3 यूहन्ना 1 - नोयरी नोवलू नियम

शुभकामना

¹ आय डायाआ वोलरोत प्रीय गायस नावे ज्याहा आय खोरो प्रेम मेकोहो.

² ऐ प्रिय, माआ आव प्रार्थना होय का जेहलो तू आध्यात्मिक उन्नति कोईत होय, तेहलूज ए तू आखे गोठी माय उन्नति को अने हाजू आरोग्या मेहे रोही.

³ काहाके का जाहा पायहो आवीत ताआ तिया कोरेजे साक्ष आप्यी, ज्यापो तू खोरोज चालीलो, ताहा आय जाअखो खुशिमेहे होय.

⁴ माहु याआ पेक्षा वोडीत दिहरू कोडणु आनंद निमिले के आय होमल्यू के माआ पोऱ्ये सत्य पोओ सालतेहे.

उदारता कोअता सरहाना

⁵ ऐ प्रिय, जे किबी तू तिया पाहीआरी कोअत्लू, जो दिहरा देशोमेहे होय, तियाआ विश्वासाआ रुपात कोअत्लू.

⁶ तिये मंडली आगाडी ताआ प्रेमाआ साक्ष आप्यीला होय केधी तू तियाहा तिया प्रकारे मोकल्ये ज्या प्रकारे परमेश्वरोओ माअहारोत याकोअता उचित होय ताहा हाजो कोअही.

⁷ काहाके का ते तिया नावाकोअता निकलीलू होय, अने अन्यजाति मेर्यो आरी किबी नाहा उवनारा.

⁸ याकोअता तेहेलाज स्वागत कोअला जोवे, ज्याहीरोते आमू पोन सत्याही शीडा तियाआ सहकर्मी उवहू.

दियुत्रीफेस अने दिमेत्रीयुस

⁹ आय मंडळी मेहे किबी लेखिलो ओते, पोन दियत्रफेस जो तियाआ माय वोडू उवहू इच्छितो आमाहा ग्रहण नाहाकोईत.

¹⁰ याकोअता जाहा आय जाइलो ताहा तियाआ का माहा जे तो कोईत ओतु, ओर आपही, का ते आमा विषया माय वाईट-वाईट गोठी कोत्लू; अने यापो पोन वायफळ नाहाकोईत आपाआ पायहोहो ग्रहण नाहाकोईत, अने तियाहा जो ग्रहण कोहू इच्छितो नाहा कोत्लू अने मंडली मायरोत काढीत टाकोहो.

¹¹ ऐ प्रीयांनो, सुकी नाहा पोन हाजाआ अनुयायी व्हा जो हाजो कोअत्लू, ते परमेश्वरा त्यापोरोत होय; पोन जो वाईट कोअत्लू, तिये परमेश्वरोओ नाहा पालील्यो.

¹² दिमोत्रीयसच्या विषया माय आखाज, नहाते खोरो पोन आपाआ साक्ष आप्यी; अने आमू बी साक्ष आपोहो, अने तू ओलखीत्लू का आमाआ साक्ष खोरी होय.

आखरी शुभकामना

¹³ माहु ताहु जाअखो किबी लेखिलो ते ओतो, पोन शाई अने पेनि वाही लिखेहू इच्छित नाहा.

¹⁴ पोन माहु आशा होय का ताआ आरी जोलदी भेट कोअही, तेहलाम आमू आगाडी गोठी कोहू.

¹⁵ ताहु शांती जोडती रोय ईही मेघ माहु नमस्कार कोअता तीयाआ दोस्ताआरी नाव लेत नमस्कार कोत देजी.