच्छा भेद तिया हाजा संकल्पा नुसार आमाहा कोयु, तिये तियाहा आपाहा स्वतःहा ठाणून लेधलो ओते.

¹⁰ का तिया टाईम पुरो ओनारो एहेलू प्रबंध होय का जो कोडु होर्गाम अने जे किबी धोरतीपो होय आखे किबी तो ख्रिस्तामेहे एकठे कोअही.

¹¹ तीयाम ज्याम आमू बी तीयाम संकल्पनाने जो आपाआ इच्छेवाइहि मनापोरोत आखे किबी कोअत्लू, पेलरोत ठेरव्यो जात वतनदार बन्यो

¹² का आमू जिये पेलरोत ख्रिस्तापो आशा मेकल्यी ओती तियाआ गौरवाची स्तुतीच्या काहाके होय.

¹³ अने ज्याम तुमापो बी जाहा तिये सत्यांआ वचन होमल्यु, जे तुमाआ उद्धाराआ सुवार्ता होय अने ज्यापो तुमु विश्वास कोअयु पवित्र कोयु पवित्र आत्माआ शिक्का लागाड्यू.

¹⁴ तो तियाहा वेसातो लेद्लू छुटकारा आमा हिसाचे बोनाडहि होय का तिया गौरवाआ स्तुती होय.

आत्मिक ज्ञानो कोअता प्रार्थना

¹⁵ आव कारनोवाही आय पोन तिया विश्वासाआ सुवार्ता होम्लाडित जो तुमाआ माहुंमे प्रभू येशुपोओ होय अने आखे पवित्र माहुपो प्रेम प्रगट कोअयु होय,

¹⁶ त्यांकोअता धन्यवाद कोअला सोडीत नाहा, अने आपली प्रार्थनामे तुमामे स्मरण कोईत रोतलू

¹⁷ का आमा प्रभू येशु ख्रिस्ताआ परमेश्वर जो गौरवोअ बाह्हू होय, तुमामे आपाआ ओलखील्यु ताहा ज्ञान अने उजवोडाआ आत्माआ आप,

¹⁸ अने तुमाआ मोनाआ डोआं प्रकाशाम होय का तुमु ओलखीत ल्या का तिया बलवान आशा की होय अने पवित्र माहुंमे तिया वाटे गौरवोअ धन केहलु होय,

¹⁹ अने तियाआ सामर्थ्य आमामेरोत जे विश्वास कोअता केतो महान होय, तियाआ शक्तीचे प्रभावाच्या तिया कामो कोअता

²⁰ जो तिये ख्रिस्तामेहे कोअयु होय का तियाहा मोल्यामरोत जिवंत कोईत होर्गाआ स्थानामेहे आपाआ हाजावोगे,

²¹ आखे प्रकाराआ अधिपती मेहे अने अधिकार अने सामर्थ्य अने प्रभूताच्या अने फासी हर एक नावोओ उसे जेन फक्त तिया लोक आवणारा लोक बी लेधलो जाइलो बोहाड्यो,

²² अने आखे किबी तियाआ गुडू निसे कोईत आप्लु अने तियाहा आखे बिडारापो बारी ठेरवीत मंडलीही आपित आप्लु,

²³ ते तियाआ देह होय, अने तियाआ परिपूर्णता होय जो आखामे आखे किबी पुरो कोअत्लू.