2 पतरस 1 - नोयरी नोवलू नियम

शुभकामना

¹ शिमोन पतरसो वोलरोत जो येशु मसीहाआ दास अने प्रेषित होय ते माहाआ नावे जे आपाआ परमेश्वरोओ अने उद्धारकर्ता येशु ख्रिस्ताआ धार्मिकताआ द्वारे आमाआ समान बहुमूल्य विश्वास प्राप्त कोल्यु होय.

² देवाईही आमा प्रभू येशुउ ओळखिलो व्दारे कृपा अने शांती तुमामे विपुल जोळे.

विश्वास मेहे उन्नति

³ काहाके तियाआ ईश्वरत्व सामर्थावाही आखे किबी जे जीवोन अने भक्ती ओल्खाती मेहे मेकात्ले, आमाहा तीयाम ओलखिई व्दारे आप्लु होय, ज्याहा आमाहा आपाआ गौरव अने सत्वाआ हादाडल्यो होय.

⁴ ज्याआ व्दारे तिये माहु मुल्यवान अने जास्तीज वोडी वचने आप्यी होय म्हणजे तियाआ व्दारे तुमु तियाअ वासनेपो रोत सोडीत संसार मेहे खराब अभिलाषा ओवत्लि, ईश्वरत्व सहभागी विभाग उवे.

⁵ ऐहेलो कारनो कोईत तुमु आखे प्रकाराआ यत्न कोईत आपाआ विश्वासामेहे सात्विकतेचे टीका,

⁶ अने ज्ञानो मेहे संयम अने संयम मेहे धीर, अने धीराव भक्ती,

⁷ अने भक्तीपो पाही प्रीती अने पाही प्रीतीपो प्रेम वोडता जालो.

⁸ काहाके जर ओ गुण तुमामे वर्तमान होय अने वोडतु जाय, ताहा तुमु आमा प्रभू येशु ख्रिस्ताच्या ओलखित्लू नीरुदयोगी अने निष्फळ नाय उवहू आपी.

⁹ काहाके ज्याआ आय ऐ गोठी नाहा, तो आंदलू होय अने धुंदलू पालत्लू, अने आपाआ फासाडीई पापांनी तोवीत शुद्ध ओनारो विहराइत गोये होय.

¹⁰ आव कारनो कोईत ऐ पाही, आपाआ गोगाडनारू जाअलो, अने निवडील्यो जाआला खात्री कोईत विषेत प्रयन्त को, काहाके जर एहलो कोअनारू ताहा केदीज ठोकर नि खाहा;

¹¹ पोन आव रीतीवाही तुमु आमाहा प्रभू अने तारणारा येशु ख्रिस्ताआ सार्वकालिक राज्याम वोडा आदर च्या आरी प्रवेश उवे.

पतरोसोओ आखरी टाईम

¹² याकोअता कदाचित तुमु ए गोठी होमज्ये होय, अने जे खोरो वचन तुमामे मेल्यो होय तीयाम तुमु स्थिर रोत्ले, तेबी पोन आय तुमामे आव गोठीइ कायम अने आपलो कायम तीयार रोही.

¹³ आय ऐ आपाआ याकोअता उचित होमजीत्लू का जोपोरोत आय आव मंडपा मेहे होय, तोपोरोत तुमामे ओर आपित-आपित उभार्यू.

¹⁴ काहाके ऐ होमजीत्लू का माआ मंडप मेहे पोडीत टाकीलाआ वेल आवल्यी होय, जेहलो आमाहा प्रभू येशु ख्रिस्ताने मापो प्रगट कोली होय.

¹⁵ याकोअता आय एहलो यत्न कोअनारू का माआ निर्णय उवेताहा तुमु आव आखे गोठीही कायम स्मरण कोईत सेकेहे.

मसीह महिमाआ दर्शन

¹⁶ काहाके जाहा आमू तुमामे आपाआ प्रभू येशु ख्रिस्ताआ सामर्थावाही अने आगीमेहे सुवार्ता आप्लु ओते ताहा ते तियापो रोते बोनाडल्ये गोठीही अनुसरून नाहा ओते परंतु आमुज तियाहा आरि आरिज पालील्यो ओते.

¹⁷ काहाके जाहा तिये देव बाह्हा आरी आदर अने गौरव मिलवी अने तिया ईश्वरीयुक्त गौरवाआ व्दारे एहली वाणी आवयी, “ओ माआ प्रिय पुत्र होय, याकोते विषयी ती संतुष्ट होय.”

¹⁸ तेहलाम आमू तियाआ आरी पवित्र डोगोयो ओते अने होर्गामरोत ए वाणी आविली एखलीज.

¹⁹ आमा जागे जे भविष्यद्वक्ता वचन होय, ते तियाअ घटनांनी दृष्ट उवे तुमु ओ हाजो कोअता जोओ होमजीत तियापो लक्ष मेकात्ले का तो एक दिव्य होय, जो आंदाराम स्थान आय तिया टायमोपो रोत प्रकाश कोईत रोतलू जोपोरोत का हृदय उजळोरी अने वेगअऱ्यूऊ तारू उगे ताहूज.

²⁰ पोन पेल ओओ होमजीत ल्या का पवित्रशास्त्राआ कोडली बी भविष्यवाणी कोडाआ आपाआ ए विचारपोओ आधार पोओ पुरो नि ओवत्ली,

²¹ काहाके कोडली बी भविष्यवाणी मांहाहा इच्छावाही केधी नाहा उवी, पोन भक्त पवित्र आत्माआ व्दारे उभीरोत देवा कईही गोगले.