2 थिस्लोनी 1 - नोयरी नोवलू नियम

शुभकामना

¹ पौलुस अने सिलवास अने तीमुथियुसाआ वोगेरोत थिस्सलुनीकि मंडलीही नावे जो आमाआ बाह्हू परमेश्वर अने प्रभु येशु ख्रिस्तमेहे होय

² आमाआ बाह्हू परमेश्वर अने प्रभू येशु ख्रिस्ता वोलरोत तुमामे कृपा अने शांती जोडती रोय.

न्यायोओ दिह

³ ऐ पाही, तुमाआ विषयी आमाहा आखुवेल परमेश्वरोओ धन्यवाद कोअहू जोवे अने ओ योग्य होय यामुळे का तुमाआ विश्वास जास्तीज वोधाडीलो अने तुम्हाआ आखाआ प्रेम आपसामेहे जास्तीज वोदतो होय.

⁴ इहिंजा का आमू तुमु परमेश्वरोओ मंडलीम तुमा बारामे गर्व कोअत्लू का जेते संकट अने छळ तुमु सहन कोअता ते आखा मेहेरोत तुमाआ धीर अने विश्वास उघड ओतू.

⁵ ओ परमेश्वरोओ खोरो न्यायो प्रमाण होय का तुमु परमेश्वरोओ राज्याआ योग्य निहूह जोवे याकोअता दुख पोन सहन कोअता.

⁶ काह्के पर्मेश्वरारी ओ न्याय होय का जो तुमाआ छळ कोअत्लू तियाहा बोदलाम छळ आपी

⁷ अने जे तुमु छळ सहन कोअता आमा आरी विसाक आपी त्या टायमोहो जाहा प्रभू येशु आपाआ सामर्थ्यवान खिजनारू आगीरी स्वर्गदूत प्रकट उवे,

⁸ अने जे परमेश्वरोओ उलखित्लू नाहा अने आमा प्रभू येशु ऊ सुवर्तेला मानीत नाहा त्याआरोत बदलू लेही.

⁹ ते प्रभूउ आगला रोत अने तियाआ शक्तीई तेजमेहे रोत ते सेटे ओतगोयु अनंत विनाशो दंड मेलविनारू.

¹⁰ ऐ तिया तेदीही उवे जाहा तो आपाआ पवित्र माहुंमे गौरव मिलविला कोअता अने आखे विश्वास करणारा मेहे आश्चर्याआ काहाके उविला कोअता आविलो काहाके तुमु आमा साक्षीपो विश्वास कोअयु.

¹¹ त्यापोत आमू हरेक टेमे तुमा कोअता प्रार्थना बी कोअत्लू का आमाआ परमेश्वर आव पाचारानाचे योग्य समजाडत्लू के नाहा हाजोकोते हर एक इच्छा अने विश्वासाआ हर एक कामाकोता सामर्थ्या आरी पुरो कोईओलो,

¹² म्हणजे आमाआ परमेश्वर अने प्रभू येशु ख्रिस्ताआ कृपेनुसार आमू प्रभू येशुउ नाव तुमामे गौरविला जाअलो अने तुमु तीयाम.